Сернуьш Хьуькуьм Догъисту Абдулмуслим Абдулмуслимов вохурди э веровундегор гъэрхундигьой эн министр финансгьой республикеревоз э Шамиль Дабишевевоз. Угьо пуьруьш сохдет овхьолет эн финансови сферей регионе эри суьфдеи нуьгь мегьгьо эн 2025-муьн сал ве чуьтам веровунде оморениге гъуллугъигьой эн сервор Догъисту эн Сергей Меликов.

Э пушотеине даннигьо гуьре, республикански бюджет эри эни вэхд гуьнжуьнде омори 173,2 млр.монетгьо, и 85% эн е салине плани. Хэржи сохде омори экуьнди 163,3 млрд.монетгьо енебуге экуьнди 97%. Вожиблуье социальни муьзде дореигьо веровунде оморени э вэхд ю ве э пура гъэдеревоз, э хьисоб дешенденки пособиегьоре эри кифлетгьо э гIэилгьоревоз, субсидиегьоре, дермугьоре ве школьни хуреке.

Гъэзенжлуье бэхш бюджет эз фикир сохде оморигьо зевер бири э 12,5%, расири э 51,9 млрд.монетгьо. Зури зевербире мэгIэнолуь зиед бири той сохде омоге э порине салевоз – налогови диремореигьо э се гиле зевер бири, налогсуьзгьо – е дуь гиле.

Хэржигьо эри миллетлуье проектгьо гуьнжуьнде омори экуьнди 19,9 млрд.монетгьо эз э план норе оморебугьо 23 млрд., эз комигьоки хэржи сохде омори 18,3 млрд.монетгьо. Бегьем те эхир веровунде омори гъэрхундигьо э товун проект «Хэйрлуье ве конкурентеоспсобни экономике», куьнди эки веровундеи миллетлуье проектгьоре «Инфраструктуре эри зиндегуни» ве «Беспилотни авиационни системегьо».

Жейлее тигъэт доре оморени гуьвотдореи бэхшвегиргьой эн жирелуье гъовхолуье операциере ве кифлетгьой энугьоре: доре омори 1 миллиард монетгьо. Зиедие пуллуье кумекии муниципалитетгьоре гуьнжуьнде омори эз 400 млн.монетгьо омбарте, фуьрсоре оморигьо эри оводу сохде районгьоре ве эри доре гъэрдигьоре. Меселен, дигь Нукуши вегуьрди пул эри гъуьч сохдеи клубе, шегьер Избербаш – эри хубте сохде хунелуье-коммунальни хозяйстворе.