Сергей Меликов гировунди гурдлемере Республикански оголзереие комиссие ве Зурие бинере РД э у гъобул сохди бэхшвегири корсохгьо хьуькуьме республике ве нушудорегоргьо гъувотлуье беделе.
«Догъистуние оголзерегоргьо гъуллугъ мисоху э Ерэгълуье гъувотгьо РФ, э лешгергьо Миллетлуье гъэреул ве серхьэдие лешгеригьо ФСБ Уруссиете. Фуьрсореи оголзерегоргьоре гирошде везифее тегьер. Э рэхь офдори гъуллугъ сохде э лешгеригьо 845 одоми»,- мэгIлуьм сохди э товун корисохи поизие оголзереие кампани лешгерие сервор Догъисту Абдурахман Мурадханов.
Лап хуб корисохигьо эсер оголзереигьо гировунде оморе э Хунзахски, Сулейман Стальски, Курахски, Магарамкентски, Тарумовски, ве Ногайски районгьо.
Тозеи оголзереире гьисди э кор венгесдеи эри зуте мэгIлуьм сохдеи оголзерегоргьоре Еклуье нуботномере лешгерие хьисобсохире (ЕРВУ). Чуьтам бирмунди лешгерие сервор, эз угьо фуьрсоре омори омборте 10 гьозор мэгIлуьметигьо.
А.Мурадханов ихдилот сохди, чуьки э е ченд муниципалитетгьо веди биреи четинигьо э веровундеиревоз оголзереие корисохигьоревоз, комики бесде оморе э вес нисдиревоз э гуьнжо овурдеи жирей корисохире э злой жугьобдорлуье идорегьо.
С.Меликов согъбоши гуфдиреи угьо шегьергьоре ве районгьоре, комики барасилуь веровунде гъэрхундигьоре эсер оголзереи. Эзуш бэгъэй, у талаб сохди эз песмундеие муниципалитетгьо гъувоте зиёд сохде коре э и рэхь.
«Гереки овурде э меселен биёвгьо оглзерегоргьоре гIэилгьоре, комикигьо уже веровунди зурие гъуллугьсохире. Э флоте, э лешгеригьо ПВО, ракетни лешгеригьо. Бигьиль ихдилот сохут, чуьтам гъуллугъ сохди, чуьре хуте бири. Иму биё бу э биёвгьо кумекии доре угьоре ве доре минкини офде хубе коргьо э гъовумлуье жигегьо»,- гуфдири сервор регионе.
Сервор регионе нори везифе фегьм сохде корисохигьоре васалие кампани ве хубте сохде коре. Лешгерие серворгьо э жигегьо, риз кешири сервор регионе, гереки гировунде андуьрмишигьо, ихдилот сохде э товун талаби оголзереире ве гъуллугъсохи э Лешгери, гьемчуьн жугьобдорлуьи э песой нэгIсохи эз у.
Сергей Меликов риз кешири, чуьки гъэлхэндчигьоре Ватане гьисди имидигьо офде хубе коре, э у гъэдер рэхьберисохие жофогьо.
Э гъэд гуьрдлеме бири фегьм сохде ве екейгегьо пуьрсуьшгьо, э у гъэдер э хуьшде вогосундеи э контрактни гъуллугъсохи.
