У, ки шинохи э кор эн гуьруькхонее КПП енебуге е гиле семей гирошдебу эз серхьэд, виниребу гIэдотлуье шекуьл – е чед дегь келе мошингьо, е ченд сэгIэтгьо гузет сохденуьтгьо варасдеи фегьмсохире. Э товун эни четини гуфдири э Фуьрсореи хуьшде э Федеральни Гуьрлеме э февраль 2024-муьн сал Президент Уруссиет ве норе мэгIнолуье везифе, те хьисоб сохде оморенигьо дэгъдэгъэгьо зофру сохде гIэдотлуье вэхд фегьмсохире э гуьруькхонее жигегьо.

Гьечи бири, кем сохде вэхд гирошдеире эз сэгIэтгьо те минутгьо – веровундение везифеи. Э кумеки оморет гьеймогьине технологиегьо. Ве Догъисту, оммо егъин гIэрейхэлгъие автомобилни жигей гиршдеи (МАПП) Тагиркент-Казмаляр, бири суьфдеи эри фегьм сохдеи угьоре.

И жиге – еки эз бинелуье жигегьой эн рэхь «Софун-Дорум». Чуьтам э иму ихдилот сохде омори эз гуьруькхоней Догъисту, эри 9 мегьгьой эни сал гирошди эз 87 гьозор келе мошинго омбарте. Гировунде омори экуьнди 900 гьозор тонн. Э де рузгьойге эз унжо гирошдени те 200 мошингьо э шеви-рузи.

Оммо вокурденки жигей гирошдеире у хьисоб сохде не оморебу эри ижере омбаре мошингьо. Имбуруз эз унжо гирошдени э 4,5 гиле омбарте мошингьо. Э у гуьре омбаре бэхш юкгьо, гировунде оморенигьо эз жигей гирошдеи – и мейво-хьэвуьжлуье молгьои эз Иран, Азербайджан, Турцие ве эз Грузие, енебуге и зу пуч биренигьо молгьои. Эри фегьм сохде мошине рафдембу е ченд сэгIэтгьо.

Овхьолет сер гуьрди дегиш бире эз август 2023-муьн сал, кейки э жигей гирошдеи э кор венгесде оморебу инспекционни-фегьмсохденигьо комплексгьо эн гирошденигьо жире. И тозе технологически чорей эн гуьруьххонее назарини, комики расундени нисе поисденигьо фегьмсохдеи гьемме мошингьоре ве юкгьоре, гировунде оморенуьтгьо эз жигей гирошдеи э хьуькуьметлуье серхьэд ве не вокурденки угьоре.

Э кор венгесдеи ижире комплексгьоре минкин дорени расире э бирмунушигьо эн гировунденигьо гъувот энугьо те 120 мошингьо э е сэгIэт. Суьфде эри гировунде унгъдер гъэдер мошингьоре рафдембу е шеве-рузи, кими вэхд омбартеш.

Тагиркент-Казмаляр бири еки э суьфдеи жигегьой гирошдеи, эже синемиш сохде оморебу тозе технологиегьо.

«Жирелуье тегьер эн эни системе гьисди шекуьл э буьлуьнде фегьмсохие гьинор, винире чор десдей молгьоре, дануьсде гурунди юкгьоре, ве гировунденигьо гьиноре те 200 мошингьо э е сэгIэт, минкин виниреи кабиней мошингьоре э шофиревоз.

Жирелуьи эну э гьинори зу, дуз ве секонесуьзи сирот зере 100% мошингьоре ве юкгьоре э динамически поток. И егIни, ки мошине герек нисди вэхд хуьшдере хэржи сохде эри поисдеи ве гирошдеи фегьмсохире э жейлее жиге енебуге э бокс. Буьлуьнде тохнологически оборудование минкин дорени гировунде дуьракурсни сконированиере эз ен ве эз зевер, чуь кем сохдени жэхит гировундеи гIэмел нисе оморенигьо чигьоре. Буьлуьнде дузе шекуьл эн кабине ве эн прицеп э юкевоз веди бирени э экран. Искусственни интеллект автоматически фегьм сохдени вегуьрде оморигьо шекуьле. Инсоетие гъозие э и гуьре лап кем герек бире»,- ихдилот сохдет э иму э гуьруькхоней Догъисту.

«И системе минкин дорени гуьрд сохде гьеймогьине технологически гъэрорномегьоре, комигьоки имбуруз дешенде оморени э кор эн хьуькуьметлуье назарлуье органгьо, э еклуье сеть, кор сохденигьо э тегьер «е пенжере», э минкиневоз фегьм сохде жуьмуьсдеи мошингьоре э жигей гирошдеи. Электронни хогьиши дореи рузе ве вэгIэдой омореире эки автомобильни жигей гирошдеи эри гирошде эз хьуькуьметлуье серхьэд мошингьоре минкин миду зу гирошде мошингьоре эз жигей гирошдеи», — андуьрмиш сохдени рэхьбер пресс-гъуллугъи эн гуьруькхоней Догъисту Зоя Амирханове. Э синогъи и гьечи ведини: гьетте мошин э юкевоз диреморени э жигей гирошдеи, гьемме мэгIлуьметире э товун эну вечирени рэгъэмлуь сохде оморигьо комплексгьо – эн автодосмотр. Э и гуьре шофиргьо мидануьт нуьвуьсде хуьшдере эз вэхд зуте э гуьруькхонее назари э интернет платформе кей ишуре воисдени ве оморе э тогIин сохде оморигьо сэгIэт.

Э е гофевоз, эгенер гьевел гуфдире оморембу «серхьэд э килити», имогьой и килит бирени рэгъэмлуь.