Э Миллетлуье бине «Уруссиет» э бирмундеи «Регион-2030. Платформе биёвгьо» зиёд сохдеи келе нушудореи Республике Догъисту. Бинелуье гъозигьоревоз сеимуьн рузе Орине Догъисту бири вохурдеи э серворевоз регионе Сергеем Меликовым.
Э корисохи вохурдеи э гъуногъгьоревоз бирмундеире ве бэхшвегиригьоревоз программе Сергей Меликов ихдилот сохди э товун омборесаллуье везифегьо параменди республике. Э гъэд пуьруьшсохи бири э вэхд ю герек гьисдигьо гъосуьтгьо гуьнжолуьи тозе корисохие жигегьо, параменди тозе энергетике, тозе сохдеи жэгIметие транспорте ве рэхьие тургьоре, имидлуьи хоригуъллугъсохие комплексе, дегиши жирегьо э кор венгесдеи э ТКО ве зиёдсохи сафарие минкинире.
Сервор регионе риз кешири вожиблуьи веровундеи тозе проектгьоре эри гъоимгъувотлуье параменди Догъистуре ве жугьоб дори э пуьрсуьшгьо гушдошдегоргьоре.
Суьфдеи эз угьо: комини у винире республикере э 2030-муьн сал? Сервор Догъисту бирмунди, чуьки бинелуье везифе – эз гурунди гирошде инфраструктурни пес мундеи ве параменд сохде имидлуьи эри регион сэхьиблугъигьоре. Эри гье угьо гъобул сохдеи омборесаллуье социально-экономически параменди те 2030-имуьн сале.
«Комини иму виниреним Догъистуре э 2030-муьн сал? Гъувотлуье, гуьлишонлуь биреие регионевоз, эже гуьнжуьнде оморе дингьо ве гьеймогьоинегьо, эже гьер одоми гьис сохде хуьшдере беделевоз келе ве дусдие хунере. Бинелуье гIошири эн иму – жофохосдеие, гуногъсевение ве кондуьллуье хэлгъ.
Догъистунигьо э гьемме вэхд гъэлхэнди сохде хоригьой эн хуьшдере, вилеет эн хуьшдере ве имбуруз угьо нисе дегиш сохде хуьшдере, вэхуьшде э гъэлхэнди Ватан эн имуре. Догъистуре гьисди омборе минкини эри у, эри чуь э куьнде дегьсали бире жиге кешире бердеи неки эри уруссиетигьо, оммо ве эри гъуногъгьо эри э гьемме жигегьо вилеете»,- риз кешири С.Меликов.
Чуьтам э Догъисту гъэрор норе оморе четинигьо э жэгIметие транспортевоз?
«Лап омборе гъэдер маршруткегьо гьисди э зобуне технически овхьолет, зобуне овхьолет поисдеигьо.
Войне екини: гьеммей транспортни тегьер, комики огол зере омори кор сохде эри одомигьо, гирошди э дес сэхьибдоргьо, комики варасире, чуьки гъимет э суьфдеи нубот биё бу фуьрсоре э технически гуьрдеи гъэд транспорте ве хуб сохдеи поисдеигьоре».
Суьфде, чуьки иму сер гуьрденим сохде, – гье у э гуьнжо овурде муниципальни ве хьуькуьмлуье корхонегьоре. Имбуруз угьо кор сохде э Махачкале ве Дербенд. Иму рафденим э рэхьгьо гуьрдноме транспортни иловле э гьемме мундигьо шегьергьо, оммо песде мигирорим эки э гуьнжо овурдеи гIэреймуниципальни ве гIэрейшегьерие коргьо. Имуре нисди екейгее рэхь, эзуш бэгъэй чуьтам корисохдеи эсер гъонун».
Гьемчуьн хэбер дори э товун барасигьо гировунде оморе коргьо:
Хоригъуллугъсохие комплексе – локомотив догъистуние экономике
Сергей Меликов э гъэд вокурдеие гоф сохдеи дуь одоми гуфдири э товун имидлуьигьо хоригъуллугъсохие беделе.
Э песой гирошдигьо сал зурие зевер биреи молгьоре хозяйствой дигьбони гуьнжуьнди 106,1%. Догъисту дарафди э дегьигьо серворгьо э гъэд регионгьо Уруссиет. Гье у бараси бири лап гьуьндуьр э песой песини дегьсали, оммо жэгIмие доруние гъэдер молгьоре хозяйствой дигьбони зевер бири э 252 млрд монет .
Сервор регионе бирмунди бинелуье рэхьгьо, эже веровунде дуьруьжде инвестпроектгьоре: богъдори, онгурдории, молгъэредори, дунедори.
«Фикир сохденум, э сер у кумекии, комики иму дореним бизнесменгьоре, Догъисту куьнде салгьо мибу серворевоз неки уруссиетие, оммо ве гIэрейхэлгъие риз гъэдерлуьи э сер корхонегьо хоригъуллугъсохие молгьо»,- риз кешири сервор регионе.
Тигъэти дори рэхьбер субъекте ве молгъэредори. Сеимуьн сал дуь э песой еки э республике гировунде оморе Гьеммейуруссиети бирмундеи гуспендгьо, эже бире дегиши хубе синогъиревоз регионгьоре.
«Имбуруз гусбенддошди э республике рафди расири гьуьндуьре бирмунушигьоре. Лезет догъистуние гуспендгьо мэгIлуьми гьеммей вилеете. Молгьой эн имуревоз мерэгълуь бире ве эз серхьэд эулое хьовиргьо. Оммо гьеле гьисди пуьрсуьшгьо э дегиш сохдеиревоз гушде ве пешме. Унегуьре иму фуьрсореним зиёдгъувотлуьи э гуьнжолуьи дегиши сохдение корхонегьо, эри чуь э Догъисту бире пуре е гъэдер эз веровундеи те дегиши»,- бирмунди Сергей Меликов.
Сервор Догъисту согъбоши гуфдиреи федеральни бинере э песой кумекии веровундеи дуьруьжде проектгьоре.
Зуте регион вегуьрди инфраструктурни бюджетни гъэрхунди эри вокурдеи тов гIовире «Чиркей-Махачкале-Каспийск». Гье у проект лап вожиблуьи, у миду темизе гьенжирее гIове те 1,5 миллионгьо одоми ве юк сохде екейгегьо гIовие овгъотгьоре.
ГьейсэгIэт э омборте гъэдер тов гIовире товгьо уже норе омори,
рафде вокурдеи технически дуьруьжде вокурдеигьо, комики мибу э жиге овурде дореи гIове. Бегьем сохдеи вокурдеире э пушо нори э эхир 2026-муьн сале. Эзуш бэгъэй, Догъистуре дори инфраструктурни бюджетни гъэрд э 6,86 млрд монет эри вокурдеи тов гIовире эз Каспийск те Избербаше дуразовуне гировундеи 46 км.
У риз кешири, чуьки ижире кумекии эз лой федеральни идорегьо хьуькуьме эсер жире-бе-жирее рэхьгьо Догъисту гьич вэхд зуте нисе вегуьрди. «Хуьшдение суьзе кумекии Владимире Владимировиче Путине иму э и везифегьоревоз нисе дануьсде гъэрор норе»,- гуфдири С.Меликов.
Сервор Догъисту гуфдири э товун биёвгьо сафарие корисохи.
«Гьелбетте, войге сохденим, эри гузети эз параменди сафарире бире ижире, чуьки иму виниреним э Турцие, Эмирати, Египте. Унжо гьемите сер гуьрди эз гьичиш. Лап войге сохденим эри чуь Каспийски гъирогъ Догъистуре бире ижире рач, чуьтам ве объектгьо сафарие инфраструктуре,комикигьо эри уруссиетие одомигьо э песой песини дуь дегьсали бири варасирение тегьер эз серхьэд эулое»,– гуфдири рэхьбер республике.
У бирмунди, чуьки э Догъисту желди вокурде оморе гъуногъие хунегьо, дуьруьжде гъуногъхонегьо, веровунде оморе келе проектгьо эсер гуьнжолуьи
Каспийски гъирогъие гуьрдномере.
«Имуре э гьевелине сал доруние гъэдер сафарие оморегоргьо рафди расири 1,8 миллионгьо. Иму гуфдиреним э товун у гъэдер, комики бирмунде омори. Оммо гьисди автосафари, гьисди нисе э гуьнжо овурде жире омореи э Догъисту. Гье у гъэдер гьеммише зевер бире, ве э и сал оморегоргьо бири дуь миллион»,– эрзо нуьвуьсди С.Меликов.
Вокурдеи объекторе тозеден сохдеие энергетике – еки эз бинелуье молгьо вогошдеи зевер бирение гьити электроэнергие э Догъисту, эрзо нуьвуьсди сервор Догъисту, жугьоб доре э пуьрсуьш журналисте.
Сервор республике риз кешири, чуьки зевербиреи хэржисохигьо электроэнергие бесде оморе э промышленни парамендиревоз, хунеие вокурдеиревоз, параменди сафариревоз, гьемчуьн э ведебердеиревоз эз «бузе жиге» дореи электричестве э корхонегьо ве э омборехунее хунегьо.
Э сер кумекии федеральни бине уже э кор венгесде омори программе тозеден вокурдеи энергосистеме Догъистуре те 2036-муьн сале.
«Уже э кор венгесде омори проект программе тозеден вокурдеи энергосистеме Догъистуре те 2036-имуьн сале. ГьейсэгIэт гье у программе гирошде фегьмсохи»,– гуфдири С.Меликов.
Сервор регионе боворини дори, чуьки гьеммишеине кор гьишде эз гурунди гирошде энергетически кризисе.
Чуьтам вокурде оморе хокоруре бэхшсохдеие комплексгьо дегиш мисоху жире э кор венгесдеигьоре э ТКО э Догъисту?
Гьемметарафлуье кор берде оморе эз 2021-муьн сале. Гьемме сер гуьрди эз дузетмиши жигеие жире э кор венгесдеи э хокоруревоз. Э 2023-имуьн э рен тозеден вокурдеи чор дуруьжде нисе гьишдеие жиге эри хокору э Каспийске, Буйнакске ве Южно-Сухокумске. Гье у гьишди нисд сохде дегьсалине вечиреигьоре заралигьоре э иловле.
Бегьем сохде омори вокурдеи гьеймогьоине жиге гъоврегьо э Кумторкалински районе гъувотлуьиревоз 300 гьозор тонн э сал ю эри хокоругьо, нисе гIэмелие эки э кор венгесдеи. Э е гъэдер мескен республике зиёд сохдеи вокурдеи гене дуь полигонгьоре. Ве вожиблуьи – гье у се хокоруре бэхшсохдеие гуьрдноме, комики вокурде оморе э Карабудахкентски, Дербентски ве Хасавюртовски районгьо.
Угьо бегьем те эхир дегиш мисоху гъозиере: веди бире жире, комики гьевель не бири э республике.Гье у гуьрдлемегьо миду садпроценти бэхшсохдеи гьемме гьисдигьо э Догъисту хокоругьоре.
Гуфдире э товун е гъэдер вэхде, сервор регионе мэгIлуьм сохди, дешендеи се гуьрдномегьоре везифе нори э 2026-муьн сал.Э сер эну у зиёд сохдеи, чуьки еки энжегь корхонегьо вес нисди эри пуре гъэрорноме хокоруе четинигьоре, чуьнки мунде пуьрсуьшгьо э контейнерни жигегьоревоз.
Мистрое республике гъэдэгъэ зери нисе гъобул сохде проектгьоре вокурдеи хунегьоре, комикигьоре нисди контейнерни жигегьо эри хокору.
Бегьем бири гофсохдеи э серворевоз Догъистуре гъосуьтевоз корсохдегоре политике. С.Меликов эрзо нуьвуьсди э товун не гьишдеи норе э жугьобдорлуье кор сенигIэткорсуьзгьоре.
Сервор регионе бирмундеи тигьэте э корсохдегоре вес нисди э вокурдеи, энергетике, соводи ве спорте.
«Иму э песой се сал вокурдейм эки сад школгьо – гье у талаб сохде тозе тербиедорегоргьоре. Э спорт гъозие ухшешие: республике гьисди спортивни, оммо тербиедорегоргьо вес нисди»,– гуфдири сервор республике.
Эри гъэрорноре и четинигьоре республике гьемкоркии сохде э мэгIлуьмлуье вузгьоревоз.
Бинелуье гъэдеревоз эри нореи э кор, риз кешири сервор республике, биё бу сенигIэткори ве синогъи сенигIэткоргьоре, нисе хуьшдение бофолуьи.
Бирмунденим, гьемме и рузгьо бирмундеие жиге республике – гьэгъигъэтлуье бине кешире бердеи, комики гьисди бесдеи гIошире торихе э вожиблуье везифегьоревоз э биёвгьо. Архитектурни чигьрет эну, комики хьэвес гъэдимие сенгъгьоревоз, ве мэгIэнолуь биреие дингьо огол зере мерэгъ серкеширегоргьоре. Гъуногъгьо шинох бири э культуреревоз ве торихевоз Догъистуре, дэгIэме винири миллетлуье жирей хуреггьо, бэхшвегири сохди э мастер-классгьо э динлуье усдоетигьоревоз.
Бинелуье беделгьоревоз бирмундеире бири:
нишоне биёвгьо Каспийски гъирогъие гуьрдномере – серворие жиге форигъэтие проекте вилеете;
интерактивни карте э бинелуье сафарие рэхьгьоревоз ве промышленни корхонегьоревоз;
VR-жиге, эже гъуногъгьо мидану бегьем сохде сафари э 17 сафарие рэхьгьо Догъисту;
нушудореи шеш бинелуье серворе проектгьо, желди веровунде оморе э республике, ве имидигьо параменди гIэрейхэлгъие транспортни сироре «Софун – Дорум»;
хэлгъие хьэёт э молгьоревоз мэгIлуьмлуье хэлгъие ветэгъэгьоревоз: балхарски керамикеревоз ве коргьоревоз кубачински усдогьоревоз;
жейлее инсталляци – барельефе э ёр 80-салие Бараси ве стилизованни гъэлече Гоор.
Культурни программе суьфдеи рузгьо республике бири очугълуье: автограф-сессие э мэгIлуьмлуье догъистуние спортсменгьоревоз, барасибергьоревоз вилеете ве Европе ве гала-консерт «Догъисту эн ме – Уруссиет эн ме» э бирмундеигьоревоз мэгIлуьмлуье возирегоргьоревоз ве гуьнжуьнде оморе чие десдегьоревоз. Орине Догъисту дураз сохде э Миллетлуье бине «Уруссиет» (павильон №75 э ВДНХ, 2 тебэгъэ) те 7 сентябрь. Гъуногъгьоре гузет сохде нушудореи гуьрдлемере «Каспий», эгъуьллуье возигьо, конкурсгьо ве екейгегьо желдигьо. Бирмундеи вокурде эри сер кеширеи гьер руз эз 10:00 те 20:00, эзуш бэгъэй дуьшоббот.
