Бинелуье гъонунгьой несигIэтдореи сер гуьрде оморени э кифлет. Кифлетлуье несигIэтдореи – и гурунде кори. Э сер эну кори сохдени чигьрет хосиет эн деде-бебегьо, жунсогъи эн ггIэилгьо ве эн деде-бебегьо, социальни овхьолет, жирей зиндегуни. Гьэгъигъэт деде-бебегьоре чуьн суьфдеи несигIэдорегоргьоре гьисди келе корисохи э сер гIэилгьо. Игид имуре келе сохди хубе деде ве бебе, гье гьечуь у келе сохди гIэилгьой хуьшдере ве несигIэт дорени хундегоргьой хуьшдере. Имбуруз ме гоф сохденуьм э раче зеневоз, эгъуьлменде ве соводлуье одомиревоз: Изабелле Львовне Ягудаевевоз.
— Комини зеверие соводие идорере ишму хунде варасдейт? Эже гьейсэгIэт кор сохденит?
— Хунде варасдем Догъистонлуье тербиедоренигьо зеверие соводие идорере. Гьемме вэгIэдо кор сохдебируьм э гIэилгьоревоз. ГьейсэгIэт ме э пенсиеюм ве кор сохденуьм э жугьурие парамед биренигьо меркез «Эстер» э Москов тербиедорегор эн тешколее несигIэтдореи.
— Нине Гавриловне Шатилове – духдир эз Худои, духдир э келе гIэсуьллуье дуьлевоз – дедей ишмуни. Ихдилот сохит э хундегоргьой иму э товун эну: кейки хьэсуьл омори комини зеверие соводие идорере хунди варасди, эже ве чуь кор сохдембу.
— Дедей ме хьэсуьл омори э 1926-муьн сал, эз гIэрей зиндегуни рафди э 1981-муьн сал 55 сале биренки. Деде хунди варасди Догъистонлуье медицински зеверие соводие идорере э 1946-муьн сал. У вихди лап вожиблуье сенигIэт: хирургие. Дирте у вегуьрди сенигIэт онкологе. Песини салгьо кор сохдембу э ВТЕК. Гьемме кутэхьэ зиндегуни хуьшдере деде зигьисдембу ве кор сохдембу э Дербенд. Хэйф, деде ве бебей дедере, иму, невегьо не винирейм. Бебейхолу, Гавриил Пинхасов, бу суьфдеи э гIэрей жугьургьой догъи гIилмчи-агроном.
— Ме боворининуьм, ки Нине Гавриловнере – одомире, сенигIэт комики талаб сохдени хуьшдере дореи ве мугьбет эки одомигьо, — бирембуге э синогъи мерэгълуье гъозие-гъэдергьо. Миданит э ер овурде гьерчуь бисдо мерэгълуьире?
— Деде экуьнди больнице зигьисдембу ве эгенер бирембу четине овхьолетгьо, умогьой э песой эну оморембируьт дим-дуз э хуне. Умогьой имуре э хуне телефон небу. Е гиле дедере бердебируьт э четине операцие эз гIэруьси ю. Еки эз суьфдеи операцие бэгъдовой хунде варасдеи институте – лап сегьмлуье гъозиеи, кейки шуьгъэм одомире лов тум сохди сенгъгьой есиев. Оммо деде э и коревоз э рэхь рафди, операцие барасилуь гирошди, ве нечогъ эну зинде мунди.
— Дедей ишму игидлуье зени, сенигIэтлуье синогълуье духдир. Хэйф, ки у гьечи зу рафди эз гIэрей зиндегуни: гьеле э ченд одомигьо у мидануьст кумеки сохде, чендгъэдоргьоре мидануьст зинде сохде. Ихдилот сохит э товун бебей ишму.
— Бебей ме, Лев Абрамович Шатилов, эз гIэрей зиндегуни рафди э 2016-муьн сал, у вэхд у э Исроил зигьисдембу. У кор сохдембу техник-рентгенолог. Рентген-кабинет, умогьой е тек э Дербенд, дебу э куче э нум Ленин ве эн мэхьэле Карла Маркс. Ве дирте вокурде оморебу тозе больнице ве гьемме гировунде оморебу э унжо. Рафди э пенсие. Оммо э пушой рафдеи э Исроил у екем вэгIэдо кор сохдембу э унжо.
— Екем ихдилот сохит э товун кифлет эн деде ве бебе.
— Э кифлет иму се гIэили. Хэгьер Зоя гьемчуьн хунди варасди тербиедоренигьо зеверие соводие идорере ве кор сохдембу э школе тербиедорегор эн английски зугьун. Бирор хунди варасди Московски электротехнически зеверие соводие идорере. Деде ве бебей иму имуре лап хубе несиет дорет, ве минкин вегуьрде зеверие соводире, эри эни келе согъбоши эзугьо. Угьо сохдет кифлет имуре гъэлече ве бине эн биевгьой имуре.
— Ве имогьой екем э товун гIэилгьой туь.
— Мере се гIэили. Дуьдуь зигьисдени э Исроил, келеи – э Москов. Гьемме гIэилгьой ме эгъуьлменди ве соводлуьнуьт. Иму э шуьверевоз э угьоревоз эрклуь биреним.
— Э комини жигеи дин э зиндегуни ишму?
— Дин э зиндегуни ме лап вожблуьни. Э кифлет иму гьеммише гировунде оморембу гьемме мигIидгьой жугьургьо ве дошде оморембу гьемме гIэдотгьо. Э ер ме лап хуб мунди, чуьтам келебебейме эз тараф бебе тефило хундембу. Чуьтам иму уре гузет сохдембирим эз нумаз э шоббот, чуьнки гьеммейки гьееки нуьшим э сер шуьлхон. Э ер ме мунди пасхальни седер ве раче хундеи эн келебебейме э Песах (те имогьоиш хьисоб сохденуьм, ки гьечи рач екиш нисе хундембу). Суьфдеи шев у хундембу э иврит, дуьимуьн э жугьури ве гьеммере э пура тегьеревоз андуьрмимш сохдембу.
— Чуьтам фикир сохденит ишму эзже вегуьрде гъувоте хэлгъ иму?
— Эз еклуьг биреи ве дошдеи гIэдотгьоре.
Нуьвуьсди Стела Давыдова
Тержуьме сохди Ильягуева А.
