Догъисту норе гьемме тозелуье дуьруьжде барасигьо э гъобулсохи гъуногъгьо эз еккейгегьо регионгьо дусдие вилеет. Республике эн иму э хуьшде вогосунде сафарчигьоре жирелуье тебиетие гlошире культуревоз ве нерме гьоворевоз. И пушогьо иму бегьем сохде гьеминоние вэхд ве вокурде тозелуье – поизи. Омборе сафарчигьо воисде гъуногъ бире э Догъисту тьэгъигъэт поизи, эхи берхити вэхд э иму дураз кешире те зимисду. Э гье у вэхд гlэмел миёв гешде э Самурски више ве рафде э вечиреи фундугъ ве гъэребече э Табасарански район, эз дивэгl жун гирошде гьовой хори куьгьне Дербенте ве шинох бире э жирелуье хэлгъие усдоетигьоревоз Балхаре, Кубачи ве Унцукуле. Хьэйрон бире э лап келе Сулакски Каньоневоз ве екем дэгlэме дире э сур расире килитлеме гъумлуье догъе Сары-Кум – бичоре шуморде, чуь Догъисту дануьсде э пушо норе сафарчире. Эн иму гlэжоиблуье улке гlуьзетлуьи шекуьлевоз, оммо ве гъуногълуиревоз, жире-бе-жирее культуревоз ве зугьуноревоз ве, гъелбетте, лезетлуье жирей хурег миллетлуье хурекхонеровоз. Э гьер салевоз иму э пушо норе эри сафарчигьо гьемме хубе ве секонесуьзе жигегьо. Лап келе кор параменди гье уре доре вокурдеи Каспийски экуьнди гъирогъ гуьрдноме э гъэд федеральни проекте «Пенж дерьёгьгьо ве дерьёгьче Байкал», тогlин сохдеие Серворевоз Уруссиете Владимиром Владимировичем Путиным. Догъистуние гъуногълуьи бире гъоимгъвотлуье бирмунушие фикиревоз, иму гье уревоз лап сикеи сохде ве зиед сохдеи гьемме эри у, эри чуь диеш омборте гъуногъгьо берде э хуьшдеревоз герме ёрбиёри э товун зиёдгуьзелие улкей эн иму. Гьеммише оморемун ишму э поизие Догъисту!