Эз сергуьрдеи шишире рафде десдей гъэчэгъгьо э 1999-муьн сал э е гъэдер мескен Догъисту Верзуьшлуье корсох культуре РД, шогьир, нуьвуьсдегор, журналист, лешгерие корреспондент, Эльмира Юнусовна Кожаева гьемме вэхд гировунди э Цумадински ве Ботлихски районгьо, Кадарски жиге, э Новолакски район.

Овурденим торихлуье ёрбиёри э товун гъозиегьо, кимигьо коргьоре нисе бири бирмунде э СМИ.

Эльмира Кожаева э1999-муьн сал бири лешгерие корреспондент эз республикански жэгlмие-политически гьероринеи «Дофусхоне гозит «Жовонгьо Догъисту» ве гъобул сохде желдлуье бэхшвегири э бирмундеи гьовкендеи гъэчэгъгьоре э догъие бедел Догъисту, э Цумадински, Ботлихски, ве Новолакски районгьо. У гъисди эз сергуьрдеи бэхьсе-бэхьс э женгевоз э Цумадински ве Ботлихски районгьо ве гировунди дузе репартажгьо э дофусхоне. «Жовонгьо Догъисту» эз бенд бесдеи э кент Ботлих. Эльмира Юнусовна нуьвуьсди книге «1999-муьн сал э чумгьой гозитчиревоз» э комики бирмунде гъозигьо герме июль-август 1999-муьн сале, гьемчуьн гьовкендеи гъэчэгъгьо э е гъэдер мескен Новолакски районе ве бегем темиз сохде эз вахабитгьо Кадарски жиге, кент Карамахи -Чабанмахи. Э эхири бедел книг — репартажгьо эз Чеченски Республике. Ю хуьшдени нуьвуьсдегор гьемчуьн э кор венгесде довгlоие мэгlлуьмети Минобороны РФ, МВД Уруссиет э РД, гьемчуьн э шогьод дореи дирегоргьо гъозиегьоре.

Шинох сохдеи ишмуре е кесег эз книг, комики бирмунде э товун чуь гоф не сохди э у терслуье сал.

Чуькле шеш сале кук, э лап келе кроссовкогьоревоз нуьшде э вачаруьсде хуне, комики лов сохде омори дуь орине песово зулумкорисохдегоргьоревоз. Кук нуьшди э тилиш бетоне ве гирисди. Белки, кук инжо бебе-дедере вир сохди.

-Не гирис, не гирис — хьэрекети венорем эри динж сохде лап сэхд гирисдение куке.

У э гужевоз гуфдири э кумыкски зугьун:

-Э и жиге, э суьфдеи тебэгъэ хьовир зигьисди, Тагир. Иму э уревоз э богьчей гlэили рафдейм, ве возире э хуней эн угьо. Дедей эн у, холей Вазипат, имуре гъич вэхд нисе женг гуьрде, эгенер иму нединжи сохдейм. Э унжо ме зигьисденум э дедей ве хэгьер Зулей меревоз, — у бирмунде чуь мунди эз хуне — диворгьо э келе чэхиревоз ве э буневоз, комики офдоре э гъэд хуне. Э ён нуьшде зен э сиегь парталевоз ве бежид жуьмуьнде энгуьшдевоз четкиоре.

-Гье у дедей мени. У нисе гуш веноре бэгъдовой ловсохи. Гуфдирени, чуьки контузия. Хэгьерлейме гьеле э софхонеи. Э сер эн у шише дарафди. Шишере ведешенди, оммо сере чиреи.

Русик вэхуьшди, туьр-туьр сохди, чуьтам келете мерд ве э догъистуние дин огол зере мере э хуней хуьшде, эри чой гьенжире, комики угьо хьозуьр сохде э гlэтош

Чуьтам бежид бисдо гlэилгьой иму келете.

Эз хуне э Левоневски 3, э ён винире мунде расди ве чепи подъездгьо, э мигле чоле ве очугъ кову асму. Дуьл виз-виз сохде.

У поисде э дуьимуьн тебэгъэ гъуншие пенжтебэгъэе хуне, гьем гуьнжолуье, чуьтам и дуь хуне куьнде эки бине ловсохи зигьисдение хунегьо. Э бине божэхь дери. Хьэшд зенгьо ве се мердгьо гьер руз ёгъинире дануьсдеи нуботноме гъурбунигьо, офдеи жиге дореи одомигьоре ве доре гуманитарни кумекии. Инжо буйнакскигьо, вир сохдегоргьо кифлетгьой хуьшдере, буланмиши кеширегоргьо гъуншие хунегьо.

Э куче э гузети гуманитарни кумекии поисди омборе одомигьо. Гуманитарни кумекиире нисе доре дуь орине эз руз ловсохи. Песде, чуьтам очугъ сохде гье у кумекии оморе энжегь эз республике Догъисту. Чуьтам гуфдире буйнакскигьо, чуьки эз е ченд мошингьо э гуманитарни кумекииревоз, оморе расире э бине энжегъ еки, ве шелей еклуье мошине нисе дануьсде вегуьрде буланмиши кеширегоргьо. Э гуманитарни кумекии дери- гlорд 5 тонн (эри 510 кифлет), е ченд туморе шекер, ешиггьо э помодуревоз, онгуревоз, сермегьо.

Э бине фикир сохде, чуьтам бэхш сохде доре кеме хурекгьоре э одомигьо. Сервор шегьерие хьуькуьм Буйнакске Осман Сунгурович Османов гуфдире:

-Комини гуманитарни кумекии омори, гереки доре одомигьоре э нуботномеревоз.

Дузи сохде, чуьки помодургьоре ве онгуре бэхш сохде доре одомигьоре. Не денишире буйругъи эн мере. Гьеммере э нуботноме бэхш сохде дореи. Имбуруз-себэхь оморе пулгьой гlэилие ве пенсигьо. Угьоре бэхш сохде доре гъурбунигьоре э се мегь пушо. Не денишире тейте МЧС ве хьуькуьм Уруссиет доре имуре чуьниге, эз хьуькуьм республике омори 3,5 миллион монет э евэхдлуье пулдореи, т.е компенсаци э 10 мегьине муьзд жофои — 732 монет. Э корисохи дешенде э гьер одоми э кифлет 18 кв. метр — э корисохи сохди э зир 2 гьозор 132 монет 00 кепик.

Гьеммере гье у жовоние сервор Буйнакске гуфдире, э гьемме бири асант.

Зенгьо хьэрой сохде, мердгьо бегенмиш сохде, гье у вэхд ме бешпингъоли зере э фотоаппаратовоз. Гьемме хуьшдере вешенде, зенгьо гуфдире «Бисмиллах». Екире эз угьо сер гуьрде гъэгьрегуние гирисдеи. Корисохи э гьеммееки товуш э фотоаппаратевоз. Бегъдовой гье у руз одомигьо терсире некумие товуше, некумие сесгьо, шевгьо бегъем те эхир нисе хисире. Гьенжире омборе дерму эри динжи. Эри гьемме одомигьо эз и хунегьо хьуькуьм шегьере дори богьчей гlэили эри зигьисде э 150 жиге. Гьемме одомигьоре берди э хунегьой эн хуьшде гъовумгьо.

Э куче одомигьо бири омборте эз себэхь. Угьо мере ведабурра иловлере.

Хьэрой сохди эз е гъэдер одоми пенсионерке Айшат Магомедова, дуь кук эн у ополченцигьо, шувергьо эн духдергьо э довгlо:

Ишму журналистгьои. Оморенит инжо, иму э ишму ихдилот сохденим чуьтам гьисди, оммо ишму бирмунденит ве нуьвуьсденит, чуьки гьемме хуб бири. Ишму дануьсдени, чуьки эз руз ловсохи гъичиш дегиш не бири.

Иму нисе вегуьрде е жиреш гуманитарни кумекии. Хуби, чуьки еки эз духдергьой эн ме зигьисде э Махачкеле, у берди имуре эки хуьшде.

Айшат бирмунде пенжтебэгъэ хунере, эки ловсохие хуне-гье у хуне, вокурде омори э 1970-муьн сал, имбуруз нисе гlэмел гъисдигьо эри зигьисде. Э иму гуфдирет, чуьки

хуней эн имуре миё бу гъуьчсохде.

Оммо хуне эже вокурде омори штаб, эже нисди гьичиш, гуфдире гереки вечаруьнде.

Эри чуь и комиссие вокурде штабе э хуне эже гереки уре вечаруьнде.

Эйчуь ижире бедбихьисоби? Ки жугъоб доре, Ельцин енебуге Магомед-Али?

Комиссие, комики эз Москов омори, биё жугъоб доре. Эз дуь руз бэгъдовой ловсохи угьо веди бире инжо, гуфдире хуней эн имуре гереки вечаруьнде. Эз е рузиге гене и комиссие э лой хуне не денишире гуфдире. Хуне гlэмелие эри зигьисде. Терсире герек нисди, гъуьчсохи мисохим, гlэмел миёв динж зигьисде-гуфдире э хижолети кеширеи Ася Магомедгаджиева,- чуьтам иму динж зигьисде, эгенер иму терсире гьейсэгlэт верафде э тебэгъэ эн хуьшде. Мере гlэилгьои. Ме хуьшдени несигlэтдоре угьоре. Ме унжо нисе дануьсде зигьисде.

Бигьил комиссие зигьисде унжо.

Заур Магомедов, зигьисдегор хуне э рачей биригьо ловсохи:

-Гье бирден бэгъдовой ловсохи омори Магомед-Али Магомедов (Сернуьш Хьуькуьм несиете) гуфдире -гереки вечаруьнде э куьнди гьисдигьо хунегьоре, гереки доре одомигьоре кумекии. Ве рафди. Эз у рузевоз екиш эз нушудорегоргьой республике инжо не бири. Магомед-Али чуьтам бебей республике омори ве динж сохди имуре. Эже кумекии?

Эгенер не гъовумгьо, гьемме одомигьо миё бу мунде э куче.

«Имидлуь бире, чуьки омореи Сергей Шойгу эн иму ве гъэрор норе и четинигьоре»,- гуфдире одомигьо.

Сергея Шойгу догъистунигьоре дануьсде э сер могъбуллуье овхьол, кейки э Догъисту бири терактгьо э Каспийск ве Буйнакск.

Э бараси и ловсохи э Буйнакске телеф бири 64 одомигьо, эз угьо 26 гlэилгьо. Хуне суьз мунде 520 кифлетгьо.