1 сентябрь, э Руз данани, иму дореним бож хьуьрметлуьи мэгlлуьмлуье тербиедорегоргьоре, комигьоки гlуьзет сохди зиндегуни хуьшдере тербие дореи ве соводи дореи вероморение эрхэ.
Э гъэд ижире тербиедорегоргьо бинелуье жиге гуьрдени Ягутил Израилович Мишиев – одоми, эн ки корисохи гьишди фурмуш нисе бирение нушу дореи э торих соводи дореи Догъистуре.
Хьэсуьл омореи э 1927-муьн сал э омборе гlэили кифлет э Азербайджан, Ягутил Мишиев э 16-муьн сал сергуьрди кор тербие дореи, варасдеи шешмегьине хундеи вегуьрдеи э довгlои 1943-муьн сал. Не денишире э жовони гlуьмуьрлугъи, у бири сэхьиб лугъондлуье дананигьо ве тербиедорение усдоетире.
Э 1945-муьн сал Я.И. Мишиев заочно варасди Кубински тербиедорение училище, оммо э 1947-муьн сал лап хуб – Кубински тербиедорение институт, вегуьрде оморе сенигlэт тербиедорегор математике ве физике.
Э 1951-муьн сал Ягутил Мишиев э кифлетевоз гирошди э Дербенд, эже уре гъобул сохди чуьтам гъовуме. Инжо у сергуьрди омборесали корисохи хуьшдере рэхьбери краеведчески музее. Э рэхьбери эну музей бисдо бинелуье мескен культурие зиндегуни шегьер, эже бирмунде бири сейреклуье экспонатгьо, ихдилот сохденигьо э товун торих ве параменди Дербенд. Кучмиш сохдеи э у вэхд омборе гъэдер гlэжоиблуье молгьо э товун торих шегьер, у нуьвуьсди э товун эну е ченд книггьо, э у хьисоб «Рэхь дуразкеши э пенж гьозор сал» ве «Дербенд ве гlуьломие параменди».
Э хьэвес Я.И. Мишиев э шегьер бири э гуьнжо овурде экскурсионие бюро, ве у желдлуье кумеки сохди э хьозуьрлугъи экскурсоводгьоре, бирмундеи э докладгьоревоз ве гировундеи семинаргьо.
Э жерге коргьоревоз э музей Ягутил Мишиев гьич вэхд фурмуш не сохди э товун тербиедорение сенигlэткори. У тербиедори математике э шевине школе корисохе жовонгьо, эже у кор сохди 20 сал, ве миглее школе №11, коминики э 15 сали рэхьберсохи эну бисдо школе кумеки Министерстве хэлгъи соводи Догъисту. Ягутил Израилович бири гьемиге ю хуьшдени нуьвуьсдегор «Уруси-английски гофноме математическигьо термингьо» эри школьникгьо, студентгьо,тербиедорегоргьо ве деде-бебе.
Э песини салгьо зиндегуни хуьшде э шегьер Дербенд (1991-1997) Я.И. Мишиев кор сохди сервори сенигlэткор э шегьери рэхьберисохи хэлгъи соводи. Не денишире э гlуьмуьрлугъи, у мундебу желдлуье, гьемише бири хьозуьр кумеки сохде несиет доре ве мейле гуьрде.
Ягутил Израилович Мишиев – очугълуье меселен инсоне, коминики гlуьзет сохди зиндегуни хуьшдере тербие дореи ве соводи дореи вероморение эрхэ. Эну тербиедорение мэгlрифет, краеведческигьо гешдеи гlилми ве жэгlмиетие корисохи бири гъиметсуьзе омонети э параменди Догъисту.
11-муьн апрель 1997-муьн сал Я.И. Мишиев бири вихде оморе э Республикани Совет ветерангьо довгlо ве жофо.
Уре дори гlуьзетлуье нум «Верзуьшлуье тербиедорегор Республике Догъисту» ве «Верзуьшлуье тербиедорегор Уруссиети Федерацие».
Э товун желдлуье кор э дошдеи ве вэхьзи торихлуь-архитектурнигьо сенгъ ёровурдеи Дербенде у бири бэхшире Дипломевоз 1 степени Министерстве Культури ве ЦК профсоюзе корсохгьо культури РСФСР.
У бэхшире омори медальгьоревоз Ватане, гlуьзетлуье грамотеревоз Догъистуни обком КПСС, гьисди уре омборегъэдерлуье гlуьзетлуье грамотегьо э товун желдлуье кор э тербие дореи вероморение эрхэ.
Я.И. Мишиев хьисоб сохде, чуьки ёр овурдеи э товун гирошде вэхд, э товун зиндегуни келетегьо – гъэрхунди гьерки зигьисдегор. У нуьвуьсди книг «Бинегьо иму», эже дануьсди фегьмгери сохде эн хуьшдени шивдолуь сергуьрдеи эз суьфдеи сесеи XVIII девр.
Э руз данани иму дореним бож хьуьрметлуьи Ягутиле Мишиеве ве гьемме тербиедорегоргьоре, комигьоки жофой хуьшдеревоз ве боворинлуьи кор э гуьнжо овурде биёвгьо вэхд вилеет имуре.
