Сервор Догъисту С.Меликов э жирей онлайн вохурди э рэхьбер эн Федеральни рэхьлуье агенстворевоз э Р.Новиковевоз.
Угьо пуьруьш сохдебируьт э кор венгесдеи миллетлуье проекте «Секонесуьзе ве качественни рэхьгьо», гьемчуьн гъэрорсохдеи вожиблуье везифегьоре э товун параменд сохдеи рэхьлуье сетьгьоре.
Р.Новиков гуфди, ки рэхьгьой республике хубте сохде оморенуьт «Эри 1-муьн январь 2024-муьн сал гъуьч сохде омори 67,5% федеральни рэхьгьо, региональни рэхь – 86,6%, опорни сетьгьо – 74%.
Э нубот хуьшде сервор регион гуфди, ки э имбурузине руз республике веровунди гъуллугъгьой Хьуькуьм Уруссиете э товун гъуьч сохдеи 85% опорни сетьгьоре те 2030-муьн сал.
«Э буьтуьн, э товун гьемме тарафгьо э риз Министерствой мошингьо эн регион Догъисту э 97% гьемме гъэрхундигьо веровунде омори. Худо рази эз Уруссиетлуье рэхьгьой мошингьо ве эз хуьшдени Роман Витальевич эри гъувотдореи Догъистуре э гьемме пуьрсуьшгьо. Гьеммей эни хубе дегишигьо кори сохдени неки э овхьолет рэхьгьо, оммо гьемчуьн зиндегуни гьемватанигьой имуре сохдени хубте»,- гуфди С.Меликов.
Эз мескен Республикей Догъисту гирошдени се федеральни рэхьгьой мошингьо э дурази 688,6 км., эзугьо 111,2 км чорризигьои. Гьонине вэг1эдо параменд сохде оморени федеральни рэхь Р-217 «Кавказ», комики дешенде омори э г1эрейхэлгъие рэхь мошингьо «Софун-Дорум».
Эз 2022-муьн салевоз эзи рэхь гирошдени 31,4 гьозор мошингьо э е шеви-рузи. Гьемчуьн гъуьч сохде оморени рэхь э дурази 88,2 км. Гъуьчсохи сер гуьрде омори э 2023-муьн сал ве э план гуьре денишире оморени ки и коргьо бегьем сохде миев салиге. Коргьо э товун хубте сохдеи рэхьгьоре дураз кешире миев: диеш 74,7км гъуьч сохде миев те эхир 2028-муьн сал.
Се лап мэг1нолуье объектгьой вокурдеи ве хубте сохдеи э регион – и рэхьгьо гирошденигьоэ эз гъирогъ Дербенд, Махачкале ве Хасавюрт. И рэхьгьо э кор венгесде миев э пенжсалине план гуьре эн рэхьлуье корисохи.
Э г1эрегьой миллетлуье проект «Секонесуьзе ве качественни рэхьгьо» пор коргьо гировунде оморебу э 40 объектгьо, гъуьч сохде омори 136 км. региональни ве жигенлуье рэхьлуье сетьгьо. Э 2023-муьн сал регионе доре оморебу диплом эри «За прогресс». Имисал э хотур миллетлуье проект гъуьч сохде миев диеш 53 км.рэхьгьо. Эри эни коргьо доре омори 1,5 млрд монетгьо – чуьтам эз региональни, гьемчуьн эз региональни бюджет.
Эзуш бэгъэй, гьонине вэг1эдо э Догъисту коргьо гировунде оморени э региональни рэхь Манас-Сергокала-Первомайски ве Бабаюрт-Гребенски.
