Сешоббот, 17-муьн тамуз. Офтои элов зере. Еки эз хьуьрметлуье одомигьой жэг1миет дин-дог1оти ихдилот сохди э ме, чуь гъэйгъу у кешири е мегь песово: «Иму винирейм г1этош, ведиреморенигьо эз Нумаз. Иму оморейм эз зевери бедел куче, хьэрекети венорейм дарафде ве хилос сохде сифир Тирогьоре эз ковчег, оммо душверигьо пиш сохдет имуре эз унжо. Бири гировунде жире кор «Гуьрде поюнде», ве угьо терсиребу, чуьки э дорун Нумаз енебуге экуьнди пэхьни бири зулумсохгьо: эхи мэг1луьм небу, эжеки угьо гьисди ве чендгъэдери угьо».
Гирошди дим-дуз е мегь эз руз 17-муьн сиван, кейки бэгъдовой нимесэг1эт одомигьо миест оморе э Нумаз э шегьер Дербенд шишири диреморебируьт радикальни исламски бедхэтосохгьо. Угьо шишири дарафдебируьт э дин-дог1от жигегьой шегьер, куьшдет одомигьоре. Кимигьо эз угьо дануьсди рафде расире те нумаз. Гуниле зере омори э гъэреулчи, ве те оморе расире лешгерчигьо жирелуькор зулумсохгьо сухунди дуьруьжде утогъ нумазе. Диворгьой утогъ бу эз тахте, г1этош зури-зури лов бири ве нисд сохди гьеммере, э у хьисоб омборе книггьоре ве ковчег э дегь сифир Тирогьоревоз.
Чордегь сал пушоте ме бэхш вегуьрдебируьм э межлуьс вокурдеи гье и нумазе. Иму оморейм э жирелуье рейс эз Москов э гьееки э Бинелуье раби Уруссиетевоз р. Берл Лазаревоз, э рэхьбери ве кумекии кире сохде оморени гьемме гьемшегьери жэг1миети дин-дог1оти. Оммо э и орине э тэг1нит 17-муьн тамуз, дим-дуз бэгъдовой си руз гирошдеи эз биг1эдотие сухдеи, р. Б.Лазар фуьрсори мере э хьэрмэхь меревоз, раби Дербендевоз, шалиаховоз р. Овадье Исаковевоз, эри гъовре сохде сифир Тирогьоре, буьзуьрглуье книггьоре ве екиге буьзуьрглуье чигьо. Э хьэёт нумаз иму гъэдиш зерейм э минхе ве хундейм е кесег «Вайхаль», ве песде э одомигьоревоз эз жэг1миет дин-дог1оти рафдейм битехьэимгьой жугьургьо. Э дуьллерзиревоз ве селигъэлуьревоз иму фушендейм э гъовре келе хуьм гиловире э хокистеревоз ве мундеигьо эз г1этош сифиртирогьоревоз, вечире оморигьо эз жигей сухдеи, оммо эки энугьо иму норейм буьзуьрглуье книггьоре ве екиге чигьоре, зарали зере оморигьо э вэхд г1этош.
Раби О.Исаков хосди эз буьзуьрглуье Тиро бэхшлемиши эз нуминей гьемме одомигьой жэг1миети дин-дог1оти, ме хундем гимн «Пуьрсире, сухунде оморигьо г1этошевоз» эз гирьегьой Нуьгьимуьн ава ве е ченд сернегьой Тегилим, ве гьемме кучмиш бирегоргьо вогогьруши сохди э песой эн ме дестон э дестоневоз. Эзуновлейге иму вогошдебирим, э мэхьшоворевоз э товун, эйчуь Худо дегьишди уре – ве э товун буьзуьрге тилисим: э е тек жугьуре зулумсохгьо дегмиш не бири.
Вогошде оморенки эз сер гъоврегьо э нумаз, эже имуре герек бу вегуьрде сифиртироре, овурде оморигьо эз Москов эри гъэдиш зере, ме фикир дорем э раби Исаков: «Вожиби зере гирошде эз ён хуне, эже ишму зигьисдебирить те и гъозие». У шек сохди, веди бу, чуьки уре гъиз-бегъиз сохди жире-бе-жирее гьис, оммо э эхир у рази бири. «Куче Пушкине, 27»…
И гъозие биребу 18 муьн ава: э оморенигьо мегь бегьем мибу дегь сал эз у шев. Раби Овадья Исаков вогошде оморебу э хуне эки зен ве г1эилгьо. Бу нимешев, у ведиремори эз мошин – оммо эз ён уре денишири зулумсох ве ерэгъ шенди эз тапинже. Муьг1уьжуьзевоз гуниле эз дорун жигер гирошди, оммо э дуьл не расири – эже бу гъэлеж зулумсох, комики нисд сохде оморебу е ченд мегь гирошденки. Дирте э келе хурекхурдеи разилуьи хуьшдере нушу дореи, коминире дануьсди норе эри эну р. Б.Лазар, Овадья Исаков ихдилот сохди э товун эну, чуь хижолети сохди у э и четине шев. Э мошин зутее кумеки у берде оморебу э софхоне, ве дир не кешире берде оморебу э Исроил эри хос сохде. Ме вохурдем уре э аэропорт, уре ведеберди эз самолет э чорчуьревоз, ве иму гье бирден бердейм уре э еки эз софхонегьой Исроил. Муьг1уьжуьзлуь раби О.Исаков хос бири, гъувотлуь бири, у диеш шекуьл кеширени, сохдени хьэлолие шхите э Догъисту ве э Москов, сохдени мило. Оммо эри зигьисде э Дербенд у не вогошди.
… «Биёйт веровуним гье у зури-зури»,- тевэгъэ сохди у мере. Ме варасирем гьис энуре, иму ведиреморейм эз мошин, ме дорем уре келе книг Тегилим, эз комики раби Исаков хунди 100-муьн псаломе «Берекетлуьи» ве суьфдеи гиле э зиндегуни жирей гуфдиреи борухо сохди «Борухо сохдеи Туь, Худой имуни, Падшогь дуьньёгьи, сохдигьо эриме тилисим э и жиге!».
Рав Шия Дайч
