Э шогьнишон Республике Татарстан э 15-муьн гиле гирошде гIэрейхэлгъие экономически гуьрдлеме «Уруссиет – Исламски гIуьлом: КазанФорум», комики хьисоб бире бинелуье мейдун экономически кори сохдеи дуь э екиревоз Уруссиетие Федераци ве вилеет исламски гIуьлом. Бинелуье гъосуьт корисохи – «Ихьдибори ве гьемкоркии».
Чуьтам мэгIлуьм сохде сайт догъистоние делегации сервори сохде Сернуьш Хьуькуьм РД Абдулмуслим Абдулмуслимов.
Э программе корисохи дарафди гировундеи гIэрейхэлгъие бизнес-бирмундеи нушу дореи молгьо «Халяль», гьемчуьн омборе гиргинее шуьлхьон ве бэхьс гофи. Гьемме эки 200 корисохи журе-бе жирее веди, э и гъэдер 125 гъосуьтлуье вэхд э бэхшвегири экспертгьо эз уруссиетие регионгьо, вилеет Идоре исламски гьемкоркии ве еккейгегьо вилеет.
Зиреклуье программе гуьрдлеме мибу эхир гьеммере э назар вегуьрде пуьрсуьшгьо гIэрейхэлгъие гьемкоркии исламски пулгьо ве омонети, корхоне халяль, гIилми ве технологи, инфраструктурни параменди, параменди корсохгьо, сафари, куьтуре ве спорте.
Нушудорегор дагестански одомигьо гъобул сохде бэхшвегири э гъосуьтлуье мейдун ве бэхс гофи э профильни рэхь (омонети, промышлени, спорте, сафари, транспорте ве еккейгегьо).
Абдулмуслим Абдулмуслимов ве Сервор Татарстан Рустам Миниханов гъобул сохде бэхшвегири э вокурдеи гIэрейхэлгъие халяльярмарке «Казан Халал Маркет». Инжо э мейдун 5 гьозор кв м нушу доре 4,5 гьозор молгьо: хурекгьо хурек хури, косметике, партал, молгьо эри хуне. Э ярмарке бэхшвегири сохде 72 компани э и гъэдер 15 эз Турции, Иране, Азербаджане, Казахстане, Киргизии. Мейдун ярмарке бири хьозуьр сохде э кумекие тэгIрифноме Комитете халяль. Э пушой вокурдеи муфтий Татарстане хунди Коране.
Абдулмуслим Абдулмуслимов дори Рустаму Миниханову келе шолум эз Сервор Догъисту Сергея Меликова ве огол зере уре оморе э республике.
А.Абдулмуслимов вохурде э рэхьберевоз агропромышлени бохчей «Казань» Олегом Власовым. Э вэхд гешдеи э агропарк эри эну ихдилот сохде э товун коргьо комплексе. Э имбурузине руз э инжо оморе молгьо ве эз Догъисту, э и гъэдер гусбенди ве помодур.
Абдулмуслим Абдулмуслимов ве Олег Власов игърол бесде, чуьки десдей нушудорегоргьо Агропромпарке оморе расире э Догъисту эри бесде игърол э догъистоние хоригъуллугъсохие корсохгьорево, ранжбер-фермерски сэхьиблугъи э товун овурдеи моле, э и гъэдер онгур, гъэйси, помодургьо, гушдине ве шири молгьо.
Агропромышлени бохче «Казань» — омборегъэдерлуье комплекс мейдун 50 гьозор кв метргьо. Инжо гуьрд сохде гьемме технологически коргьо эз хоригъуллугъсохгьо те восдорегор: гъобул сохде дигьбониемолгьо, уре дечире, внире ве фурухде. Инфраструктуре эн Агробохче «сэхд сохде» гереклуьи ве фурухдегоргьо, ве восторегоргьо.
Еки эз бинелуье социальни корисохие комплексе гьисди жофокеши э вэхд гуьре дигьбоние ярмаркгьо.
Абдулмуслим Абдулмуслимов ве премьер-министр Татарстан Алексей песошин пуьруьш сохде пуьрсуьшгьо гьемкоркии дуь республике.
Премьер-министр РД гIуьзет сохде, чуьки Республике Татарстан – еки эз барасилуье параменди регионгьо Уруссиет. Э гофгьо энуревоз, вожиблуье бире гьозие гьисди у, чуьки дуь республике – ислами, гьисди жэгIмие духовно-нравственни гъиметлуьи, унегуьре параменди гьемкоркии э коргьо соводи, культуре ве спорте гереки вегуьрде песдеине гъувот. Эзуш бэгъэй, э гIэрей регионгьо э кор венгесде молфурухи, ве уре везифе норе зиёд сохде.
Эз Догъисту э Татарстан берде дуьшов, гIов, хьэвуьжи, шири ве гушдие молгьо, гьемчуьн велгие шише гьемшегьерие корхоне. Хьозуьр бире зевер сохде овурде ве э пушо норе дигьбонемолгьо лап хубе гъэдер, эзу товун ки гьемме гьисди четини э зиёд кор сохдеирево. Иму э гуьнжо овурдейм корхонегьо эри эну, оммо гьеле кеми эри доруние гъэдер корхоне, э комики ведиреморе корсохгьо эн иму, жейле онгуре, гъэйси, шофтолу. Эриму мибу мерэгълуье вегуьрде синогъи э параменди корхоне гъэлхэндие промышленности, эриму гьисди,чуь гереки хунде»,- гуфдире Сернуьш Хьуькуьм РД.
Алексей Песошин жугьоб доре, чуьки Догъисту – вожиблуье хьэрмэхь эри Татарстан. Догьисту гьисди бэхшвегир корисохи, гирошденигьо э Республике Татарстан, э коргьо соводи ве гIилми, э кор сафари, э дошдеи жунсогъире. Гировуьнде коргьо э гьемкоркии э зевербиреи сенигIэткорлуье гIилмие корсохгьо. Регион эн иму бэхшвегири сохде э гьер салине корисохи – риз кешире Сервор РТ.
Жейле гуфдире э товун гьемкоркии э кор АПК. Агробохче «Казан» хьозуьри эри доре фурухдение жиге эри фурухдеи догъистоние молгьо. Э вохурдеи гуфдире э товун зевер биреи э гьемкоркии э мошинвокурдеи ве вокурдеи.
