13-муьн май э иловле кифлет нушу дори 75-муьн сали хьэсуьл омореи, зигьисдегор Хадере Ноа Ишай. Омборте нушудорегор догъи-жугьурии жэгIмиет дин-догIоти Хадере (ве не энжэгъ эри энугьо) хуб шинох гьисди нум э у сечсохдение зен. Иму чендгъэдерие нуьвуьсдейм э товун Ное ве эри шуьвер эну Ариэле, комигьоки омборе кор сохди эри мэгIлуьмлуьи сохде кавкази жугьуригьоре э Исроил.
Омборе салгьо Ноа кор сохди э рэхьбери проектгьо э кавказии жэгIмиет дин-догIоти эки жейлее отдел абсорбции Хадере. Гье у жейлее отдел веровунди унгъэдер, Чуь гIэмел миёв ведешенде документали фильм енебуге гуьрд сохде гурундетегьерлуье книг-сиротгьоревоз.
ЖэгIметлуье корисохи ве журналистике кори Ноа сергуьрди мерэгълуьи сохде гьеле те рафде э Исроил, эжеки у рафди э 25-муьн сали гIуьмуьрлугъи э 1974-муьн сал. У варасди дербенди станковокурдеи техникум, э вэхдгирошдеи пенж сали бири э кор не дебиреи корреспондент гозит «ГIэлем коммунизме».
Э 1987-муьн сал Ноа варасди Жугьурии университет э Иерусалим э сенигIэт э иранистике. Э дуразовуне гировундеи 10 сал у кор сохди э жейлее отдел вэхьзи Министерсво де вилеетиге коргьо, эже корсохгьо эну бири профессоргьо Михаэль Занд ве Мордехай Альтшулер.
Кейки Ариэль Ишай э 1992-муьн сал бине дешенди амуту «Говлеи», у тевэгъэ сохди зен хуьшде, коминики у вэхд жофо кешири инженерии э лешгерии завод, гьишде кор хуьшдере ве кумеки сохде эн хуьшдеи гъовумлуье жэгIмиет дин-догIоти. У бири вэхд Келе Алии, кейки сергуьрди жэгIмитегьерие рафдеи э де вилеетиге жугьуригьоре эз вилеетгьо СНГ ененге эз Кавказ. Ноа бири сервори редактори альманаха «Говлеи», редактори радигьо «Коль Исраэль» э жугьурии. Гье у гьисди биненорегор догъи-жугьурии театр «Говлеи» (гьеймогьой «Рамбам»). Когъозгьо гьемме литераторгьо эз жире-бе-жирее вилеетгьо гIуьлом, чуь гъобул сохди бэхшвегири э у альманах, те имогьоиш дошдеи э кифлетлуье идорей дошдеи кифлет Ишай. Э 1992-муьн сал у бири нушудорегор гIэрейхэлгъие гуьрдлеме «Догъи жугьуригьо», гирошде оморигьо э Иерусалим, э у гъобул сохди бэхшвегири ведироморигьо эз Кавказ эз жире-бе-жирее вилеет гIуьлом.
Ноа – сечсохдение зен, деде чор куки. Э товун гIэруьсгьо хуьшде у текебурлуь гуфдирени;
«Мере гьисди чор зиёдгуьзелие духдергьо».
Хьуьрметлуье Ноа, 75-муьн сали юбилей эн туь гъисмет бири э Руз Михьтожсуьзи Исроиле, ишму экуьнди той еки. Шолуми ве гуьлишолуьи кифлет ишмуре ве гьемме хэлгъ жугьурии. Муьхькемлуье эри туь жунсогъи бугьолуье эн иму, мун гьеммише ижире желдлуь, шоре зиндегуни ве ёгъинлуь!
