Э гирошдигьо мегь, э вэхд гировунде мигIид Хануки, э Офаким гирошди хушхьолсохи концерт э кумекии Гъушун гъэлхэнди Исроиле ве зигьисдегьор шегьер, э гъэд коминики бэхшвегири бири мэгIлуьмлуьие мэгIнихундегоргьо: Алекандр Авдалимов, Полине Питарова, Игорь Ашуров. Унжо бире суьфдеи бо бирмундеи зигьисдегоре Ор-Акиви, зиреклуье, шогьире Викторе Кукулиеве. Жирей хосиетлуьи гьово зере, мэгIни хунде жогьиле мэгIнихундегоре гье бирден хьэз омори томошесохдегоргьоре. Э товун гьен у гIэмел миёв дивун доре э чеке-чек зереи угьорею.

Ме дануьсдем пуьрсире е ченд пуьрсуьшгьо э Викторе Кукулиев, ве у хьэвеслуь жугьоб дори.

— Виктор, э гIэдот интервью сергуьрдени эз шинох биреи. Екем ихдилот сох э товун хуьшде.

— Ме зенде оморем э 1983-муьн сал э шегьер Дербенд э кифлет омборе гIэилгьоревоз. Деде-бебе эн ме, Славик-Сергей Куклиев ве Полине, э духдери Шамилови, гъовум-гъэрдеш эз ведилуье догьи-жуьгуьригьо кифлетгьо. Те у вэгIэдо тейте рафде эз вилеет э 1993-муьн сал бебей эн ме кор сохди э вокурде оморение-гъуьчсохи компани, дедейме бу бике доллок. Кифлет деде зигьисди э Махачкале. Эз 11-муьн сал у сенигIэткорлуье хундеи асант атлетике, вомухунде бири э Вишнем Волочке Калинински (гьеймогьой Тверски) ульке, не ебо вегуьрди суьфдеи ве бэхшигьо жигегьо э бэхьсбердеи, оммо кейки эри эну биреки 19-муьн сал, келедеде гуфдири: «Кавкази духдер э гьу гIуьмуьрлугъи биё вадарафде э шуьвер, гьечуь чуьки вэхд омори эри оморе э хуне». Бебейме эз гIэили хосде мэгIнихунде, уре бу лап хубе гушдошдеи. У возири э сер гитаре, э у гуьре хуте бири хуьшденкордани. Имуре э кифлет чор куки: келеи бирор Борис кор сохде инженери, э песой эну оморенуьм ме, сеимуьн, Альберт, гьемигеш инженери, ве чуьклеи бирор, Герман, гьемиге чуьтам ме зиреклуье корсох. Гьемме иму э гъушун гъуллугъ бегьем сохде, ме ве гьейсэгIэт гьисдуьм э милуиме (огол зери э хьозуьри гъуллугъсохи) э софун вилеет. Э салгьой школе ме мерэгълуьи жире-бе-жирее тегьер спорт: сергуьрдем гьеле э Дербенд ушу, эзуновлейге, зигьисдеки э Ор-Акиве боксом, дирте гьеле мерэгълуь бирем э ижире вози, чуьн гольф. Унегуьре, огол зереки э гъушун, рафдем гъуллугъ сохде э гъовхо бедел. Э гьонине вэхд ме кор сохде э вокурде оморение кампани «Рами Швиро», коминики вокурдени буьлуьнде хуне э гьемме вилеет.

— Чуь эри туь мэгIлуьми э товун бебе-келебебе эн хуьшде ве шивдолуье кифлет?

Бебе-келебебе дедейме те гъолхмиши бири лап гIошир: келеи келебебе, дедейме, Шоул, келе бебе Шемей ве келебебе Арон бу сэхьиб дуь дуьтебэгъэие хуне э куче Таги-Заде (Келе-Куче), чуь зеверте нумаз «Келе-Нумаз», дуь туку, гьемиге богъэ-онгурдор ве богъгьо э гъэд коминики жофо кешири зиёдте 300 одоми. Гьемме гье у эри энугьо миё бу э войгей хуьшде гуьре доре совети хьуькуьм. Дербендигьо гьечи ве нумдори мескене, комики бири эн кифлет: «Бошой Шемей Шоул». Э товун бебе-келебебе иму эн Шоуле гIэмел миёв бегьем нуьвуьсде бэшгъэе ихдилот. Чуьтам эри ме ихдилот сохди дедейме, у бу соводлуье ве хьуьрметлуье э шегьер одоми, бежид сер кешире э нумаз, зиёдгуьзел гуфдире ве нуьвуьсде бу э иврит. Те имогьоиш э хуне иму дошдеи десхэтие жофо ве буьзуьрглуье книг эну. У пушоки гуфдире омборгьо гъозие-гъэдер: сергуьрдеи дуьимуьн гIуьломие довгIо ве жэгIмитегьерие рафдеи жуьгьургьо э торихлуье ватан. Кейки эри эну нушудорегоргьо тозе хьуькуьм меслэхьэти дори сервори сохде колхоз, коминики гьисди э гъэд сэхьиблугьи эну гьевел биригьо, у дебе сохди ве бисдо корсохи рэхьбер рэхьгьовуние станцие. Рафди эз зиндегуни Шоул лап жогьил, э гIуьмуьрлугъи 38-муьн сал. Э гушдошдеи, уре огъу дори.Нум келе-бебей ме эз лой бебе бу Пирис (Борис) Кукулиев, у зенде омори э гъэд шегьер Грозни, зен эну, келе дедей иму Маня-Мошолум (духдерине Рахавьяева),- дербендеи, омборгьо салгьо кор сохди сервор бухгалтер э гъэд фабрике холинчеи э Дербенд.

— Зу ми мерэгълуьи бирей мэгIнихуни? Ту хундени мэгIни э сэхьиблуь гуьнжуьнде эз хушде дестон?

Дестонгьо ме сергуьрдем нуьвуьсде э школьни салгьо, экуьнди 13 сали, оммо те и пушогьо угьоре не бирмундем ве не дофус зерем. Э хуне иму э урусси гоф сохденим, унегуьре ве нуьвуьсденуьм ме гье у зугьун, комики лап гIошир хуьшден эз хуьшде гьем буллуьи рифмгьо. Кейки нуьвуьсдени э урусси, хубте вердиш бире ве гьис сохде гофгьоре, гъэрезки ме фикир сохденуьм чуьки бегьеми соводлу не нуьвуьсденуьм, унегуьре гьем хьзёменди, не воисде бу бирмунде дестонгьо хуьшдере. Ме венуьшде рафдем эз вилеет 9-муьн салии гIуьмуьрлугьи, иврит эри ме гьисди чуьн гъовум, оммо э урусси мере асанттеи гуьнжуьнде эз хуьшде.

Ини, мескен, е тек омборгьо десконгьо:

Всё красиво, безупречно,

Только где же слово «ВЕЧНО»?

Наша жизнь – как карнавал.

Кто кого хотел – сыграл,

Или, может быть, сыграет,

Но об этом не узнает.

Фантастично, но до боли,

Не сжимаются ладони.

И совсем не все решает

Человек – предполагает…

БОГ расставит по местам.

Мере лап хьэз оморе творчество шогьире-мэгIни ве мэгIнихундегор Игорь Ашуров. Ве суьфдеи дуь мэгIни ме веровундем эз тозе колекцие эну. Суьфдеи мэгIни – «Вокурде гъисмет», гъиребир бегьем сохде те эхир Арнольд Арекилян. Дуьимуьн – «Муьгьбет гьемме ми дануь хос сохде», гъиребир бегьем сохде те эхир Ронен Лиса ве Арнольд Арекилян. Сеимуьн мэеIни – «Дусди», нуьвуьсди дуь дербенди, иму веровундейм мэгIнихуни эн дуь одоми э Александр Авдалимов. Концерт э гъэд Офаким, э сер коминики ме суьфдеи гиле мэгIни хундем, гуьнжоовурдегор бири гьемшегьери муниципалитет. Ме оморе расирем дим-дуз эз довгIои бине, эз софун э дорум, эри чуьки э гьееки э возирегор имуревоз, кумекии доре несигIэтие руьхь гъуллугъсох гьем зигьисдегор шеьер, коминики э руз гужлуье гъовхо 7-муьн октябрь бисдорут гъурбуни жэгIмитегьерие шишире рафдеи зулумкор.

МэгIни «Жун имуре е теки» э дестонгьо Игорь Ашуров (гъиребир бегьем сохде те эхир Ронена Лиса), гьеле гьисди э гъэд жирей корисохи хьозуьрлуьгьи. Э Игорегьо лап дуьлхоши кор сохде: у назуьк гьис сохде кеф ве хьол нешумо гофсохдегоре. Кейки иму э урегьо суьфдеи гиле вохурде оморейм гирошдигьо гьеминон, меслэхьэт сохдейм дуь сэгIэт. Эзуновлейге ме боворинлуье сергуьрдем хунде мэгIни, ве, гьечи оморени одомигьоре хьэз оморе эз хундеи ме (гъэрезки ме эз гIэили хунде мэгIни). Э вэхд школе, ме пенж сал тербие дорем возии э гитаре, хуьшде гьово зере э гитаре ве хунде мэгIлуьмлуье мэгIни.

— Виктор, чуь туь гьис сохде, кейки поисдени э сегьне ве хундени мэгIни, садигьо чум дениширеки э туь?

Кейки винирени чумгьо томошесохдегор, коминики мере хьэвес ве эшгъ вегуьрде, хьэсуьл оморе диеттеш зиёд войге нуьвуьсде ве хунде. Э гьонине вэхд ме гьемкорки сохде э шогьиревоз Анжела Сосуновой эз шегьер Бер-Шева. Уре гьисди зиёдгуьзелие дестонгьо, э коминики гIэмел миёв нуьвуьсде раче мэгIни, ве ме э кумеки худо, э хьэзевоз угьоре веровунде мисохум.

Чуьтам гуфдире Игорь Ашуров э мэгIни хуьшде «Жун имуре е теки», вожиби эри чуь э гьеммей гIуьлом бу шолуми, ве гьемме хэлгъ гIуьломе гьееки э хэлгъгьо жуьгьури берде товуш ве рэхьми!