7-муьн февраль, э МЕОЦ гирошди 8-мун вохурдеи Федерацией межлуьс жугьургьой Уруссиет. Эвели вохурдеи идоре гирошди э январь 2020-муьн сал; э регламент гиро, серворой эн жэгlмиет дин-догlоти биё винуьт екире эз 5-нж сал кемте нэгI, эри ихдилот сохде гъосуьт эн кумеки сохдей дин-догlотлуье зиндегунире, социальный коре, жэгlмиет дин-догlотлуье вокурдеире, мисво дореире (ники сохдеире) не гlэремиллетлуье гоф сохдере.

Имисал гъозиере сер кешири делегатгьо эз 140 диеш жэгIмет эз 130 шегьергьой вилеет, хьуькуьмлуье деятельо, нушудорегорой мисво дореи идоре не динлуье конфессио. Э руз эхэйрбу дореирово бири бирмундеи: келе раби Уруссиет Берл Лазар, сернуьш ФЕОР раби Александр Борода, сервор эн департамент взаимодействией э дингире идорей серберэхьи келей РФ э доруние политике Евгений Еремин, сернуьш эн мисво сохде фонд жугьургьо СТМЭГИ, жигегир сернуьш эн Уруссие жугьуре конгресс эн кор э жугьурорево Герман Захарьяев не сервор эн жэгlмиет дин-догlотлуье идорере «Федеральный жугьуре национально-культурный автономие» Сергей Мельников.

Бердегор межлуьс ведромори рэхьбер департамент эн жэгlмиет дин-догlотлуье ологьогьо ФЕОР Борух Горин.

Э руз эхэйрбурево келе раби Уруссиет Берл Лазар гуфди гьевелине нэгъуьллуье везифей идорере: «Одоми, комики эде оморе э жэгlмиет дин-догlоти, войсдени шори сохуьд эз жугьури хуьшде, воисдени сер тик бошуьт. Иму биё кумеки бошим эри эну, эри гьер хуне гьис сохде жугьури хушдере, эри данусде гIэдэтгьой не культурей жугьуроре. Чуь нушу доре у эри му? У эде нушу дореки Федерация кумек мибу эри гьер хуней жугьургьо биреи чигьой эри весиет Тироре гьурде. И суьфде Тирои не тефилим, сидур иму. И мезузеи э дер. И чигьой Шоботини: шэгlмдон эри шэгIмой Шоботи, пейле эри кидуши. Эхирде не гъоб эри содогъо, гьер жугьур биё, гьеле гlэилош э кифлет жугьури дануьдки цдака гьисди гьеммейеки весиете хуно, гьер руз биё дешенуд чендгъэдер миданут.

Эри чуь, э дениширейме гиро, и э вэхд ю герек гьисдигьо везифеи? Чуьнки гьейсэгlэт ижире зомунеи, имуре гьеммише воисденуьт терсунуд. Оммо жугьоб иму – сер тик биреи эз жугьуриму»

Сервор департамент взаимодействией э дингире идорей серберэхьи келей РФ э доруние политике Евгений Еремин гуфди согъбоши эз Федерацией жэгlмиет дин-догlотие жугьурой Уруссиети э жофогьою гиро, э вокурдегье нумазо не жэгlмиет дин-догlотие бинелуье мескен не культурно соводлуье корисохи.

Жейле сервор департамент взаимодействией э дингире идорей фикир дори чуьтам параменд бирениге кор ФЕОР эри кумеки гlэилгьо э михьтожирово: «Дуьлхошини, рабие эдет мисвое кор сохдэ э улке, гьелем комики параменд нисди э вилеет иму: у кор э одомиеровози, эвел э гlэилорово, комики шуькесди. И пушогьо ме бируьм э Уфа, э уфинский нумаз, шор бирем диренки, чуьтам эдет кумек бире э шуькесди гIэилгьо не бебе-дедейошу, не буьтун жэгIмет, жоиле кифлетгьо, не денишире э дин ишу. Гъэгъигьэтиш, и гьисди фэгъир-фэгъир – винире одомиере, комики гереки кумеки, эз жире-бе-жирее меллетгьо не динъо, оммо кумек эдет дире эз нумаз. Ме фикир сохдем, ижире коре ФЕОР мигировуну э у шегьергьо эже гьисди жэгlмиет дин-догlотие бинелуье мескен.

Сервор СТМЭГИ, жигегир сервор Уруссие жугьурие конгресса Герман Захарьяев: «Имбуруз ме э ишмурево неки сервор фонд СТМЭГИнум, оммо гьелем жигегир сервор Уруссие жугьурие конгрессум. Хьэрмэхьи э гъэрей ФЕОР не РЭК гьисди э дегьсалирово. Э и вэхд иму данусдейм сохде омборе гъэдери хьэрмэхьие проектгьо. И мисво дореини, конференциеи, акцией солидарность э Исроиловои, элем хьэрмэхьие межлуьсгьо э улкей Уруссиет. Олхоинум, и хьэрмэхьи зиёд микешу не мибу э биево вэхд.

Эхирки, вое гуфдирум эз бэхшвегирой съезд-шалиахам барасие кор бу ишуре, биль эр одоми вегиру э сер хуьшде шолиехьире эри пушобердеи джуурире э жигей хуьшде. Жугьуре жэгlмиет дин-догlотие не фонд СТМЭГИ э кумеки Худорево, гьемише бу э ишмуревоз «е муьшд хуноре», э гьочу мибошим гьемише эйеки хушхьоли уруссие вилеет иму не жугьуре жэгlмиет дин-догlоти».

Сервор эн ФЕНКА Сергей Мельников: «Э ФЕОР гиро эде вокурде оморе не хуб муьхшуьли сохде жугьурие соводлуье идоре, эде кор рафде э жоилеревоз, кумек эдет бире э кифлетгьо э гIэилоровоз не ветерангьо.

Норенки э пушой хуьшде вожиблуье везифегьо не гъэрор норе, идорейшму мидануь бире хьуьрметлуь неки э вилеетму, гьелем э буьтун гIилом.

Эдейм согъбоши гуфдире э деберде омонети э параменд зиндегуни жугьуро э Уруссиет, имуре имид гьисди э песдеине хьэрмэхьи.

Э адрис делегатгьо 8-нум вохурдеи расири официальни руз эхэйрбу дореи эз нуминэй сернуьш Хьуькуьм РФ Михаила Мишустина, гьемиге келей Москов Сергей Собянин.

Сернуьш Хьуькуьм Уруссиет гуфти эз деберде омонети жугьуре жэгlмиет дин-догlотие э мисво сохде, э параменд дин-догlотие зиндегуни э буьтуьн вилеет жофогьою эде дошде оморе э торихлуье ер мимуну.

Келей Москов Сергей Собянин гуфди чуьтам вожиблуьи кор ФЕОР э зиндегуни шегьер не вилеет э руйбиреи хуьшде: «Келе омонети эри дошдеи гlэдотгьо хубегуншиети дировунде Федерацией межлуьс джуури Уруссиет, комики бэхшвегири э жэгlмиетлуье не духовни зиндегуни шогьнишон барасилуьи эде воровунде культурни, просветительни не угьониге гъиметлуье проектгьо эри домунде э торихлуье ер.

Эдем бовор сохде, ФЕОР песдениге муьхькем мибу эхлогълуье не динлуье гъиметлуь, параменди гIэремилетлуье не гIэрейдин-догIотлуье гоф сохдеи э Москов».

Сервор ФЕОР раби Александр Борода томом сохди вохурдеире э хэберово корисохи идорере эхири 4 сал:

«Эз дэгъдэгъэй эхири вохурдеи гирошди 4 сал, комики овурди дегиши э зиндегуни одомие, гьелбетте, э зиндегуни эн жегьмет.

Любавический Раби гуфдири: «Э гьер четини гереки офде рэхьми не еэхь хуьшдере э у кура сохде. Эгенер нисе данусдениге офде уре, мибу шори сохдеки, эзуни тилисиме нисе варасиреним».

Шертсуьзи, гьер эгьволет бири оди и сало, дегиш сохди э вердуьшлуье корисохи зиндегунире. Экономически четиньо дегиш сохди идорей жэгlмиет дин-догlотие корисохире. Эри межьлус вожиблу бу ветовусде, неки дорушде гьемме тарафгьой короюре, оммо гьелем зиёд сохде гуманитарный программегьо, эри кумеки сохде михьтожлуье, эри бире духовный тиров э герекье махэль. Иму данустейм сохде уре. Дануьстейм, чуьнки иму мундейм гьеммейеки, чуьнки корисохиму эде гуьрд бире э десде не еклуьги. Иму гьисд сохденим консолидацией эн е мисвокоре не дин-догlотие идорере э Уруссиет.

Э кор гьер мерд ишму гиро, не кумеки дуь э еки, комики иму гьисд сохдениим гьер руз, имбуруз иму эдейм ихдилот эз барасиейму.

Э бутуьн вилеет эде рафде барасилуьи кор сохдей зевер 160 нумаз не жэгlмиет дин-догlотие бинелуье мескен. Кор сохдей улкегье жэгlмиет дин-догlоти эхири мэхьэл: иму данусденим бири омбаре рафде-оморегьоро. Вогошде ологьогьо эде гуфдиреки одомиере гереки бире э жегьметоро, оморе э мигlидо э нумаз, зигьисде э гIэдэт гиро»

У гуфди вожиблуье тараф гьисди кумеки сохде э жоиле не кифлетгьо, гереки хьэвес эри ератмиш сохде кифлет не тербие доре гIэилгьоре, гьемиге офуре гъоимлуье социальный инфракструктураре эри бебе-деде.

Раби Борода гьемиге шуморди вожиблуье идорей жэгlмиет дин-догlотиере эз 2020-муьн сал: гьер келе э Сибирь бинелуье мескен эри соводи вегирдэ э Томски; бинелуье мескен эри гIэилгьо шуькесд гьисдигьо «Семирия» э Ростов-на-Дону; бинелуье мескен интеграция эри гIэилгьо шуькесд гьисдигьо «Лев» э Новосибирск; нумаз э ен клуб хундегорой МГИМО не университет жугьургьо; нумаз «Бейт Скидельский» э шегьер Артеме; нумаз э наукоград Обнинск, гьемиге тозеден вокурде торихлуье нумаз э Брянск, гъобул сохдение гьер раче нумаз э Уруссиет.

Бэхшвегирой VIII-нум вохурдеи вегуьрдет 4 резолюцие.

Гъэрорноме «Эз товун межлуьс» ихдилот сохди эгъибетлуье нетиже келебирей жэгlмиет дин-догlотие не везифей келеойшурэ э кумек бире эри кор: «Иму эдейм дире хубе кор эн жэгlмиет дин-догlотие, бэхшвегири жоилгьо не жоиле кифлетгьо э гIэдэтлуье мигIидо, омбаре рафде-оморе э мигIидо.

Вохурдеи Федерацией межлуьс жугьуро теслих сохдики, межлуьс жугьурой Уруссиет эде гумон сохде не посде э жиге не параменд сохде тараф духовнире, жэгlмисоводлуьире не культурнирни тарафоре эн корисохире.

Резолюцие «Эз товун гIилом» эде огол зере жегIмете варасде женгореэ шолумировоз эри поюнде гlэзиет кеширей жегIмете: «Межлуьс жугьурой Уруссиет эде огол зере эри поюнде довгlоре не ологъогьо гировунде эри хилос сохде жэгIмете.

Э документой «Эн ихдилот сохдей терроризм не кумеки э жэгIмет Исроил» вери гоф тэхьсире дореи э террористический гужлуье гъовхо 7-ум октябрь: «Межлуьс жугьуро эдет гъинемиш сохде и залуме гьовкендеире бирео себеб муьрдеи омбаре одомией жугьуроре э гъэд е руз эз Холокост песде, … эде винире зиёдгъувотлуьи эн Сернуьш Уруссиете не МИД РФ эри хилос сохде есироре.

ЖэгIмет жугьуроре имид гьисдики келегьой девлетьо песдеш гоф тэхьсирире мисохут терроризме не борж миберуьт, э консолидацией гlуьломие жэмигlэт есиро, комики гьелем э Газают, хилос мибошуьт, оммо муьрдогороре э бедирево миберуьт гъовум-гъэрдеш эри гьовре сохде.

Э резолюцие гиро «Эз товун антисемитизм» бэхшвегирой вохурдеи дануьсди поисде эри зевер не верафдеи юдофобие э гIилом не гlуьломие СМИ: вохурдеи Федарацией межлуьс жугьурой Уруссиет эде нетиже сохде кор антисемитизм э гIилом хэраби. Зерей террористический идоре ХАМАС э Исроил хьофтуьм октябрь 2023-муьн сал э и жугьоб дори Исроил э сектор Газа воровундет келеи жугьурнехогьи э гьемме гIуьлом.

Иму эдейм серкуш зереним жэгIмети корсохи ки э ихдилот хуьшде гIэмел овурдениге жугьурнехогьи гофгьо гуфдире. Огол зереним зу жугьоб доре э гьер вешмердеи.