Сервор Догъисту Сергей Меликов гировунди корисохие гуьрдлеме, комики г1уьзет сохде пуьрсуьшгьой вокурдеире ве гъуьчсохи соводие идорегьоре, комикигьоре везифе нори э кор твенгесде э гирошденигьо сал.
Бинелуье войгей корисохире бири э гуьнжо овурде э вэхд ю ве хубе веровундеи везифегьоре э гуьнжолуьи гьеймогьоине ве секонесуьзе минкини эри дананидореи г1эилгьоре э регионе.
Э корисохи гуьрдлемере бэхшвегиргьо винири гирошденигьо овхьолет вокурдеи тозе школгьоре ве бохчегьой г1эилире, гьемчуьн фегьисохи э посой дошдеи гъонуне нореи е гъэдер вэхде дореи угьоре э 2025-муьн сал. Бири пуьруьш сохде ёгъинлуье объектгьо э жире-бе жире е гъэдер вэг1эдо вокурдеи, пуьрсуьшгьо технологически екбиреи угьоре эки инфраструктуре ве гировундеи дуьруьжде гъуьчсохире э идорегьо.
Жирелуье тигъэти бири доре гъозиере э 19 объектгьоревоз (18 школгьо ве 1 бохчей г1эили), вокурдеи комикигьоре зиёд сохди э 2025-муьн сал.
Сервор республике э ёр овурди , чуьки и пушогьо э гъэд миг1идлуьи Рузе гъэлхэнди г1эилгьоре э Буйнакски районе вокурде омори дуь бохчей г1эили – суьфдеи бо э дигь Верхний Дженгутай, у хьисоб сохде э 60 жиге, ве э 90 жиге э дигь Нижнее Казанище. У согъбоши гуфдиреи идорегьой хьуькуьме ве вокурдегоргьоре э песой гировундеие коре, дошдеи гъонуне вэхдгьоре, комикигьо овурди шори эри чуькле зигьисдегоргьой рвйоне ве бебе-дедей эн угьоре.
Тозе бохчей г1эили – гье у гьеймогьоине тешколеи идорегьо, э угьо э пушоки дире дануьсдеи гьемме минкинигьо эри гьемметарафлуье ве битов согъэ тегьер параменди г1эилгьоре, гьисди гьемме герекигьо, эри чуь г1эилгьо гьис сохде хуьшдере хуб.
Э гъэд зобуне меселенгьо Сергей Меликов нуме гирде объекте э дигь Герга Каякентски улке, эже эсер гъобулсохи веди сохди омборе нуботноме вес не биреигьо, дешенде батмиш сохдеи гьомборгьоре.
Эзуш бэгъэй гирошдение объектгьо, э гъэд тозе миллетлуье проектгьо «Кифлет» ве «Жовонгьо ве г1эилгьо» везифе нори вокурдеи 2 школгьо ве 6 бохчей г1эили э 2025-2027-муьн салгьо.
Гене э гирошденигьо сал э миллетлуье проектевоз «Жовонгьо ве г1эилгьо» везифе нори дуьруьжде гъуьчсохи 9 школгьо ве 2 бохчей г1эили э 10 шегьергьо, ве контрактгьо э и коргьо уже игърол бесде омори.
Сергей Меликов мэг1луьмет дореи э товун жирелуье жугьобдорлуьи э песой дирте дореи соводие объектгьоре енебуге зобуне гировундеи коргьоре: «Унжо, эже дореи объектгьоре мибу нисе веровунде э вэхд ю, сервор районе миберу келе жугьобдорлуьи».
Рэхьбер регионе э ёр овурди, чуьки э вэхд ю нисе вокурдеи школгьоре вир мисоху коре еки эз серворгьой шегьергьоре.
У мэг1луьмет дореи ве вокурдегоргьоре, бирмунде, чуьки гъонунепузмиши гъобул сохдеие э угьоревоз ёгъине гъэрхунди мидеберу угьоре э нуботноме номуссуьзе вокурдение идорегьоре.
Сервор Минобрг1илме Догъисту Яхья Бучаев мэг1луьм сохди, чуьки э песой песини салгьо э республике гировунде омори нисе бирение кор эсер вокурдеи ве э кор венгесдеи соводие идорегьоре. Гьечи, э нацпроектгьоревоз «Соводи», «Могьлугъ» ве екейгегьо госпрограммеревоз э Догъисту вокурде омори 111 тозе школгьо э омборте 40,7 гьозор жиге ве 92 бохчей г1эили э экуьнди 13 гьозор жиге.
Министр вокурдеи, архитектуре ве ЖКХ Догъисту Бахтияр Уллаев бирмунде омбортее фирегье шекуьле: э 2025муьнсал э гъэд федеральни ве республикански программе берде вокурдеи 28 объектгьо соводи (21 школе ве 7 бохчей г1эили). Коргьо рафде э дуь рэхьевоз: игърол ве сер гуьрдеи вокурдеире объектгьоре эсер тозе нацпроектгьо, гьемчуьн бегьем сохдеи вокурдеире ве дешенде гирошдение объектгьоре.
Э суьфдеи рэхьевоз министр мэг1луьм сохди, чуьки республике гьисди э «савзе жейлее чапарлуье мескен» эсер игърол.
Эз 10 объектгьо (9 школгь, 1 бохчей г1эили), везифе нори эки вокурдеи 1-муьн сентябрь, мидешену 8 (7 школгьо, 1бохчй г1эили. Э барасигьо рафдеие пуьрсуьшдореиревоз, комики гировунде омори э гъэдэгъэи серворе республике дуь эекиревоз э Минобрг1илме, э сер 4 объектгьо эз 10 везифе нори вегуьрде руьхсет э дешендеи те 15-муьн июль 2025-муьн сале.
Сергей Меликов э ёр овурди, чуьки гьемме ёгьине гъэрхундигьо э пушой федеральни бинеревоз э дешендеи объектгьоре соводи биё бу веровунде, везифе норе бирмундеигьо ве барасигьо корисохигьо рафди расири.
Э гуьрдлеме гъобул сохди бэхшвегири жейлее министргьо, нушудорегоргьой энергетически компани, вокурдение идорегьо ве серворгьо муниципалитетгьо.
