Э товун омонети медикгьо э бараси э вэхд ВОВ нуьвуьсде омори омборе книг. Гьемкорки медицинеи корсохи поезде – софхоне э черхгьо, э гуьнжо овурди э суьфдеи сал довгIо, веровунди еки эз лап вожиблуье коргьо. Угьо хилос сохди млн зиндегуни лешгерчи ве шолумие зигьисдегор, гировундеи зутее операцие ве зурие тегьер сохде оморе кумек э гешдение эз инжо э унжо софхонегьо. Э угьо бири лап келе жугьобдорлуьи – дореи суьфдеи гереклуье кумеки ералуьегьоре ве чуьтам гIэмел миёв зуте угьоре гировунде э де мескениге софхоне.
Э медицинеи корисохи поезд, чуь дузини, дарафди согъэ рэхьгьовуние гъэдерлуь (12 ве омборте вагонгьо), э комики дарафдени кумекие вагонгьо: операционни, хурекхоне, аптеке, гьемиге вагонгьо эри ералуьгьо ве корсохгьо, вагон-муьрдегьо ве екиге.
Гье и дофусзереи э товун – догъи жуьгьур Марие-Мейром Махаеве хьэсуьл омори э 1917-муьн сал э Махачкале. Гъумолет Махаевигьо – «хайтагио», гье у мэгIэнолуь бире, чуьки те гирошдеи э шогьнишон Догъисту угьо зигьисди э дигьбон Маджалис Кайтакски район. Деде-бебе эну Анух ве Наамо бири пенж гIэил: Яков (Тэшвоо), Соне (Сухмонот), Виктор (Биатор), Розе ве Марие (Мейром). Сесе эз угьо бири коммунистгьо, динбовори бовор сохдигьо эз суьфдеи рузгьо Совети хьуькуьм э бараси коммунизм, ве веровунди зиёдгуьзелие гъуллугъи. Яков (Тэшвоо) бири министр хозяйствой дигьбони Догъисту э эхир 1930-муьн салгьо, Виктор (Биатор) – сервор НКВД э шегьер Хасавюрт (э чугъули сохдеи бири дустогъ сохде ве гуниле зере, жиге гъовре сохдеи мэгIлуьмсуьзи). Розе Махаеве э шуьвер рафди э гъуллугъ сохдигьо э довгIо Якове Новахове. Э дуразовуне гировундеи омборе салгьо у сервори сохди трест хурекхонегьо ве ресторангьо э шегьер Нальчик.
Чуьклеи духдер, Марие – варасдегор Москови медицинеи институт, коминики варасди э лап хубтее риз гъэдерлуьи э 1940-муьн сал. Оммо э и зуригьо сергуьрди довгIо, духдер рафди э довгIо э сенигIэткори довгIои духдир, эри эну гье бирден гъуллугъ дори сервори сохдеи медицинеи корисохи э поезд. Гереки бу дорун дошде миллет хуьшдере, чуьнки у бу терсиреи, гърор норе бири мэгIлуьм сохде э товун, чуьки довгIои духдир – армяни. Э жиге сервори медицинеи корисохи поезд Марие э десде хуьшдеревоз хилос сохди омборе ералуье лешгерчигьоре, доре оморе угьоре э вэхд ю ве гереклуье кумекии.
Чуьнки лап гъэгьтии бу духдиргьо, э и зуригьо омори буйругъноме э товун гировундеи Мариере э довгIои софхоне шегьер Махачкале. Э 1944-муьн сал шинох бири э догъи жуьгьуревоз Азером Авадьяеви, ветеране довгIо, коминики гъуллугъ сохдигьо танкисти э довгIо. Э вэхд гъовхо у бири ералуь э пой ве э азади эз софхоне ве э хьол-овхьол жунсогъи миё бу ведарафде рафде эз довгIо, кор сохди молалвери.
Э у салгьо э Догъисту бири очугъи омборе гъэдер нечогъгьо туберкулёзи, унегуьре Марие гъобулсохди гъэрорноме биреи туберкулёзи духдир ве хос сохдеи гIэилгьоре ве келетегьоре эз гье у бигIэдотие нечогъи. Э 1946-муьн сал э Марие ве Азере хьэсуьл омори келеи кук, э гье у вэгIэдо эри эну доре омори кор э дигьбон Ахти. Е сал корсохи э у догъи райони дигьбон, кифлет вогошди зигьисде э Махачкале, эже Марие зиёд сохди сенигIэткори хуьшдере. Сергуьрди эз гIэили софхоне, песде э поликлинике, эзуновлейге ведарафдеи э пенсие бисдо корсох гIэили духдир э школе ве гIэили бохче шегьер Махачкале.
Ведарафдеи э шуьвер 27-муьн сали гIуьмуьрлугъи ве хьэсуьл овурде пенж гIэилгьо, Марие Ануховне бу буьлуьнде хьуьрметлуь э кор, чендгъэдерие бири бэхшире ГIуьзетлуье Грамотгьо, орденгьо ве медальгьо. Деде-игиде, ветеран довгIо у гьееки э шуьвер хуьшдеревоз келе сохди сечсохдение гIэилгьо ве дори гьеммере буьлуьнде данани.
Э гъэд овлодгьо Марие ве Азере гьисди духдиргьо, тербиедорегоргьо, программистгьо, инженеригьо ве зиреклуье корсохгьо.
Келеи кук Сергей – тербиедорегор э спорти, э Исроил у кор сохди э школе, Гьонине вэхд у э пенсие, зигьисдени э Бер-Шеве. Духдер, Светлане Хаимове эз 2000-муьн сал кор сохде гIэили ве кифлети духдир, зигьисдени э кифлет хуьшдеревоз э шегьер Офаким. Дуьимуьн духдер, Изабелле Абрамове, те ведарафде э пенсие кор сохди э исроили школегьо тербиедорегор английски зугьун, зигьисдени э Хайфе. Духдер Эльмире эз шегьер Хадера – варасдегор филологие факультет, 20-муьн сал э гIуьзети корсохи э гIэилгьоревоз э гьонине вэхд кор сохде э фирме гъуллугъсохи э песой келете одомигьо. Чуьклеи кук Руслан Авадьяев зиёдте 20-муьн сал кор сохди э исроили софхонегьо, гьеймогьой зигьисдени э кифлетевоз э шегьер Нетание, эже кор сохде кифлетлуье духдири э поликлинике.
Гьисди э гъэд невегьо ве нишрегьо кифлет Авадьяевигьо лешгерчигьо ЦАХАЛе, гъэлхэнди сохе жуьгьури вилеет. Еки эз угьо неве Александр – Анух Давидов (нум дори э хьзё келеи келебебе) гъуллугъсох э нум подполковнике ве э сенигIэткори сервори психологе Гъушун гълхэнди Исроиле. Диане Авадьяеве неве бирор Азере – Григорие (Хананьи) гьемиге гъуллугъсох э ЦАХАЛе, гьисди жугьобдорлуь кори сохдеи э кифлетгьоре ералуьегьо лешгерчигьо. У деде се гIэили, э сенигIэткори келеи медсестра, бежид бирмундеи э ТВ, э урусси зугьун исроили 9-муьн канал.
Ветеран довгIо ве верзуьшлуье духдир. Товушлуье ёргири Марие Махаеве-Авадьяеве э 1981-муьн сал э гIуьмуьрлугъи 64 сал рафди эз зиндегуни. Гьовре сохде омори э Махачкале.
