И дофусзереи хьэсуьл омори э хотур теорие эн шеш десгьо. Торихчи, журналист ве тержуьмсох, хьэсуьломорегор Баку, Григорий Константинович Рейхман, комики гьонине вэгIэдо зигьисдени э Исроил э шегьер Ашдод, 9-муьн май зинг зери эри ме ве гуфди, э зугьун уруси нуьвуьсдегор Ася Энтове э сициальни сеть венори сирот эн жугьур догъире, комики бири 100 сале.

Э зир сирот Ася нуьвуьсди: «И гъунши мени Тоня (Тиферет) Абрамове. У 100 салеи. Лап очугъэ эгъуьли, ловехэнди, асант жуьмуьсдени э хуне, гьеммише э тен ю раче партал вери, э маникюревоз ве косметикервози. Э вэхд довгIо у, жогьиле медицински хэгьер, ведиревундембу ералуьгьоре э сер хуьшде. Сирот зеренки у вокурди гьемме верзуьшлуье медалгьой хуьшдере. Союз эн ветерангьой Исроил уре гьемчуьн дори диеш е медаль «80-сали Бесгъуни э сер фашизм».

Тиферет Абрамове зигьисдени э дигь Карней-Шомрон э Самарие. Ме дануьсдем э и гIэжоиблуье зеневоз гоф сохде ве нуьвуьсдейм ихдилот сохдеи энуре.

Ме э ишму ихдилт мисохум, чуь эри ишму мерэгълуни: э ер ме гьемме мунди. Хьэсуьл оморем э Баку 13-муьн июль 1924-муьн сал э гIэдотлуье кифлет. Бебей ме коммунист бу, гъирмизине партизан. Нум бебейме бу Абрамов Натан Иосифович. Хунеш уре доре оморебу чуьн коммунист. Бебе эз дедейме тологъ вегуьрди кейки ме е сале бируьм. Мере келе сохди зен урус, дуьмуьн зен эн бебейме. Те 16 сале ме нисе дануьсдебируьм, ки у суьгъде дедейме нисди, чуьнки эз ме пэхьни сохдебируьт. Э кифлет мере огол зерембируьт Тоня. 16 сале биренки мере герек бу вегуьрде бешпурт, ме сер гуьрдуьм гешде метрик хуьшдер. Офдем документ, э комики нуьвуьсде оморебу: «Абрамова Тиферет Натановна» Э риз «бебе» ме хуьндуьм Абрамов Натан Иосифович. Деде – Абрамове Мария. Ме мэхьтел бисдоруьм, женг гуьрдуьм ве парра сохдуьм метрике. Гурунде гофсохи бу э беберевоз, комики, чуьтам дануьсдембу, андуьрмиш сохди и гъозиере. Оммо герек бу вегуьрде бешпурт, тозеден сохде метрике. Иму рафдим э ЗАГС эн шегьер Баку, вегуьрдим тозе метрик. Ме э гъэршуй эн нум Тефирет бируьм ве э бешпурт нум ме нуьвуьсде оморебу Антонина. Гьемме гьовуьмгьой иму дануьсдембируьт и гъозиере. Ме гьэгъигъэтлуье жугьур догинуьм. И бу э пушой сер гуьрдеи довгIо. Э песдеине и гъозие э нумевоз эри ме хэйр овурди, ве ишму миваресит гьейчуь. Кейки сер гуьрде оморебу довгIо, ме энжэгъ 9 классе бегьем сохдебируьм. Ве гьеммей иму духдергьо-хэгьергилигьо вирихдим э военкомат ве гуфдирейм, ки иму хьозуьрим кор сохде ве кумеки сохде. Оммо э иму жугьоб доре оморебу, ки суьфде гереки вегуьрде синигIэт, ве песде кумеки сохде. Ме офдем медицински училище э Баку, гъэрор сохдей хунде э унжо. Е ченд мегьо ме хьозуьр биребиру эри дарафде, барасилуь дорем экзаменгьоре ве э февраль 1942-муьн сал дарафдем. Хунде герек бу 2,5 сал. Те дарафдеи э училище ме кор сохдебируьм э почте шевине корректор.

Шеш ме кор сохдебируьм пулсуьз.

Э вэхд хундеи э училище, гьемме студенткегьоре, э и хьисоб мереш, фуьрсоребируьт эри векенде окопгьоре. Ним сал иму э товун зиндегуни шегьер гьичиш нисе дануьсдебирим, нис дануьсдебирим чуь гирошдени э иловле. Эзуш бэгъэй, 18-сале духдергьо сохдембируьт ижире гурунде коре дур эз хуней хуьшде.

Кейки дуьшмен поюнде оморебу э куьнди шегьер Моздок, иму вогошде оморебирим э шегьер. Ме рафдуьм э училище. Э вэхд довгIо бебейме келете мерд бу, уре э довгIо не бердебируьт, у кор сохдембу э военкомат эн шегьер Баку. Ме имидире вир нисе сохдебируьм ки кумеки мисохуьм э лешгерчигьо ве э товун эни гуфдирем э бебе. Бебе шинох бу э сервор госпиталевоз №5027 э Арзуманевевоз, ве иму гьееки э беберевоз рафдейм эки эну.. Сервор госпиталь вегуьрди мере э кор, эхи гьеле мере диплом небу. Ме вегуьрде оморебируьм э жигей медицински хэгьер-эвакуатор. Госпиталь бэхш сохденигьо бу: эшелонгьо э ералуьгьоревоз оморембируьт э рэхьгьовуние вокзол э Баку ве э унжо ералуьгьо бэхш сохде оморембу э песдеине хоссохи. Баку хьисоб сохде оморембу э куьнди фронт деригьо шегьер, ве госпиталь иму гьемчуьн гуфдире оморембу э куьнди фронт деригьо. Э госпиталь ме кор сохдем экуьнди чор сал. Ве гье вэхди хундебируьм: те сэгIэт 12 руз ме э хундеи бируьм, песде те сэгIт 12 шев – кор сохдембируьм э госпиталь. Герек бу сохде гьер коре: э вокзол гьердуь иму кеширембирим гурунде носилкегьоре э ералуьгьоревоз. Омбаре ералуьгьо э гипсевоз бируьт, э сереботи комики носилкегьо диеш гурунд бирембу, ижире нечогъгьо гуфдире оморембу кокситнигьо. Госпиталь, эже иму фуьрсорембирим ералуьгьоре, дебу э школе э мескен Сие шегьер. Э хуьшдени госпиталь иму носилкегьоре кеширембирим те операционни, чуьнки гьерчуьтам бисдо сук сохим кор имуре. Ме сохдембируьм перевязкегьо, кумеки сохдебируьм э вэхд операцие, кор сохдебируьм э лабораторие. Гьер коре иму э софоревоз сохдебирим, лап хуб варасирембирим, ки иму кумеки сохденим, ки и дешендеи имуни э Бесгъуни. Жофой мере буьлуьнде гъимет доре оморебу: бэгъдовой варасдеи довгIо мере доре оморебу медаль «Эри гъэлхэнди Кавказ». И медаль лап гъиметлуьни эри ме. Э и куьнде рузгьо мере доре оморебу медаль «80 сал Бесгъуни». Э вэхд кор сохдеи э госпиталь мере доре оморбу офицерски нум лейтенант эн медицински гъуллугъи.

Э вэхд довгIо омбар винире омори. Оммо е шекуьл гьейсэгIэтиш э пушой эн чумгьой мени. Е гиле иму поисдебирим э вокзол ве гузет сохдебирим санитарни вогуне. Ме винируьм вогун-«теплушкере», эз пенжерегьой комики сере ведешендебируьт бигIэдотлуье лешгерчигьо. Гьечи бирики, ки и вогун берде оморембируьт э есири вегуьрде оморигьо немцгьо. Суьфдеи гьис, комики мере вегуьрдебу – гьис терси. Ме фикир сохдебируьм, ки угьо микуьшуьт имуре, ве песде зу варасирим, ки угьо ерэгъсуьзи ве нидануьт э иму зарали зере. Ини ижире суьфдеи вохурдеиме э немцгьоревоз бу.

Э госпиталь ме ижире синогъи вегуьрдем, комики дие э е жигеш ни вегуьрдуьм. Бэгъдовой варасдеи довгIо ме гъэрор сохдейм хунде диеш. 1-муьн сентябрь 1945-муьн сал ме дарафдем э Азербайджански медицински институт, ве бэгъдовой пенж салгьо барасилуь хунде варасдем уре. Пенж сал хундеи э институт лап зу гирошд. Хунденки э дуьимуьн курс ме э шуьвер вадарафдебируьм.

Шуьверме бу бэхшвегир довгIо, дуз гуфдире, шуькест довгIо, Комнат Михаил. Э довгIо сер эну контужен бу, буланмиши кеширембу э «контузиоони сондромевоз». Оммо эзуновлейге бире гъозиегьой эн контузиере ме нисе винирембируьм. Э 1950-муьн сал, э вэхд хьуькуьметлуье экзаменгьо, имуре бири кук Соломон. Ме  гьееки э соворе гIэилевоз, комики умогьой 8 мегье бу, эри кор сохде фуьрсоре оморебируьм э дигь Отрадная э Краснодарски улке. Ме э унжо кор сохдебируьм рэхьбер СЭС (санитарни-эпидемиологически станцие). Ме э унжо кор сохдем 2,5 сал ве вогошде оморем э гIэзизе Баку. Хэйф, шуьвер ме э Баку кор нисе офдебу, уре воисдембу рафде э Ленинград, Рига: рафде оморембу э унжо, э инжо. Мере нисе воисдембу э унжо рафде ве ме тологъ вегуьрдебируьм.

Вогошде оморенки эз Краснодарски улке ме кор сохдебируьм ж Бакински институт параменд сохдеи духдиргьоре э лешгерие кафедре. Ме бируьм келеи лаборант. Екем вэгIэдо гирошденки мере доре оморебу жигей тербиедорегор. Ме тербие дорембируьм – токсиологие ве радиологие. Кем-кем ме зевер варафдембируьм: суьфде бирем келе тербиедорегор, песде гъэлхэнд сохдем диссертациере, бэгъдовой екем вэгIэдо мере доре оморебу нум рэхьбер эн кафедре. Диссертацией ме бу э пуьруьш сохде нисе оморенигьо гъосуьт, имбуруз у сурлуьи нисди: Медицински кумеки сохде э нечогъгьо, зэгIифире вегуьрдетгьо эз огъу деригьо молгьо». Кандидатски диссертациере гъэлхэнд сохдем э 1972-муьн сал э Москов. Ини э инжо гIэмеллуь бири нум Антонине. Фикир сохденуьм, ки мидануьсдуьм ире сохде э нумевоз Тиферет, оммо э бешпурт миллет ме нуьвуьсде оморебу – жугьур догъи. Э лешгерие кафедре ме кор сохдем 40 сал.

Кук – Соломон Михайлович хунди варасди юридически факультет эн Азербайджански Хьуькуьметлуье Универститете э Баку. Оммо э кор дарафде не дануьсди, э 1989-муьн сал рафди э Исроил, зигьисдембу э шегьер Холон. Э март 1991-муьн сал ве меш оморем эки кук. Э Баку у вэхд мере дие гьовумгьо не мундебу.

Воисдени гуфдире, ки ме гешде офдем дедей мере. У дуьимуьн гиле вадарфди э шуьвер: фомиле ю бу Илишаеве, нуми ю Марие небу, Эстер. Уре се гIэил бу. Ме гоф сохденуьм э бироргьоймеревоз. Кифлет деде дин гуьрдегор бируьт. Э 1979-муьн сал угьо рафдебируьт э Исроил, э 1980-муьн сал деде эз гIэрей зиндегуни рафди. У битехьэим сохде омори э Холон. Хьофд сал пушоте кук ме эз вэхд зуте муьрдебу.

Чуьклеи бирорме гьонине вэгIэдо зигьисдени э Германие. Неве ве нишре зигьисденуьт э Европе.

Э 1991-муьн сал ме гирошдем э Тель-Авив, э унжо ме офдем комитет эн ветерангьой довгIоре, эже ме сер гуьрдем кор сохде казначей. Ме омбаре салгьо кор сохдем э унжо, Энжэгъ хьофд салим гьишдем и коре. Чуьн ветеран довгIо, чуьтам хьуькуьмет Исроил мере доре хуне, эже гьейсэгIэтиш зигьисденуьм.

Ини ижире гIжоиблуье зен зигьисдени э Исроил. Воисдени хосде эри эну жунсогьи ве зиндегуни те 120 сал!

Ирина Михайлова.