Э вэхдгирошдеи гьемме зиндегуни хуьшде, куьнд те песини рузгьо, не поисди тэгlриф доре Ватане, хэлгъ хуьшденире. Эну дестонгьо ве шогьиригьо гlуьзетсохди э товун муьгьбет ве дусди, гъосуьт довгlо ве шолуми, игидьети ве ветовусдеи кавказии хэлгъе.

Зоя Юноевна Семендуева – жугьурие совети шогьир хьэсуьл омори 20-муьн октябрь 1929-муьн сал э Дербенд. Э 1945-муьн сал деде-бебе Зое гирошди э Махачкале. Э варасдеи школере вегуьрди сенигlэт бухгалтери. Э 1950-муьн сал дарафди э кор э Догъистукнигдофусхоне э корисохи редактори. Гьеммишелуьг биреи э мерэгълуье иловле, Зое е гиле гъэрор нори екем дэгlэме дире ве хуьшдени гъувот э шогьири. Суьфдеи синогъигьо бири бегенмиш сохде оморе Хизгил Авшолумове ве Сергее Изгияеве.

Суьфдеи дофусзереи бири э 1960-муьн сал э верэгъгьо альманахе «Ватан Советиму», ведироморигьо э догъи-жугьури зугьун. Суьфдеи гуьрд сохде оморигьо – «Войгей дуьл» — ведиромори э 1967-муьн сал, эзуновлейге бире гъозие э Догъистуни книг дофусхоне зереи бири дофус зере диеш хьэшд гуьрд сохде оморигьо дестонгьо эну э жугьури ве уруси зугьун («Мозоллуье духдер догъи», 1971-муьн сал, «Комуне», 1974-муьн сал, «Э сер билогъ», 1979-муьн сал, «Тербиедорегор», 1981-муьн сал, «Бовор сохденуьм», 1984-муьн сал, «Астарай ме», 1988-муьн сал, «Околица», 1992-муьн сал). Гьемме те рафде э Исроил Зоя Семендуева ведешенди 10 гуьрд сохде оморе дестонгьо. У нуьвуьсди э товун хэлгъ хуьшде, э товун муьгьбет, дусди, э товун довгlо ве шолуми.

Гьовой музыкеи нуьвуьсдегоргьо Хизгил Ханукаев, Юно Авшалумов нуьвуьсди мэгlни э дестонгьо З.Ю.Семендуевой. Зоя Юноевна дарафди э Союз нуьвуьсдегоргьо Догъисту. Ведешендеи шогьиригьо шогьир дофус зере омори э Москови литературни журналгьо. Ведешенде омори дуь гуьрд сохде омореи э зугьун уруси – «Хэлгъ-бердегор» ве «Мэгlни, метлеб ве муьгьбет».

Э декабрь 1992-муьн сал Зоя Юноевна рафди э Исроил. Э Исроил ведиромори се книг дестонгьо Зое Семендуевой. Эну дестонгьо дофус зере омори э гуьрд сохде оморе «Говлеи» ве дофус зере омори э Исроили литератури-публицистически альманах «Мирвори».

Зоя Юноевна э 1988-муьн сал ведешенди гуьрд сохде оморе дестонгьо «Эки сенгъ ёргири. Бовор сохденуьм», э коминики дарафди ведешенде шогьиригьо э догъи-жугьури зугьун ве тержуьмесохе эну дестонгьо э зугьун уруси. Э 2007-муьн сал ведиромори книг «Духдер эн дуь бебе», э коминики бири дешенде енумине пьеса ве овосуне ве сеимуьн ведешендеи шогьири – «Дедей лешгерчи», 2012-муьн сал.

Эз 1999-муьн сал дарафди э Союз нуьвуьсдегоргьо – оморигьо эз Кавказ (Исроил).

Эз 2008-муьн сал Зоя Семендуева ве шувер эну Ахом (Алексей) Семендуев (уре гьемиге нум «Хахам», чуь э иврит мэгlэнолуь бире «эгъуьлменд») бэхшвегиргьо э проект тержуьмесохи Танаха э догъи-жугьури зугьун. Омборе дануьсдеигьо э догъи-жугьури зугьун ве синогъи кор дофус зереи Зое Семендуевой ве шувер эну кумекии дори барасилуье веровундеи проекте.

Зоя Семендуева келе сохди пенж сечсохдение гlэилгьоре (Игорь – инженер вокурдегор, Евгения – архитектор, Тамара, Семён ве Светлана), комигьоки бэхшири уре нуьгь невегьо ве шаздегь нишрегьо. Шогьирие мэгlрифет шогьир доре омори э духдергьо Тамаре ве Светлане, ве э неве Даниэль Семендуев, коминики сохдени зиёдгуьгчегие тержуьмесохи дестонгьо ве мэгlнигьо эз иврит э уруси ве эз уруси э иврит.

Мэгlрифет Зое Юноевне Семендуевой эри гьеммишелуьги дарафди э хэзинегьо догъи-жугьурие шогьири. Э вэхдгирошдеи гьемме зиндегуни хуьшде, куьнд те песини рузгьо, не поисдеи тэгlриф доре Ватане, хэлгъ хуьшденире. Эну дестонгьо ве шогьиригьо гlуьзетсохди э товун муьгьбет ве дусди, гъосуьт довгlои ве шолуми, игидьети ве ветовусдеи кавказии хэлгъе.