Э 2018-мун сал Келей благотворительный фонд СТМЭГИ Герман Захарьяев нори меселе эри офуре программаре эри вомухте не дошде зугьун жугьурире. Э и вэхд хубе нетиже сохде омори, веровунде омори фирее не дуразе программе эри дошдеи не вомухдеи зугьун жугьурире.
Эхири салгьо зевер бири мерэгъ вомухдеи зугьун жугьурире. Гереки данусдеки, эвел э Кавказ зигьисдегорой кифлет жугьури э гъэд хуне эдембирут гоф сохде э зугьун жугьури, оммо нисе данусдебирут дуз хьэт нуьисте (оммо нисе данусдебирут соводлуье литературни зугьун). Био данимки, э гьейсэгIэти вэхд э Йршолеим омбардеки келетегьо войсдени хубте вомухут зугьун хуьшдере. И бири себеб эри вокурде курс жугьурире э клуб келетегьой э кавказие бинелуье мескен эн Хадера, комики бири 9-муьн ноябрь э фонд «СТМЭГИ-Исраэль» не жиге муниципалитет гуьре.
Э гьунжоовурдегор гьисди: жигегир сервор Хадера Натан Левиев, рэхьбер фонд «СТМЭГИ-Исраэль» Роберт Абрамов, директор не проектор фонд «СТМЭГИ-Исраэль» Марьяна Яшаева, координатор эн отдел абсорбции (э проектой межлуьс жугьуро гуьре) Альберт Соломонов не нушудорегор гьемшегьери социальный отдел эри келетегьо одомигьо, Берта Эффе не Лири Ахрак.
Клуб келетегьо эри зенгьой жугьури бине дешенде омори е сал пушо. Инжиге гировунде оморени нубой физкультура, лекцигьо, мастер-классгьо не жуьр-бу-жуьрелуье творческий шохьонгумгьо эзир дес мэхьлумой шекуьлкеши, комики эде нубо доре э клуб, гьемиге гировундени экскурсие э вилеет. Программей клуб эдей гирошде э хьисобсохи мерэгъ нушудорегорой межлуьс жугьурирево.
Пушой нубо бири бирмундеи Н.Левиев. Руз эхэйрбу дореи гьеммере, симантубу сохд вокурдеи курсе, гуфди ченгъэде вожиби дошде не вомухде зугьун имуре. Бэгъде тониш сохд э мэгIлуьм жугьурирово Майя Мататови, комики сер гирд нуборе эз эпиграфо-посвященией зугьун иму.
Зугьун дедеи гъэдимини,
Зугьун бебе, дедей мени.
Ченд девргьоре у гирошти,
Сес хуьшдере темиз дошд
Майя Баруховна ихдилот сохд екем эз хьушде не эз гъэдер корсохи мэгIлуьми хьушде, гьисдигьо 40-сал, 20-нэ эз у нубой жугьури дори э школей Дербенд. Е сал эде нубой жугьури доре эри школьникгьо э синагогей кавкази «Оэль Шушэн» э Хадере.
Бэгъде М.Мататова сер гуьрди бинелуье темере «Зугьун дедеи гереки!», не ихдилот сохди чендгъэде вожиби дошде зугьуне эри келебире гIэйлойму. «Тейте согъи зугьун, согъи миллет!»- гуфти ю. МэгIлуьм гьелем гоф веровунд эз довгIо э Иершолэим, хундэ бэгъдэ ризэ эз тозэ шогьирномей хьушде:
ГIэзизе дусдгьо, гьич фурмуш месохит,
Чуь гирошдиге руз 7-муьн октябрь
Э вилеет Исроил.
Биз-Биз бире муйгьой сергьо,
Э согъ жендек лерз офдоре,
Дире гьэдерсуьзе вэхьшиетире,
Нушу доретгьоре хамисгьо…
Гьуш дошдэ бэгъде ихдилот Майере эз гъэлхэндчией Хори Иершолэим, омбардэки зенгьо гIэрс тигьи сохдут. Эн омбардекишу неве-нишре э фронтут, эри гъэлхэнд мундей вилеет. Эри дуьл зенгьоре веберде не сокит сохде ишуре, хунд мэгIни э войгерово:
Шоре рузгьо виношит,
Мозол ве ники
Дуьлесдигьо пес мунде
Вегиним динжи
Песдениге мэгIлуьм куеки сохт вомухде не хунде э зугьун жугьури тонише девизэ «Ам Исраэль Хай!» – «Гъэйм Исраэль Зиндеи!»
Э суьфдеи нубо фикир доре омори эри вомухде 3 хьэрфгьо жугьури. Зенгьоре доре омори кор э хунэ: вомухде и 3 хьэрфгьоре не келме данусде.
Рэхьникбу сохденки Майя Баруховна ловгьо хосд эри буьтун жэгIмет:
«Э зеверсер иму темизе асму бире, шалуми гердо э гIуьлом!».
