25-муьн июль, э регион оморебируьт министр энергетике Уруссиет Сергей Цивилев, жигегиргьо министр гъэлхэнди вилеет А.Цивилеве ве П.Фрадков.

Э аэропорт гъуногъгьоре вохурди сервор Догъисту Сергей Меликов. Э ёр овурденим, э июнь Сергей Меликов вохурдебу э Сергей Цивилевевоз. Умогьой рэхьбер республике министре огол зеребу бегьем шинох бире э гъозиеревоз э жиге.

Корлуье рафдеи министр сер гуьрде оморебу эз гуьрдлеме э товун пуьрсуьшгьой параменд сохдеи энергокомплекс Догъистуре. Пуьруьш сохде оморебу овхьолет корисохи электроэнергитически комплесе, хьозуьрлугъи эки гермидоренигьо вэхд, э кор венгесдеи программей зевер сохдеи муьхькемлуьи электросетевой еклуьгире.

Сервор регион э гуьрдлеме гуфди, чуьки бинелуье тигъэт доре оморени дуь тарафгьоре – хьозуьрлугъи эки поизи-зимисдуи вэхд ве программей зевер сохдеи мьухькемлуьи электрорасундеире.

«Гьееки э уревоз, ме хьисоб сохденуьм, программере гереки дегиш сохде, чуьнки у э вэхди ю не сохде э песой гъэдер зевербире хэржигьоре. Омореи ишму гирошдени э г1эрей веровундеи везифегьоре, комигьореки э пушой иму нори Хьуькуьм Уруссиетлуье Федерацие, ве рэхьгьоре комигьореки иму э сернуьш хьуькуьмевоз пуьруьш сохдебирим э Кавказски инвестициони форум. Воисдени гье гене эз ишму согъбоши гуфдире. Имидлуь биренуьм, чуьки имбурузине вохурдеи иму ве омореи э Догъисту миду хубе барасигьо»,-риз кешири Сергей Меликов.

У гьемчуьн диеш гуфдири, чуьки республике гъис сохдени ки э дуразовуне эни салгьо Министерство энергетикей Уруссиет гъувот дорени республикере. Эз поревоз кор сохдени зутее штаб.

Эз нубот хуьшде, федеральни министр риз кешири, чуьки везифей корлуье рафдеи – э пуре тегьеревоз фегьм сохде четинигьой отрасле ве бире гъозиегьоре, нисе гьишденигьо параменд бире уре.

«Э Сергей Алимовевоз иму и пушогьо вохурдебирим э Москов, гоф сохдебирим э товун бинелуье четинигьо, оммо мере воисдени винире, чуьтми чорегьоре иму гьееки миданим гъобул сохде жерге кор эри дегиш сохде гуьнжуьнде оморигьо овхьолете.

Э г1эрей хьозуьрлугъи эки рафдеи э Догъисту ме дануьсдем, чуьки системе энергорасундеи республике э вэхд совети бу еки эз хубтеигьо. Ве эгенер бебегьо ве келе-бебегьо дануьсдет сохде уре хубте э Союз Совети, ег1ни, ве иму дануьсденим. Эри эну имуре гьисди гьемме гъувотгьо ве минкингьо. Иму э пушой хуьшде нореним везифе – сохде Догъистуре, чуьтам э вэхд совети, еки эз хубтее системе энергетике»,- риз кешири Сергей Цивилев.

Э вохурдеи э рэхьбергьой республикеревоз сервор Министерствой энергетике РФ гуфди, ки эри дегиш сохдеи овхьолете ве кемсохи гъэдер хуьрд-хэсде биреи э электросетевой еклуьги Догъисту вожиби веровунде жирелуье чорегьо.

«Хьозуьр сохдеи  жирелуье программей параменд сохдеи электроэнергетикй регионе рухьсет доре гъэрор сохде гьисдигьо четинигьо ве э хьэвес венгесде песдеине зевербиреи экономике»,- риз кешири Сергей Цивилев.

Гьемчуьн министр гуфди, чуьки э республике э кор венгесде оморени программе зевербиреи муьхькемлуьи электросетевой еклуьгире: «Чорегьо фуьрсоре омори эри нисд сохде е ченд салгьоревоз кура биригьо четинигьоре кор ве расундеи корисохи электросетевой еклуьгире».

Эзуш бэгъэй, фегьм сохде оморебу е жерге зиедие э гуьнжо овурденигьо-технически коргьо.

Бешгъэлуь, зевербири гъэдер хэржисохи электроэнергиере эри э хьэвес венгесдеи хэржисохдегоргьо доре муьзд электроэнергие э прибор хьисобсохи гуьре, веровунде оморени чорегьо не гьишдеи гъонунсуьзлуь екбиреи эки электросетьгьо ве гъонунсуьзлуье «майнинге».

Сервор энергетикеи хьуькуьм диеш гуфдири, чуьки эри зевербиреи имидлуье энергосистемере Республике Догъисту э гьеминони ве зимисдуине вэхд лап омбор хэржи сохдени электорэнергиере э 2024-муьн сал еоре миев ве дегиш сохде миев 38 трансформаторгьо э дуьруьжде зевербиреи э 300 МВА.

Министр энергетикей Уруссиет Сергей Цивилев гьемчуьн рафдебу э ярмаркей коргьо э топливне-энергетически еклуьги эри бэхшвегиргьо ве ветерангьой СВО. Ярмаркере э гуьнжо овурди Минжофои Догъисту. Э еклуье мейдон кура бирет корсохгьо ве кордорегоргьо эз сферей энергетике.

Жиге кор нушу дори ижире корхонегьо, чуьн «Уруссиетие сетьгьо Софун Кавказ», «УрусГидро», «Газпром э г1эререгионгаз Махачкале», «Даггаз», «Дагэнерго», «Дагнефть», «Газпром трансгаз» ве екигегьо. Гьемчуьн нушу дори жиге кор эз соводлуье идорегьой республики ве эз бинелуье мескенгьо кор дореи могьлугъе.

Гьемчуьн э Хуней дусди министр энергетике Уруссиет Сергей Цивилев сер кешири сиротбирмундеи «Г1эилгьо игидгьо, доригьо зиндегуни хуьшдере э хотур Ватан». Инжо нушу доре омори эз 130 сиротгьо г1эилгьо омбарте эн бэхшвегиргьо СВО, сирот зере оморигьо э бебегьой хуьшдеревоз. Э гьер сирот венори омори QR-код, эз коминики г1эмел миёв хунде э товун гъозиегьой зиндегуни лешгерчи. Хэёл г1уьзетлуьсохи ергирире э ижире тегьеревоз биренге ергири телеф бире гъовхобергьоре гьисди э хьисоб биезен эн кавалер орден Мердьети (эз уьлуьм эулое) Патимат Пайзулаеве. У ихдилот сохди э министр э товун проект.

Э товун артгьой рафдеире министр ве сервор регион жугьоб дорет э пуьрсуьшгьой журналистгьо.

Гьемчуьн э г1эрей корлуье омореи эн федеральнигьо фегьмсохгьо жигегир министр гъэлхэнди Уруссиет Анне Цивилеве ве Сергей Меликов сер кешири догъистуни филиал фонде «Гъэлхэндчигьой Ватан». Идоре вокурде омори э июнь гирошдигьо сал. Фонд ккмеки сохдеи э игидгьо ве гъовумгьой энугьо э вегуьрдеи гьемме доре оморенигьо чорегьой гъувотдореире, э у хьисоб медицински ве социальни хубте сохдеире, психологически кумекире, техникеи овгъотгьо хубте сохдеи ве санаторно-курортие хоси, дегишсохи дананире, жиге кордореи ве диеш екиге.

Нушудорегоргьой рэхьбергьой Мингъэлхэнди РФ ве сервор регион фегьм сохди утогъгьо филиале. Анне Цивилеве дори бэхшгьо хубтее гьемкоркигьой фонде.

Гье инжо гировунде омори дуьтарафие вохурдеи Анне Цивилеве ве Сергее Меликове. Пуьруьш сохде оморебу чорегьой гъувотдореи бэхшвегиргьой жирелуье довг1ои операциере. Сервор республике ихдилот сохди э товун гировунде оморенигьо э регион кор.

«Гьейсэг1эт иму гьисдим э мескен фонд, эже мибу вохурдеи э игидгьой имуревоз. Согъбоши, эз у товун чуь дануьсди доре ижире хубе жиге ве экуьнди гьисдигьо э министерство жофои ве социальни гъэлхэнди, эзу товун ки гье у корисохи десден дуь э екиревоз. Гьелбетте, ижире гуьрд сохдеи корсохгьоре – лап тигъэтлуье ве рэхьмлуье одомигьоре, комигьоки инжо кор сохденуьт»,- гуфди жигегир министр гълхэнди.

Сервор республике согъбоши гуфдири эз Анне Цивилеве эри доре оморенигьо тигъэт эки республике ве эри гировунде оморенигьо кор э товун параменд сохдеи фонде.

«Эри иму у лап вожиби: социальни гъувотдореи лешгерчигьоре ве кифлетгьой энугьоре гьисди еки эз вожиблуье везифегьо. Э и тараф иму сохдейм омборе кор эз сергуьрдеи СВО. Оммо воисдени шиновуьсде гъиметдии ишмуреш, кумекие тэг1рифноме ве несиг1эт доре эри эну, чуьки иму у коре диеш ве хубте сохим»,- гуфди у.

Э эхир вохурдеи Анне Цивилеве ве Сергей Меликов меслэхьэт сохди э ветерангьоревоз ве гъовумгьой бэхшвегиргьой СВО. Э г1эрей вожиблуье гъосуьтгьо – кумеки соххдеи э  бэхшвегиргьой жирелуье операцие, эн гьемме эз кифлет угьо ве гьеммишелуьг э ёргири гьишде телеф бирегоргьоре. Э пуьруьшсохи бэхш вегуьрдебируьт лешгерчигьо, дедегьой лешгерчигьо ве нушудорегоргьо жэг1метлуье идорегьо.

Сергей Меликов согъбоши гуфдири эз дедегьой лешгерчигьой Догъисту несиг1этдоре игидгьоре. У г1уьзет сохди Салижат Мазаеве, дедей суьфдеи Игид Уруссиете э СВО ве желдлуье бэхшвегире ве э гуьнжоовурдегор ватанхогьилуье коргьоре.

«Иму сер зереним э пушой кифлет эн суьфдеи Игид Уруссиетие Федерацие, эн бэхшвегир жирелуье довг1ои операцие, ве э пушой эну зенгьо, комигьоки имбуруз инжо кура бирет. Иму зуьндегьо, ве гьееки ёгъин дошде мибу ёргири э товун кукгьой ишму э гьер кифлет, э гьемме Догъисту. Мере воисдебу согъбоши гуфдире эз ишму э нуботлуье гиле э товун несиг1этдоре гьэгъигъэтие игидгьоре»,- руй бири эки бэхшвегиригьой вохурдеи сервор Догъисту.

Сергей Меликов ихдилолт сохди э товун жирелуье гъисмет гьер лешгерчи СВО. У э ёр овурди торих кавалере ордене Мердьети Азамат Мамаеве, коминики шинох бири э софхоне э войгей хуьшде гуьре кумекии дорегор Дарьеревоз ве лап э и зури э кумекии рэхьберисох республике возире мибу э уревоз г1эруьси.

Екиге бэхшвегир вохурдеи – сернуьш жэг1миетлуье идоре «Ёргири догъгьо» Махач Шамилов. Сергей Меликов г1уьзет сохди, чуьки у гуьнжо оморде омори э хьэвес хуьшдени бэхшвегиргьой СВО ве бирмунде миев э гьемме муниципалитетгьо.

«Идоре гьейсэг1эт э гъэдер вэг1эдо гуьнжо овурде миев, имуре нисе воисдени инжо ебобот зуте гуфдире, чуьки у гуьнжо оверде омори. Кор э уни, чуьки эгенер у э имуре региональни, имуре воисдени, чуьки у бири ловсохдеи ве хьэвес бири кумекии доре э гьемме муниципалитетгьо, эри чуьнки кор эни идоре ёгъин ужире вокурде оморе «эз хори». Ме имидлуь бирнуьм, чуьки э омборе жире иму гьемиге кумекии вегуьрде эзи идоре»,- риз кешири сервор республике.

Анне Цивилеве согъбоши гуфдири эз Сергей Меликов эри желдлуье гъувотдореи бэхшвегиргьой СВО.

Жигегир министр гъэлхэнди вилеет г1уьзет сохди бэхшвегири сервор регионе э гъэрорноме четинигьой лешгерчигьоре, ошкорлуьи энуре ве тигъэтлуьире.

«Лап шор биренуьм, кейки сервор регион дануьсдени гьемме нумгьой одомигьоре ве гъисметгьо у одомигьоре. И, гьелбетте, лап вожиби, бирмунушини ве гьисди меселен эри екигегьо»,- гуфдири у.