Се орине э е сал, э г1эрей таанит 17-муьн Тамуз ве 9-муьн Ава иму гуьрденим ёс э товун вечаруьнде оморе Битемигъдош ве э сереботи ведекуьрдеи эвреи ве дин-дог1оти, э коминики иму те имбуруз гьисдим.
17-муьн Тамуз (имисал 23-муьн июль) сер гуьрдени вэхд се оринеи, коминики гуфдире оморни «Бейн хаМецарим» — се ориней ёс э хотур ёргири вечаруьндеи Суьфдеи Битемигъдоше ве Дуьимуьн Битемигъдоше, ве бегьем сохде оморени бэгъдовой 9-муьн Ава.
17 Тамуз – гье у руз, коминире гьисде лап лугъонде ве келе фикир эри хэлгъ жугьури. Иму виниреним, чуьки э и руз э жире-бе-жирее салгьо торих эн хэлгъ иму гирошдебу жире-бе-жирее бедбэхде гъозиегьо, комигьоки сохдебу и рузе руз могъбулли. У рузгьо вогордунде имуре эки Худо ве рэхь доре имуре дегиш сохде хуьшдере хуьшдере эки хуби.
Э торих хэлгъ жугьури 17-муьн Тамуз – руз хэтокори. Э Талмуд, э Таанит, шуморуш сохде оморени пенж хэтокоригьо, гирошде оморигьо э у руз.
1 Моше-рабейну хуьрд-хэсде сохди Сенгъ весиете виниреки суьрхине гуселере, комиреки сохдебируьт келетегьой иму э сэхьро;
2 Э вэхд гъулбенди Иерусалиме э гье у руз поюнде оморебу овурдеи гьеррузине гъурбунире «тамид» э сереботи эну, чуьки минкинсуьз бу овурде расунде гъурбуни сохде оморенигьо хьэйвуйгьоре, ве у бири жирей оморенигьо биг1эдотие хэребеи;
3 Чуьтам ихдилот сохде оморебу нови Ирмеяу (серне 52), 9-муьн Тамуз э вэхд гъулбенди Ершолоим э деврон Суьфдеи Битемигъдош бири хуьрд сохде оморебу дивор шегьер, оммо э деврон Дуьимуьн Битемигъдош гье ижире гъозие бири 17-муьн Тамуз;
3 Апостомос, сердор эн падшогь Антиох, сухунди Тироре, варасиреки, чуьки эз гьемме дузе рэхь э гъульети вегирде жугьургьоре – зере э дин-дог1отие овгъот энугьо; сухундеи Тироре бири сергири пишсохи жугьургьоре ве еки эз вожиблуье вогьне гъолхмиши Маккавеевгьо;
4 И руз э Битемигъдош норе оморебу статуе буьт. Э гуьрей е хэел, у биребу э деврон Дуьимуьн Битемигъдош ве гьемчуьн у бу еки эз коргьой Апостомос; э е хэелиге гуьре (гьечуь гуфдире оморебу э Иерусалимски Талмуд), уре падшогь Иудеи Менаше, коминики рэхьбери сохдебу э деврон Суьфдеи Битемигъдош ве «мэг1луьмлуь бири» э уревоз, чуь «батмиш сохди Ершолоиме тэхсирсуьзе хуневоз» ве сер зере э буьтгьо, зевер бири эз пушебирегоргьой хуьшде.
Рузгьо эз 17-муьн Тамуз те 9-муьн Ава эри хэлгъ жугьури хьисоб сохде оморени зобуне рузгь, э ёр гуьрдеи э товун эни гъозиегьо хьохомгьой иму, тог1ин сохдет гъонунгьой есе. Е бэхш энугьоре сер гуьрденуьт дошде эз 17-муьн Тамуз.
Э и рузгьо г1эилгьоре ве хундегоргьоре жозе доре герек нисди. Г1эмел нисе оморе рафде э «хэтолуье жигегьоре»: хьэвуьзгьо г1ови, дерьёгъ ве диеш. Руз, эз сэг1эт 10 те 5 шев герек нисди рафде э одомисуьзие жигегьо.
Операциегьо ве угьонигее медицински коргьо, коминигьоре г1эмел миёв сохде бэгъдовой 9-муьн Ава, э и вэг1эдо сохде герек нисди. Гуфдире оморени, чуьки и хубе вэхд нисди эри восдоре хуне, эзу товун ки мэг1луьмсуьзи мэг1дон гье у терсиреи, г1эмел миёв уре руьхсет доре те тоземегьи ав. Эз 17-муьн Тамузе музык гуш доршде нисе оморе, вежегь-вежегьо гироваунде нисе оморе вежегьисде ве г1эруьсигьо гировунде герек нисди.
Э у рузгьо герек нисди хьэк ве ранг зере, вокурде, эгенер э у нисди жирелуье вожиби, кошде мэхьсуьл э хотур дуьлхоши ве кеф-хьэзсохи.
Эз 17-муьн Тамуз мугьоре ве рушгьоре чире герек нисди, молгьо восдоре герек нисди. Гьемме э зевер нуьвуьсде оморигьо гъонунгьо ве г1эдотгьо сер гуьрденуьт кор сохде шев. коминики оморе расире бэгъдовой руз 16-муьн Тамуз. Оммо э сефардски жэг1миет дин-дог1оти омбардекигьо эзугьо и г1эдотгьоре гуьрднуьт энжэгъ эз 1-муьн те 9-муьн Ава. Жирелуье гъонунгьо гьисди эри мэг1луьмей 9-муьн Ава – руз вечаруьнде гьердуь Битемигъдошгьоре. Таанит 9-муьн Ава сеч бирени эз угьонигее ёслуье тэг1нитгьо – у лап тижлуьни. Гьемчуьн гьисди жирелуье гъонунгьо 10-муьн Ава, кейки Ершолоим диеш элов зере э г1этош.
Миё бу разисохдеи Худоре, чуьки зуте вокурде биевв Битемигъдош ве рузгьо хьэйфбери дегиш бире дуьлшорлуье ве шоре миг1идгьоревоз!
