Холинчесохдеи гьисди еки эз гъэдимие усдоети э вилеет. Гъовумрэхьбер жирелуье усдоети хьисоб бире суьфдеи зен э хори Хава, комики вегуьрде тилисимлуье бэхш ве дори хэлефгьо эн хуьшдере. Э гьемме вэхд, кавказски холинче э дес гуьрде фирегь пуьрсиреи ве, эгенер винире э торихие гирошдигьо жуьгьургьо догъи, гIэмел миёв э боворини гуфдире, чуьки омборе эз нушудорегоргьо хэлгъ эн иму дерсгьо хьозур сохдеи холинчеие бизнесе.
Э холей Валерево, усдо э холинчерево, ме бирем шинох эз гIэильетирево. У гьисди зен леле Бесендиле, бирор келедедей Шунамит. ГIэилитие салгьо эн ме гирошди э хьэёт, комики бири э Дербенд э куче нум Буйнакски 54, унжо зигьисди кифлет гене бироргьо келедедей: Юнетене ве Дониле.
Э у дуринее гIэилие салгьо, ме бежид бирем э гъуногъ эки лелей Бесендиле ве зегIэмлей Вале. Кейки э 1970-муьн салгьо веди бире телевизор, иму гIэилгьо хьэёт эн иму дарафдейм эки угьо, эри чуь винире гIэилие передачигьо. Э кифлет Юсуфовогьо бири норе э сиро келе холинчеие станок. Мере беген винире коргьо сэхьиб хунере, комики бухче э песой бухче ранге-бе-рангие русму мол бофде нуботлуье холинче, песде сер гуьрде зере шенде бухчере, е ченд гиле.
ЗегIэмлей Вале бири усдо э тозе ден сохдеи гъэдимие холинчегьо, у дануьсде мэгIрифет гъуьч сохде келе сула э холинче, гуйге унжо не бири четини. Эз гьемме Догъисту омори эки эну одомигьо, комики овурди холинчегьо эри тозеден сохде.
Гене зегIэмле Вале Ханукаевне вегуьрде бофдоние русму эз Дербентски холинчеие корхоне ве дори коргьо эри омборе зенгьо. Э ёр гуьрде, чуьтам ме э келедедей Шунамитево э руз бофде дуь гермие пешмие журуб эри лешгерчигьо Лешгер Совети. Э першобот, пушой Шоббот, зенгьо хьэёт эн иму буьржуьнде нун «нунтонуи». Дегесунде гIэтоше э чоле эри буьржуьнде нуре, ве сер гуьрде сохде гиргинее нугьо. Песде хьозуьре нуре дечире э сипие перзине. Иму гIэилгьо гьеммише бирейм куьнд, денишире э гIэтош ве тобдоре денишире, кейки имуре доре лезетлуье ве тозе «нунтонуи».
Ме согъбоши гуфдиреи Ларисере, духдере зегIэмлей Валере, комики ихдилот сохди э ме э товун гIуьзетлуье рэхь зиндегуни эну. У гуфдире э товун, чуьки дедей эну зенде оморе э 1929-муьн сал э шегьер Москове э кифлет Хануко ве Марисе Пинхасове ве дори уре нум жуьгьургьо догъи Болбике, бире э фикир эз гофгьо «гIэсел ве бике». Э ижире нумево зигьисде э шогьнишон Союз Совети бири зобу, деде-бебе дори уре дуьимуьн нум Валентине. Бебей эну Хануко Шуминович кор сохде те довгIо э министерстве буруние фурухдеи, э жиге мэгIрифет э фурухдеи ве тозеден сохдеи мизрэхьие холинчегьо.
Те сер гуьрде Келе довгIой Ватани Вале варасди хьэшдсалире, холинчеи школере ве кулинарни хундеи, бэгъдовой комики кор сохди келеи кейвони э еки эз москови ресторангьо. Кейки бебей эну Хануко рафди э войгей хуьшде гуьре э довгIо, Марисе э чор гIэилгьорево (Валентине, Юсупове, Семенове ве Нинерево) гировунде э де мескениге э Дербенд, чуьки асант гировунде довгIоие салгьо э ён гьовумгьо. Оммо Хануко Пинхасов нисе вогошде э хуне, у рафде расиреи э есири э 1941-муьн сал, бэгъдовой довгIо гьовумгьо эну гьичиш нисе дануьсде э товун гъисмет эну.
Э сайт ме офдем жиге битехьэим сохде э Московски Востряковски битехьэимгьо товушлуье ёргири Марисе Юсуповне Пинхасовой (1903-1970). Э сенгъ ёровурди эзуш бэгъэй гьисдигьо муьрдегор э ёр овурде нум шуьвер энуре Хануко Шуминовиче Пинхасове (1898-1941) ве куке Юсупе Ханукаевиче Пинхасове (1931-1997).
Хануко Пинхасов, кук Юсупе-Йосифе, зигьисде э Иерусалиме. ГIэилгьо Вале лап воисде офде кифлет бирорзере дедея.
Бесендил, шувер Вале бирени эри эну гъовум, деде-бебе эн угьо Хануко ве Ягудит гъовумлуье бирор ве хэгьер. Угьо зен хосдеи э 1947-муьн сал, угьоре пенж гIэили, комики э кифлетгьо эн хуьшдерево зигьисде э исроиле шегьер Хадере. Келеи кук раби Юно Юсуфов бири раби э нимаз э нум Ягутиэле Адамове э шегьер Ор-Акиве. Ве гене чор гIэилгьо: Рае, Илюше, Ларисе ве Саше. Э гье у шегьер зигьисде хэгьер Вале-Нине, биезен мэгIлуьмлуье жуьгьур-догъие шекуьлчи Шалуме Шалумове. Нине Ханукаевне варасунде дуь московски вокурдение институтгьо, омборе салгьо кор сохде серворе инженер э Мосхьуькуьмвокурдеи. Э зир рэхьбери эну э шегьер Баку бири бегьем сохде те эхир дуь келе вокурдение объектгьо.
Товушлуье ёр Вале-Болбике Юсуфове-Пинхасове рафди эз зиндегуни э 2000-муьн сал, битехьэим сохде э шегьер Хадере. Духдер эну Ларисе, комики кумеки дори мере нуьвуьсде и ихдилоте, гуфдире э ме, чуьки дуь сал песево у гъуногъи бирем э Дербенд, эже винири одомигьоре, комики гьелемиш э келе хьуьрметлуьирево ёр овурди э товун усдое зегIэмлей Вале.
