Сернуьш Хьуькуьме Догъисту Абдулмуслим Абдулмуслимов бодо доре гьемме коргьоре догъистуние одомигьоре э 26-муьн агропромышленни бирмундеи «Суьрхине поиз», комики гирошде. Э «Тимирязев-бине» э Москов. Эки 40 молведешендегоргьой Догъисту шинох сохде хоригъуллугъсохие молгьо эн хуьшдере э бирмундеи.
Э бирмундеи «Суьрхине поиз-2024-муьн» бири шинох сохде омборте 100 жире молгьо эз 40 молведешендегоргьой Догъисту. Премьер-министр Догъисту бирмунде, чуьки жиге бирмундеи – хубе минкини эри нушу доре барасигьо хозяйствой дигьбони регионгьо «Республике Догъисту гьисди, э чуьревоз сикеи сохде. Имбуруз иму вегуьрде суьфдеи жигегьо э Уруссиетие Федераци э молведешендеи дошдеи молгъэрере ве битмишидорие молгьоре. Гьемчуьн иму шинох сохде э ширие молгьоревоз, комики жугьоб доре гьемме талаби ве нишоне хуби, у герекие э уруссиетие фурухдеие жигегьо. Келе пуьрсиреи э кор венгесде догъистуние гушдие молгьоре, гьемчуьн емишгьо, онгур, хьэвуьжгьо»,- гуфдире Абдулмуслимов.
Желдлуье параменди э песини салгьо, э гофгьой Абдулмуслимове, вегуьрде ве корхонегьо э молведешендение дишове молгьо: «Э Республике Догъисту кор сохде се корхонегьо, комики э сер технически тозе сохдеи жугьоб доре песени талаби. Ве э бирмундеи бири шинох сохде дишовгьо эз корхонегьо «Амбре», дишовгьо Кикунински корхоне, дишовгьо корхоне «Ириб». Гьемме угьо э вэхд ю герек гьисдигьо э фурухдие жиге».
Э песой се руз кор сохдеи бирмундеи бире вохурдеи э товун гьемкоркии э жире-бе-жирее корхонегьоревоз. Догъистуние молведешендегоргьо вохурде э бизнесменгьоревоз, корсохдегоргьоревоз ве молеовурдегоргьоревоз эз жире-бе-жирее регионгьо Уруссиетие Федераци. Гьисди гьевел игърол бесдеи э омборте 10 регионоревоз, комики воисде овурде э регионгьо эн хуьшде догъистунигьо хоригъуллугъсохие молгьо, гье у Московски, Челябински областьгьо, республике Марий Эл ве еккейгегьо. Э догъистуние бирмундеи серкеширегоргьо дануьсде дэгlэме винире гьеммей молгьоре.
«Эн иму дигьбониемолеведешендегоргьо вегуьрде 25 бэхшгьо, э у гъэдер 15 суьрхине, 9 нуьгъреи ве 1 буьруьнжи. Гьемчуьн воисде бирмунде Комитете эсер духдиргьой хьэйвуй хунеи РД, комики вегуьрде Гlуьзетлуье бэхш Министерстве хозяйствой дигьбони Уруссиет э песой у кор, комики гировунде э республике эсер секонеисуьзи. Эгенер вегуьрде эн иму хоригъуллугъсохие гlилме, у гьемиге гъобул сохде инжо бэхшвегири э руй Федеральни хоригъуллугъсохие гlилмие бине. Э песой еки эз эн хуьшде дофусзереи, дофуси э товун гусбенддошди Догъисту, угьо вегуьрде суьрхине бэхш Министерстве хозяйствой дигьбони Уруссиетие Федераци. Эзуш бэгъэй суьрхине бэхш вегуьрде Кикунински консервни корхоне», — ихдилот сохде у.
Омборте 10 регионгьо вилеет ве келе фурухдение тургьо мерэгълуь бире догъистуние дигьбоне молгьоревоз э «Суьрхине поиз»
Догъистуние молгьо э корисохи бирмундеи мрэгълуь бире лап келе фурухдение тургьо.
Э бирмундеи э нушудорегоргьой корхонегьой эн иму ве корсохдегоргьо бири вохурдеи э нушудорегоргьоревоз фурухдение тургьо «Магнит», «Фуд-Сити» ве еккейгегьо.
Абдулмуслим Абдулмуслимов гъобул сохде бэхшвегири ве э бинелуье корисохи бирмундеи «Суьрхине поиз»-жэгlмие гуьрдлеме э гъосуьт: «Уруссиетие агропром-2030: рэхьгьо барасигьо технологически рэхьбери».
Э гъэд корисохи бирмунде Сернуьш Хьуькуьм Уруссиет Михаил Мишустин, министр хозяйствой дигьбони РФ Оксана Лут, серворгьой регионгьо, нушудорегоргьо бизнесе ве сэхьиблугъи жэмигlэт.
Бэхшвегиргьо пуьруьш сохде, чуьтам иму дануьсде песде доре хуреклуье секонеисуьзи, гьемчуьн фегьм сохде коргьо ве рэхьгьо бегьем сохде те эхир тозе миллетлуье проекте
«Технологически дореи хуреклуье секонеисуьзи».
Э гуьрдлеме е гъэдер расире пуьрсуьшгьо мироси. Догъисту молгъэредорие регион, унегуьре желди гировунде селекционно-племенные коргьо. «Имбуруз э иму уже гьисди когъозгьо э гуьнжо оморе э гъэджинсие жире догъистуние догъие жинс. Хьэйвуй хунеи э хубе гушдевоз мибу хуте бире эки геммейсалине гиёвлугь гирдеи ве догъие-отгонни бердеи дошдеи молгъэрере», — бирмунде Абдулмуслимов.
Еккейгегьо герекие рэхьгьо – гье у тумверовундеи ве кошде веровундеи. Э и рэхьгьо э регион веди бире кимигьо гъичи э дореи тумгьоре.
Федеральни хоригъуллугъсохие гlилмие бине э кори сохдеи дуь э екиревоз э еккейгегьо гlилмие идореровоз, ижире, чуьтам меселен синогълуье станции Гьеммейуруссиетие институте битмишидори, комики гьисди Дербентски жиге хундеи гуьнжолуьи жинсгьо э хьэвуьжгьо, келеме.
Дуь сал песево э Догъисту э пулгьой республикански бюджетевоз бири вокурде теклуье э Софун Кавказе микроклональная лабораторие. Унегуьре сер гуьрде эз онгурверовундеи ве хьэвуьжгьоверовундеи ве э гьемме екейгегьо хоригъуллугъсохие рэхьгьо гlилмие коргьо э сер генетике гировунде.
Еккейге рэхь, комики гереки тозе миллетлуье проекте, — гье у дореи корсохгьой АПК: Э республике э угьорвоз келе четинигьо, гъэгьтии корсохо гьисди ве еккейгегьо регионгьо вилеет. Э товун эну э бирмундеи эн хуьшде гуфдире министр хозяйствой дигьбони РФ Оксана Лут.
Гьемчуьн Абдулмуслим Абдлмуслимов ихдилот сохде, чуьки бире е гъэдер расире гъосьут э бегьеми гъэдер ветеринарни дермугьо. Э вохурдеи э рэхьберевоз АО «Росагролизинг» э Павлом Косовым пуьруьш сохде пуьрсуьшгьо дореи технике эри догъистуние хоригъуллугъсохдегоргьо.
