Сервор Догъисту Сергей Меликов гировунди зурие бинере эсер нисдсохи эзуновлейге бире гъозиере сайловгьоре. Э у гъобул сохди бэхшвегири рэхьбергьо идорегьо хьуькуьме, нушудорегоргьой МЧС, серворгьо шегьергьо ве районгьо. Профильни рэхьбергьо ихдилот сохди э товун гировунде коре.

Гьемме идорегьо хьуькуьме ве зурие тегьер сохде оморе гъуллугъсохигьо гировунде омори э зиёдте гъувот дореие гуьнжолуьи коре, э гуьнжо овурде омори кумекии э боло офдоре зигьисдегоргьоре.

Сервор Бинелуье рэхьберисохи МЧС Уруссиете э Республике Догъисту Муслим Девришбеков гуфдири э товун гирошденигьо овхьолете иловлеире ве гировунде оморе корисохигьо.

Э мэгIлуьмет дореие войгегьо бири э гуьнжо овурде кори сохдеи дуь э екиревоз э идорегьоревоз рэхьберисохи РСЧС, пушокие фикир берди расунди те муниципальни соводигьо, доре омори СМС-хэбер экуьнди 2 млн одомигьо.

Серворгьоре 35 муниципальни соводигьо доре омори несиетгьо э товун дешендеи гуьнжолуьире эри гъувотгьо ве овгъотгьо гьемшегьерие десде.

Беди овурди эки гъонунепузмишигьо энергодореире э 22 муниципальни районгьо ве Махачкале. Омборте 500 гьозор зигьисдегоргьо республике мунди товушсуьз.

Омори омборте 300 мзгIлуьметигьо э товун кучмиш биреи ворушие гIове э батмиш сохдеиревоз кучегьоре ве э пушой хунегьо э Махачкале, Дербенде, Избербаше, Хасавюрте, Дагестанские Огни, гьемчуьн э Дербендски, Магарамкентски, Сулейман-Стальский, Табасарански, Хасавюртовски, Карабудахкентски ве Докузпарински районгьо.

«Хосденум хьуькуьме э кор венгесде пуьрсуьше дореире пуллуье кумекии дореи муниципалитетгьоре эри нисдсохдеи ЧС ве эзуновлейге бире гъозие энуре. Сайловгьо те 50 мм веди бире э гьеммей Догъисту. Гьисди четинигьо э энергодореиревоз. Омборте четиние гъозие э шогьнишони хосденум доре герекие кумекии»,- гуфдири Сергей Меликов.

Муслим Девришбеков, э хьисоб дешенде пушокие фикире гьовой рузгьоре, бирмунди э келмевоз дешенде э регионе гуьнжолуьи зевербиреие хьозуьрлугъи. С.Меликов кумекии дори войгере.

Гуьнжолуьи жирелуье гъозие уже дешенде омори э Махачкале. Батмиш бири экуьнди 20 жейлее хунегьо, риз гъэдерлуьи гIове э жигегьоревоз бири 1,5 метргьо.

Гьемкоркигьоревоз МЧС Уруссиете гировунде омори зиёд темизсохи хокоруре э куче Заречная, веди бире офдореи гIове. Эз батмиш бире хунегьо ведеберде омори омборте 70 одоми

Чуьтам мэгIлуьм сохди сервор шегьере Джамбулат Салавов, хьуькуьм эн серкори хьозуьр сохди экуьнди 150 жигегьо эри гьелелуьгее офдеи жиге дореи э боло офдорегоргьоре. Жигегьо гьелелуьгие зигьисдеи лов сохде омори э бине Профессиональни- педагогически колледже, Махачкалински финансово-экономически колледже ве дуь гъуногъхонегьо.

Сервор шегьере гьемчуьн э ёр овурди, чуьки шегьерие гъуллугъсохигьо гировунде омори э зиёдие гъувотдореи гуьнжолуьи коре, гировунде оморе нисдсохи эзуновлейге бире гъозиегьо, гьер хунере э иловле гешдеи, э гуьнжо овурде омори кумекии э боле офдорегоргьоре.

С.Меликов гъэдэгъэ зери гъувоте зиёд сохде гъэлхэндире объектгьоре энергетике ве газедореире э Догъисту.

Э вожиблуьи – Махачкале, эже имбуруз омборте четиние овхьолет иловлеи.

Э сер гереклуьи ПАО «Россети Северный Кавказ» хьозуьри вегуьрде кумекии эз екейгегьо регионгьо, риз кешири э нубот эн хуьшде сервор компани Роман Левченко.

Гьеймогьой «Дагэнерго» кор сохде э зиёдие гъувот дореие гуьнжолуьи: э кор венгесде омори омборте 80 десдегьо. Гъэдер товушсуьзе зигьисдегоргьо уже кем бири э 200 гьозор.

«Коре мибу зиёд сохде. Шев гузет сохде кемсохи воруше ве кулоке, чуьки гьишдени омборте кор сохде э хуьшде дировундеи электродореире. Э догъие ве дуринее районгьо гьисди четинигьо э рафде раиреиревоз. Хэьэрекети мивеним те сергири товушие рузе веровунде гьеммере эри зигьисдегоргьо»,- гуфдири суьфдеи вице-премьер республике Манвел Мажонц.

Гьемчуьн гьисди четинигьо э омореиревоз гIове э Махачкале, Дербенде ве Хасавюрте.

Гьеймогьой кор схденуьт 53 десдегьо эри дозеден э хуьшде дировундеи гIоведореире, гировунде оморе гиперхлорирование гIове ве э гуьнжо овурде омори овурде расундеи гьенжирее гIове эри зигьисдегргьо.

Э товун овхьолете рэхьгьоре ве транспортни объектгьоре э Догъисту хэбер дореи вице-премьер Ризван Газимагомедов.

Транспортни ве рэхьие идорегьо гировунде омори э зиёдие гъувот дореи гуьнжолуьи коргьоре э шеви-рузи гъуллугъсохиревоз. Аэропорт ве дерьёгьие фурухдение порт кор сохде чуьтам гьеммише. Биреи борде-бор дуь жигегьо рэхьовуние куьрпире э муьлк Хасавюрт-Кадиюрт Северо-Кавказски рэхь овуни. Э жиге кор сохденуьт министр транспорте ве нушудорегор РЖД. Э сереботи батмиш биреи поисдеире Тарки э дигьбон Хуьшет жуьмуьсдеи поездгьо гьелелуьге поюнде омори.

Гьелелуьге сэхд сохде омори муьлк рэхье э Акушински, Ботлихски, Гунибски, Гумбет овски, дахадаевски, Докузпарински, Каэбековски, Сулейман Стальски, Курахски, Чародински, Хунзахски районгьо.

Э Махачкале э бесдеиревоз э зевербиреи гIове э нуькере Талгинке ве тигьи биреи э автомобильни рэхь «Махачкале-Аэропорт» эки Каспийск (км 3-км 4) четин бири жуьмуьсдеи автотранспорте.

Жуьмуьсдеи э федеральни рэхь Р-217 «Кавказ» э муьлк км 819 – км 821 эз дуь лой бэгьем сэхд сохди, кор сохде сенигIэткоргьо ве рэхьие технике эри тозеден э хуьшде дировундеи транспортни жуьмуьсдеире.

Гьемме медицинеи идорегьо республике, э гофгьой министре дошдеи жунсогъире регионе Ярославе Глазове, кор сохде э гьеммишеине жире. Десдегьо зурие кумекии гьемчуьн кор сохденуьт чуьтам гьеммише, ёгъинире дануьсдеи министр.Зурие тегьер медицинеи гъуллугъсохигьоре доре омори хьозуьр сохдеие дермугьоре.

Э гуьнжолуьи зевербиреие хьозуьрлугъи кор сохде ве «Дагмелиоводхоз». СенигIэткоргьо гировунде еклуье фегьмсохдеи овхьолете гIовие объектгьоре, гидротехнически вокурдеигьо ве гье белки гъувотсуьзе муьлкгьоре.

Зиёдгъэдерие ворушгьо овурди эки хэребеи гъирогъе нуькерегьо Черкес-Озень ве Тарнаирке ве эки четин биреи гидрологически овхьолете э шогьнишон республике. СенигIэткоргьо Минприроде РД дуь э екиревоз э гьемкоркигьоревоз подведомственни идорегьорегьоревоз нисд созхдеи дегмишире э гIовие жигегьо.

Роспотребнадзор Догъистуре зуте мэгIлуьм сохди э товун зобу биреи гIове бэгъдовой батмиш биреигьо. Идорегьо несиет доре дуьшуьнде гIове эри гьенжире енебуге эз шише гьенжире.

Сервор Догъисту гьимете дори гъобул сохдеи гъэдергьоре ве дори герекие гъэдэгъэгьоре эри желдие коре. Э сер гъэдэгъэгьо Сергее Меликове э гьемме муниципалитетгьо лов сохде зурие бинегьоре, рэхьберисохи коре эсер тозеден э хуьшде дировундеи инфраструктурере ве дореи кумекии зигьисдегоргьоре.