Догъистоние бирмундеире МIТТ-2026 фегьм сохдет экуьнди 15 гьозор одомигьо. Эри иму бэхшвегири э ГIэрейхэлгъие бирмундеи эн сафари ве гъуогълугъи бири хубе гIэдот. Пенж сал пес песоки республикей иму бэхш вегуьрдени э и мероприятие. Имисал э и мероприятие бэхш вегуьрди эз 900 компаниегьо омбарте эз 40 вилеетгьой гIуьлом.

Нушудорегоргьой эн идорегьой сафари, гIэрейхэлгъие хьовиргьо ве гъуногъгьо э келе мерэгъэвоз шинох бирембируьт э минкингьой эн республикей имуревоз. Ве и хубтее субут энуни, ки Догъисту боворинлуь муьхькем сохдени жигегьой хуьшдере э сафарлуье карте эн вилеет. Э артгьой эн бирмундеи гуьре республикере доре омори бэхш э боржбери «Вожиблуье сафарлуье регион». Э песой эни поисди келе кор – параменд сохдеи инфраструктурере, э гуьнжо овурдеи тозе рэхьгьоре, э пушо бердеи базургендире ве гIэдотгьой эн хэлгъгьой Догъистуре.

Э бирмундеи иму бирмунде оморебу тозе сохде оморигьо сафарлуье программегьо эри тозе вэхд. Гъуногъгьо мерэгълуь бирет э интерактивни картей эн миллетлуье рэхьэ «мэгIэсегьой Догъисту» — у минкин дори э е ченд минут рафде э виртуальни сафари эз догълуье районгьо те Каспийски гъирогъ дерьегь ве винире жир-бе-жирелуье минкингьоре эри форигъэти вегуьрдеи.

Гьелбетте, муьхькем сохдембируьт ологъигьоре э де субъектгьоревоз ве э вилеетгьоревоз. Гирошди сугьбетгьой игъролбесдеи э десдеревоз эз Султанат Оман, игърол бесде омори э китайски хьовиргьоревоз э товун гировундеи шинох биренигьо сафарире эри дуьруьжде идорегьой сафари, гъуьл кешире омори разимендигьо э товун еклуье корисохи э регионгьо ве компанимегьой Уруссиетевоз. Ижире ологъигьо вокурденуьт зиедие минкингьоре эри параменд сохдеи отрасле, мерэгълуь сохдеи пулдешендеигьоре ве э пушобердеи Догъистуре э гIэрейхэлгъие риз.

Э Сал еклуьги эн хэлгъгьой Уруссиет регион бирмунди бинелуье верзуьши хуьшдере – дусди эн одомигьоре, дошдетгьо базургенди хуьшдере ве гуьрд сохде оморигьо э жэгIмие торихевоз ве э жэгIмие биевгьоревоз.

Одомигьо э хьэзевоз шинох бирембируьт э гIэдотгьой эн хэлгъгьой имуревоз, фегьм сохдембируьт хуьшдере э усдое-классгьо эн хэлгъие шекуьллуье мэгIрифетгьо ве э хуьшдеревоз бердембируьт екем базургенди Догъистуре.

Воисдени согъбоши гуфдире эз э гуьнжоовурдегоргьой бирмундеи эри буьлуьнде риз гировундеи мероприятиере. Ве, гьелбетте, жейлее согъбоши эз сервор эн Министерствой сафари эз Эмин Мерданов, эз гьеммей десдей иму ве эзугьо ки хьозуьр сохдебируьт бэхшвегири республикере. Э хотур кор ишму Догъисту бирмунде оморебу гьечи рач ве верзуьшлуь э келе гIэрейхэлгъие мейдун. Мерэгъ эки республикей иму зевер бирени – ве иму ире виниреним эз гъэдер гъуногъгьо, эз тозе сафарлуье рэхьгьо, эз тигъэт хьовиргьо ве эн пулдешендегоргьо. Диеш омбаре одомигьоре воисдени вокурде эри хуьшде Догъистуре – догъгьой энуре, дерьегье, мерэгълуье торихе, гIошире базургендире ве дорундуьлие кавказки гъуногълуьгъире.

Иму песдеш э гуьнжо миорим овхьолете, чуьнки сафарчигьо мерэгълуь бошут оморе э республикей иму. Ве гьерки, ки е гиле миов э инжо, егъин мивою вогошде гье гене э песой тозе нушудореи!