Жигегир эн Сернуьш Хьуькуьм Догъисту Муслим Телякавов бэхш вегуьрди э гуьрдлемей эн Министерство соводи ве гIилми РД.
Э гуьрдлеме бэхш вегуьрдет сернуьш эн Комитет э товун соводи ве гIилми эн Гуьрдлемей Хэлгъи РД Елена Павлюченко, министр соводи ве гIилми эн Догъисту Яхья Бучаев, рэхьбергьой эн министерствогьо, эн соводие идорегьо ве тербиедоренигьо жэгIмиет эн республике.
Э гIэрегьой план руз Министерство соводи ве гIилми эн республике гировундет артгьой корисохире э сферей соводи эри 2025-муьн сал ве вихдет бинелуье везифегьоре ве вожиблуье тарафгьой параменд сохдеи системей соводире эн Республикей Догъисту эри 2025-муьн сал.
Эз нуминей эн Сернуьш Хьуькуьм РД э бэхшвегиргьой коллегие шолум гуфди вице-премьер Муслим Телякавов. «Не денишире э хубе дегишигьой параменд сохдеи соводире э регион, э гофгьой эн жигегир сернуьш гуьре, э республике мундени е жерге четиние пуьрсуьшгьо: зевер сохдеи гъоимлуьи соводире, расундеи э гIуьлмие риз уруссиетлуье соводире. Везифей иму не дегьишде е коминиш гIэдотлуье тегьере эки гъэрорсохдеи э пушо норе оморигьо везифегьоре, и расирени э гьемме тарафгьой корисохи эн системей соводи, э и хьисоб ве зевер сохдеи верзуьшлуьи сенигIэт тербиедорегоре»,- риз кеши у.
Гьечи, эз 2025-муьн салевоз республике сер гуьрди желдлуь э кор венгесде тозе миллетлуье проектгьоре «Жовонгьо ве гIэилгьо», «Кифлет» ве «Корсохгьо». И проектгьо э артгьой эн гирошдигьо сал гуьре барасилуь э кор венгесде омори. Рэхьбергьой республике жейлее тигъэт дорени э зевер сохдеи гъоимлуьи математически ве естественни-гIилмие соводире, э параменд сохдеи сенигIэтлуье классгьоре, э ер овурди М.Телякавов: энжэгъ расунденки э жигегьо барасилуь э кор венсдеи э гуьнжо овурде оморигьо инфраструктурере, норе оморигьо оборудованиере э гIэрегьой эн э кор венгесдеи миллетлуье проектгьоре ве хьуькуьметлуье программегьоре, иму миданим расире э гереклуье барасигьо э параменд сохдеи технически соводире.
Пуьрсуьш гъувотдореи зугьунгьой дедеире ве зевер сохдеи тигъэте эки четинигьой хундеи энуре гуфдиребу Сервор эн Республикей Догъисту э Фуьрсореи эки Гуьрдлемей Хэлгъи эн Республикей Догъисту пор.
Яхья Бучаев: Э Фуьрсореи гуфдире оморебу, ки гереки э гуьнжо овурде тегьергьой хьэвеслуь сохдеи хундегоргьоре хунде зугьунгьой дедеире э школегьо.
Э гIэрей э кор венгесдеи гъуллугъгьоре э ноябрь 2025-муьн сал э республике тогIин сохде омори хьуькуьметлуье программе «Дошде, хунде ве параменд сохде хьуькуьметлуье зугьунгьой эн Республикей Догъистуре». Эз 2023/2024-муьн хунденигьо салевоз э республике э кор венгесде оморени проект эри хундегоргьой эн 1-муьн-4-муьн классгьо «Догистуйме. Улке , э комики ме зигьесденуьм». Пор гьемчуьн тогIин сохде план коргьо э товун зевер сохдеи гъоимлуьи хундеире э нубогьо «Зугьун урусси», «Литература», «Зугьун дедеи» ве «Родная литература».
Э республике гировунде омори 70 мероприятиегьо эри хундегоргьо ве тербиедорегоргьо.
Э пура тегьеревоз э товун барасигьо, расире оморигьо э сферей соводи э товун артгьой эн 2025-муьн сал, э бэхшвегиргьой коллегие ихдилот сохди министр соводи ве гIилми эн Догъисту Я.Бучаев.
Артгьой кор эри гирошдигьо сал тогIин сохдени барасилуье корисохи эн региональни хьуькуьмгьоре ве мэгIнолуье дешендеи эн республике э соводие ве жовоне политике эн вилеет. Жейлее тигъэт доре оморебу желдлуь бэхш вегуьрдеи регионе э кор венгесдеи миллетлуье проектгьоре: «Жовонгьо ве гIэилгьо», «Кифлет» ве «Корсохгьо». Барасилуье гъэножогъире эки веровундеи э пушо норе оморигьо везифегьоре доре омори буьлуьнде гъиметэ федеральни риз.
Э 2025-муьн сал гъуьч сохде оморебу 9 школегьо, 2 богъчегьой гIэили ве дуь корпусгьой общежитие эн сенигIэтлуье соводие идорегьо.
Эз хьисоб пулгьой эн республикански бюджет гъуьч сохде омори диеш пенж школегьо ве е богъчей гIэили.
Э гIэрегьой э кор венгесдеи инфраструктурни мероприятиегьой эн миллетлуье проекте «Жовонгьо ве гIэилгьо» э 2025-муьн сал э 1134 школегьой эн республике норе оморебу овгъотгьой хундеи ве нисигIэтдореи эри тербие доре хунденигьо нубогьоре «Бинегьой секонесуьзи ве гъэлхэнд сохдеи Ватане» ве «Жофо (технологиегьо». Э план гуьре денишире оморени ки э 2026-муьн сал э кабинетгьо эн 1134 школегьо норе миев оборудование эри нубогьой «Физике», «Изобразительное искусство» ве «Музыка».
Э 2025-муьн сал республике гьемчуьн берди грант эри э гуьнжо овурдеи соводие кластергьоре эн миенее сенигIэтлуье соводире э сферей мошинвокурдеи ве эн мэгIлуьмсохие технологиегьо. Э плант гуьре денишире оморени ки проект э кор венгесде миев э 2026-муьн сал.
Э гуьрдлеме гьемчуьн гуфдире оморебу, ки э 2025-муьн сал э республике э кор венгесде оморебу чорегьой расундеи пулсуьзе хурекхурире эри эз 7,5 гьозор школехундегоргьо омбарте. Дуь гиле хурек доре оморени 869 шуькесте гIэилгьоре.
Я.Бучаев риз кеши, ки э Догъисту барасилуь э кор венгесде оморени Гьеммеуруссиетие проектгьо э сферей эн школьни идмон ве зиедие соводи. Э гьемме школегьо э гуьнжо овурде омори школьни идмонлуье клубгьо, кор сохдени театральни кружокгьо, гьемчуьн школьни футбольни лигегьо.
М.Телякавов эз Министерство соводи ве гIилми эн Догъисту ве эз корсогьой эн системей соводи эн республике гуфдири согъбоши эри хэйрлуье барасигьо, хосденки эри энугьо желдлуье ве хубе кор.
Э артгьой эн коллегие гуьре сеч биригьо корсохгьой соводире доре оморебу бэхшгьо.
