Жигегир Сернуьше Хьуькуьме Уруссиетие Федерацие Дмитрий Патрушев гировунди корисохие вохурдеи э Серворевоз Республике Догъисту Сергеем Меликовым.
Бинелуье гъосуьтгьоревоз бири барасигьо региональни хоригъуллугъсохие гуьрдноме, гьемчуьн пуьрсуьшгьоэкологие, э у гъэдер корисохи веровундеи проектгьоре э иловле э кор венгесдеи э муьхькемлуье коммунальни хокоругьоревоз ве везифегьо эсер параменди инфраструктуре.
Сервор Республике Догъисту ихдилот сохди э товун корисохи вечирение кампани. ГъейсэгIэт вечиреи тэхуьли э регион гировунде омори э мейдун эки 103 гьозор гектаргьо. Сергей Меликов гьемчуьн мэгIлуьм сохди э товун дуьруьжде бараси бирмунушигьо э коргьой хозяйствой дигьбони. Зурие зевер биреи молгьо АПК э республике э песой гирошдигьо сал гуьнжуьнде омборте 106 % – гье у буьлуьнде бараси э песини дегьсали, комики гьишде регионе дарафде э топ-10 субъектгьо РФ эсер гьисдигьо бирмунуши. ЖэгIмие доруние гъэдер моле ведешендеие хоригъуллугъсохие молгьоре зевер бири 252 млрд монет. Э песой гирошдигьо сал ве суьфдеи ниме гирошденигьо зевер бири бирмунушигьо э ширие ве гушдие молгъэредори.
Эзуш бэгъэй у, э вохурдеи пуьруьш сохди технически овурде расундеи ве корсохие дореи сэхьиблугъире.
Гуфдире э товун тебиетедошдеие коргьо, вице-премьер бирмундеи тигъэте э кор регионе э иловле э кор венгесдеи э муьхькемлуье коммунальни хокоругьоревоз. Э догъисту веровунде оморе се проекте. Дмитрий Патрушев гъэдэгъэ зери бегьем сохде вокурдеи угьоре э е гъэдер вэхд, комики разилуьире вегуьрде эз Минприроде Уруссиет ве ППК «Уруссиетие экологически оператор», чуьнки эз гье у межбур биреи дореи хушхьоли одомигьоре. Эзуш бэгъэй, э вэхд ю вокурдеи гьемчуьн корисохи э барасигьо бирмунушигьо миллетлуье проекте «Экологически хушхьоли».
Э гъэд миллетлуье проекте «Экологие» э Республике Догъисту берде оморе кор эсер нисдсохи гъонунсуьзлуье омборе гъэдере хокоруре, гуьнжолуьи объектгьоре офдеи жиге дореи муьхькемлуье коммунальни хокоругьоре, темиз сохдеи хьэвуьзгьоре ве вишере тозеден э хуьшде дировундеи. Э гье у везифегьо эз федеральни бюджете доре омори омборте 9,5 млрд монет. Э гъэд миллетлуье проекте «Экологически хушхьоли» коре э гьисдигьо рэхьгьо мибу зиёд сохде.
