Сернуьш эн Хьукуьм Республикей Догъисту бэхш вегуьрди э вожиблуье мероприятие эн Петербургски гэрейхэлгъие экономически форум – э пленарни гуьрдлеме э комики бэхш вегуьрди Президент Уруссиет Владимир Владимирович Путин. Гуьрдлеме гировунде оморебу э бирмунденигьо меркез «Экспофорум» э шегьер Санкт-Петербург.

Имисал бинелуье гъосуьт эн форум бири «ЖэгIмие верзуьшигьо – биней зевер биреи э омбареполярни гIуьлом. Имисал э ПМЭФ бэхш вегуьрденуьт нушудорегоргьой эн 145 вилеетгьо.

Э сессие гьемчуьн бэхш вегуьрдебируьт Президент эн Республике Индонезие Прабово Субианто, меслэхьэтчи э товун миллетлуье секонесуьзи, сервор эн Падшогье гвардие эн Падшогьети Бахрейн Насер Бен Хамад Аль Халифа, жигегир премьер эн Хьуькуьметлуье меслэхьэт эн Китайски Хэлгъие Республике Дин Сюэсян ве Вице-президент эн ЮАР Пол Машатиле.

Сервор хьуькуьмет Владимир Владимирович Путин гъимет дори экономикей Уруссиете ве бирмунди бинелуье тарафгьоре эри параменд сохдеи уре. Гьемуьн у тигъэтсуьз не гьишди минкингьой эн гIэрейхэлгъие экономически еклуье корисохире ве вердуьш биреи эки четинигьой эн омбареполярни гIуьлом.

Меселен, Президент Уруссиет гуфдири э товун торихлуье зофру биреи риз корсуьзи те 2,3%, зевер биреи ВВП ве зофру биреи риз косиби э Уруссиет. Гьечи, корсуьзи э Софун Кавказ кем бири э дуь гиле, и лап хубе бирмунушини, риз кеши Владимир Путин. Гьемме э вилеет риз корсуьзи 2,3%.

Вожиблуье везифе эри 2025-муьн сал Владимир Владимирович нум дори гирошдеи экономикей вилеете эки гьеммишеине зевер биреи. Эри дуь салгьо э нишоневоз хуб сеч бири дигьлуье хозяйство, корхонегьо, вокурденигьо комплекс, логистике, сферей гъуллугъсохи, пулгьо ве IT-корхонегьо, енебуге гьемме бинелуьегьо, эри экономике вожиблуь гьисдигьо корхонегьо эн ватанлуье экономике.

Неденишире э гьемме четинигьо, э гофгьой эн Президент гуьре, ВВП эн Уруссиет гьер сал зевер бирени эз 4% омбарте. Гьечи, э сали ю эри гирошдигьо вэгIэдой эни сал диеш зиед бири 1,5%. Гьемчуьн гуфдире оморебу, ки Уруссиет э суьфдеи жигеи э Европе э товун эн жэгIмие гъэдер экономике. Владимир Путин гъуллугъ дори Хьуькуьме ве регионгьоре хьозуьр сохде омбаревэхдине план параменд сохдеи экономикей дананире ве фикир сохде э сер жейлее федеральни проектгьо.

«Вожиблуье везифей иму эни сал – расунде гирошдеи экономикере э мескен эн гьеммишеине зевер биреи. Чуьни и? Иму ире варасиреним э ижире тегьеревоз, ки иму мие расим э миенее гъэдер зевер биреи гъиметгьо ве кеме корсуьзи. Э даннигьой статистике гуьре, е салине зевер биреи гъиметгьо зофру бири те егъинлуье бирмунушигьо – эз дегь процент кемте. Эри 16-муьн июнь у гуьнжуьнде омори 9,6%. Гьелбетте, э инжо кори сохди чуьтам желдлуье кор эн Хьуькуьм э товун параменд сохдеи экономикере, гье гьечуь жугьобдорлуье корисохигьо эн Меркезлуье бонк. Гьееки э уревоз э сер чуь воисдембу тигъэте чарунде: дегиш сохдеи зевер биреи гъиметгьоре параменд бирени хубте, эз гузет сохде оморебугьо омбаре фегьмсохгьо ве эз пушоки гуфдиреигьой эн Бонк Уруссиет. И минкин дори сер гуьрде селигъэлуь нерм сохде пуллуье-кредитни политикере»,- жугьоб дори В.Владимирович Путин э нушудии хуьшде.

Сернуьш Хьуькуьм Догъисту А.Абдулмуслимов андуьрмиш сохди пленарни гуьрдлемере ПМЭФ-2025, э комики нушу доребу  Президент Уруссиет Владимир Путин.

«Бинелуье доклад эн пленарни гуьрдлеме – эн Президент Уруссиетлуье Федерацие Владимир Владимирович Путин – омбар гуфдире оморебу э товун экономике, параменд сохдеи уре э овхьолет гъэдерлуье терггьо. Омбар Президент ве спикергьо гуфдиребируьт э товун параменд сохдеи корхонегьоре, — э суьфдеи нубот гъэлхэндлуье корхонегьоре»,- гуфди премьер министр Догъисту.

Президент гьемчуьн гьово гуьрдебу пуьрсуьшгьой параменд сохдеи дигьлуье хозяйстворе ве импортозамещение.

«Гуфдире оморебу, ки э товун э де вилеетиге бердеи гендум Уруссиете дери э суьфдеи жиге э гIуьлом. Президент тигъэте до э хуреклуье секонсуьзи, имбуруз э вилеет иму гьемме хуреклуье молгьо вес сохдени. И гуфдирени э товун дузе политике э тараф АПК.

Гьемчуьн гуфдире оморебу ве э товун параменд сохдеи молгьоре тозеден э кор венгесденигьо корхонегьо, и еки эз вожиблуье тарафгьои ве эри экономикей Догъисту. Лап вожиблуьни, ки Президент тигъэт дори э пуьрсуьш мешгуьли, — э вилеет зофру бирени риз корсуьзи, гьемчуьн зевер биреи миенее риз эн мегьине муьзд жофои. Догъисту бэхш вегуьрдени э кор венгесдеи вожиблуье проектгьоре э товун жофолуье мешгуьли, проекте назари сохдени хуьшдени вице-премьер эн уруссиетлуье хьуькуьм. Неденишире э гIэрейхэлгъие гъэдерлуье терггьо, экономикей Догъисту эдее парамнд бире, экономикей эн гьеммей вилеете хуно. Гереки гуфдире э товун кимигьо рэгъэмгьо: риз параменди эн дигьлуье хозяйство э гирошдигьо сал зевер бири э 6,1%, риз эн промышленни корхонегьо э 102,5%»,- гуфди у.

«Э Президент доре оморебу омбаре пуьрсуьшгьо ве э товун овхьолет э Куьнде Мизрэхь, ве э товун СВО. Гировунде оморебу лап мерэгълуье гофсохи. Имуре еклуье согъе политикеи, эзу товун гьемме гирошдени дуз!», — гуфди А.Абдулмуслимов.

Андуьрмиш сохденки артгьой гуьрдлемере, э комики бэхш вегуьрдебу жугьбдорлуье одомигьо эз унигее вилеетгьо, А.Абдулмуслимов гьемчуьн ихдилот сохди, комини нушудии э ер эну мунди.

«Мере лап хьэз омори нушудии эн Президент Индонезие Прабово Субиато, ме хьэрекети мисохуьм офде нушудии энуре э Интернет. Жейле хьэз омори е келме гоф э товун эну, ки у вегуьрдени лап хубтеире эз социализм, ве лап хубтеире эз капитализм. Гьемчуьн хьэз омори, нушудии эн жигегир Сернуьш эн Хьуьукуьметлуье Меслэхьэт КНР эн Дина Сюэсяне, чуьнки бу шолуми, мие бу параменди, эгенер мибу параменди, умогьой ве шолумиш мибу. Гьемчуьн нушудии эн вице-премьер ЮАР эн Пол Машатиле. Э гьемме нушудиигьой эн спикергьо гуфдире оморебу э товун  хуьшхоли одомигьо, дузгунлуьи, и лап вожиблуье везифегьои, э комигьоки иму песдеш мие кор сохим»,- гуфди А.Абдулмуслимов.