21-муьн сентябрь э стадион Нарын-Кала э Дербенд гировунде оморебу 10-муьн гlэдотлуье шегьерлуье боржбери э еровурди эн Игид Союз Совети Абрамове Шетиэле Семеновиче.
Боржберире гьер сал э гуьньжо овурдени СОШ №11 ве боржберире рэхьбери сохдени сервор эн школе №11 Ильканаев Захар Ильяевич.
Э вокурдеи бэхш вегуьрдебируьт:
Сервор идорей базургенди, эн жовонлуье политике ве идмон Нажафове Самиля Сиражутдиновне,
Сернуьш бизнес-жэгlмиет эн шегьер Дербенд, сернуьш эн комитет дедегьо-бебегьо эн СОШ №11 Гаджиагаев Маидин Гаджиагаевич,
Меслэхьэтчи эн векил Уруссиет э Турцие Ярахмедов Аллаудин Насирович,
Э боржбери, комики гировунде оморебу э е ченд бэхшгьо э товун жире-бе-жиреегьо идмон, бэхш вегуьрдебируьт школехундегоргьой шегьер жире-бе-жирее гlуьмуьрлугъи.
«Имбуруз гировунде оморени нуботлуье боржбери, гузет сохде оморигьо э еровурди эн Игид Союз Совети Шетиэль Семенович Абрамов, нум комики доре омори школе №11 эн шегьер Дербенд. И боржбери юбилейнини – дегьимуьн гиле имисал иму гировунденим и боржберире. Боржбери гировунде оморени э се жирегьой идмон – легкая атлетике, чуькле-футбол ве баскетбол. Боржбери бегьем сохде оморенки 11-муьн ноябрь – э руз хьэсуьломореи эн Игид Союз Совети Шетиэль Семенович Абрамов-иму гировунденим артгьоре ве дореним бэхшгьо э и боржбери.
Гlэдотлуь бэхшгьо доре оморебу эз нуминей жэгlмиетлуье корсох Шабатаев Шуми Данилович, сервор эн комбинат вокурденигьо молгьо Нариман Магомедович Мусаев, сернуьш эн комитет дедегьо-бебегьо эн шегьер Дербенд Маидин Гаджиагаев. Везифей боржбери иму – гьеммишелуьг э ергири гьишдеи еровурди Игид Союз Советире, гьеммишелуьг э ергири гьишде у одомигьоре, комигьоки э салгьой Буьзуьрге довгlой Ватани дорет зиндегуни хуьшдере эри азади иму ве эри шолуме асму. Эри гьемме бэхшвегиргьой боржбери хосденуьм жунсогьи, хушхьоли ве бараси. Имисал, чуьн гьер сал, гьемме барасибергьо мибу»,- ихдилот сохди сервор эн СОШ №11 Захар Ильяевич Ильканаев.
Э товун плангьой гировундеи боржберире ихдилот сохди дивунчи Боржбери Курбанов Галим Альбертович: «Э имбурузине боржбери бэхш вегуьрдебируьт экуьнди 20 десдегьо эз школегьой шегьер э товун легки атлетике. Гlэилгьо борж бердебируьт э видовусдеи э 60 метргьо, э видовусдеи э 400 метргьо, э эстафете 3-4 э 100 метргьо. Дивунчигьо э гуьнжо овурде омори эз хьисоб тербиедорегоргьой шегьер, комигьореки гьисди идмонлуье сенигlэт. Э боржбери бэхш вегуьрденуьт эз дивисд школехундегоргьой шегьер омбарте. Нуботлуье бэхшгьой боржбери иму гlуьзет сохде миев э чуькле-футбол ве баскетбол э гlэрей духдергьо. Боржбери э товун чуькле-футбол гировунде миев э 20-муьн рэгъэмгьой октябрь ве баскетбол 2-муьн-3-муьн ноябрь э школе №11».
