Догъисту, э гьемме г1уьлом г1уьзетлуьини э мэг1луьмлуье барасигьо спортсменгьо хуьшдеревоз, ведиромори э тозе риз гъэдерлуьи спорт ве эгъуьлмендлуье параменди!
Э гирошдигьо орине, 30-муьн июль, гировунде омори вокурдеи хьэшдимуьн республикани Боржбери 2024-муьн сал э шахматгьо э г1эрей мердгьо ве зенгьо э бэхшгьо эн Суьфдеи Президент РД Алиев Муху Гимбатович. Эз 40 шахматистгьо омборте эз шегьергьо ве дигьбонгьой Догъисту э вэхдгирошдеи дегьи рузгьо мибу бэхьс берде э г1эрей боржбери э шогьнишоние Хуне шахматгьо.
Бирмунуши уре, чуьки э Догъисту фурмуш не бири шахматни культуре гьисди у бире гъозие, чуьки лап жовоне бэхшвегир боржбери – шешсале Абдумуслим Асмалов, коминики гьисди бердегор боржбери Догъисту 2024-муьн сал э г1эрей кукгьо те 9 сали, оммо эз гьемме келете бэхшвегир боржбери бу 86 сале Александр Пахомов. Бэхшвегиргьо Боржбери миё бэхьс беруьт неки э сереботи хьуьрметлуье нум бердегор, дипломгьо ве медальгьо, оммо ве э монети бэхшгьо. Оммо бэхшдорение гъэдер гъондуьрмишлуьи – 400 гьозор монет. Лап дуьлхоши гьисди ве у, чуь э арт турнир Боржбери мибу кучмиш сохде мердине ве зенуне гуьрд сохде оморе десде Догъисту эри бэхшвегири э Боржбери СКФО 2025-муьн сале э шахматгьо, чуь лап дуьруьжд фирегь сохде серхьэдгьо уьфуьге параменди э гье у рэхь кори эри гьер бэхшвегир.
Э вокурдеи Боржбери гьемчуьн бэхш вегуьрдебу Сернуьш Хьуькуьм эн Республикей Догъисту Абдулмуслим Абдулмуслимов. Э бирмунуши хуьшде Абдулмуслим Абдулмуслимов гуфдири согъбоши эз Муху Гимбатович Алиев эри кумеки сохдеи параменд сохде шахматни идмоне, гьемиге мэг1луьм сохди, чуьки э Догъисту э кор венгесде миев пилотни проект, э г1эрей коминики шахматни тербие вегуьрдеи веди биреи э кимигьо школегьой Махачкале.
И тозе хэбер дуьлшор сохде. Эри, шахматни идмон имбуруз э Догъисту, гьелбетте фурмуш не бири, имуре гьисди мэг1луьмлуье шахматистгьо, гроссмейстергьо, усдогьой идмон, э у хьисоб ве г1эрейхэлгъие риз гъэдерлуьи. Оммо иму, ведини ки, лап гереклуьи мэг1луьм сохде гье и жире идмоне э г1эрей г1эилгьо ве жовонгьо.
Имбуруз, э вэхд омборе г1эрейэрхэлгъие четинигьо, кейки жовоне эрхэгьо нисе варасиренуьт ве нисе мерэгълуь биренуьт э у рэхьгьо ве тегьер параменди, э комигьоки веромори эрхэгьой совети бэгъдовой вэхд советиэз совети, э ухшешие проектгьо гьисди лап гереклуьи.
Гировундеи шахматни тербие дореире – гье у, гьелбетте, доноре э биёвгьо барасигьо Республике э жире-бе-жирее риз гъэдерлуьи боржбери, э у хьисоб ве г1эрейхэлгъие. Оммо лап вожиблуьи эри ме винире у дуьруьжде минкини эгъуьлмендлуье параменд сохдеи вероморенигьо эрхэгьоре, коминики дануьсди расунде эри иму гьисдигьо проект.
Пэхьнии нисди, чуьки гьэгъигъэт гье у жире идмон дори лап дуьруьжде корисохи э параменди буьлуьнде психически корисохи инсоне, парамендсохи ижире вожиблуье хутеи чуь дузини эгъуьлсохи, божерени эхдермиш сохдеи хэбер, э пушоки дире дануьсде, гуьрд сохде тигъэте, омборнуьшде божерени ве диеш. Эзуш бэгъэй, вози э шахматгьо кори кумеки сохде параменд биреи тозе нейронни еклуьгигьоре, чуь лап э вэхд ю герек гьисдигьо имбуруз, э хьисоб дешенде гьеммежэг1млуье лов сохдеи гаджетгьоре, э хуьшдеревоз овурдигьо зофру биреи желдилуьи гьемме зеверте шуморушсохе жерге кор ве божерени.
Воисдени бовор сохде, чуьки гьисдигьо проект мие вогордуну э зиндегуни иму шекуьл эз г1эили эн ме, эже э гьер хуне, хьэёт, бохче г1эмел миёв офде верзуьшлуье боремборе ве мэхсерее тегьер возире шахматгьо. Имбуруз г1эилгьой имуре, омборе бедел, гьинор-мендисуьз енебуге войгесуьз ве кори сохдеи дуь э екиревоз э гьэгъигъэтлуье г1уьлом, гье у бешгъэ гереки. Унегуьре жейле дуьлшорини дануьсде, чуьки Хьуькуьм Догъисту омборе гъувот нори эри э гуьнжо овурде тозе эрхэгьоре – эгъуьлмендлуье парамендбиреи, божеренемэг1рифет дебердеи мэг1энолуье дебердеи э биёвгьой республикей иму ве эн согъ вилеет.
