Гьелбет, э и зуригьо эз ер иму ни ведарав и пушогьо гирошдетгьо гъозиегьо э аэропорт эн шегьер Махачкале, кейки омбаре гъэдер хэлгь Догъисту гьич гъобул ни сохут у нэхирлуье руьхьэ э гIэрей миллетлуье гъэножогъигьо, нушу доре оморенуьтгьо эз тараф кемгъэдерлуье миллетгьо.

Терслуье жире» сесе э гъэршуй эн еки» – гьич не дебири э омбардеврлуье серлэгIэе нуьвуьсдеи жофокеш, эжеки гьеммише буьлуьнд гирде омори номусгири ве гъирьет ве нушу доре оморени э книг Расул Гамзатов «Конституцией догълуь».

Биригьо бири ве гирошди.

Изму иму дануьсденим себеб эн ижире бигIэдотлуье гьозиере. Мерэгълугьоре эрзо сохдет Президент Уруссиет Владимир Путин, Сервор Догъисту Сергей Меликов, омбаре политикгьо ве экспертгьо. Э чуьревоз гьелбет рази не бирет бандеровски режим э Украине,тарафгиргьой Вашингтон, эри комигьоки дуьруеи биреи политически гъэдер хуьшдере бирмундеини. Ижире гIэрей хэлгълуье четине овхьолеткори сохдени э поюндеи зиед биренигьо гъувот ве хьуьрмет Федерацией Уруссиете э гIэрей де вилеетигегьо.

Дешендеи дуьшменире, хуне тигьи сохдеире, гьич вир нибу эз тараф МэгIэрови. Ижире овхьолет эдее тижлуь бире э Украине.

Президент Уруссиет хуб дануьсдени э товун ижире коргьо, ве дорени жогьоб энугьоре.

«Иму хуб варасиреним, эже дериге биней эн ижире зулуми, ки мерэгълуьниге эри зулуми ве бедкори. Уре гировунденуьт у инсонгьо, зигьисденуьтгьо э вилеетигегьой гIуьлом, гьемчуьн э Украине».

В.Путин тогIин сохд, ки и беде гъозие гировунде омори эз тараф агентурей спецгъуллугъигьо.

Имогьой э пушой иму норе омори пуьрсуьш гуьрд сохде омбарегъэдерлуье этносгьоре, гировундеи дусдире э гIэрей энугьо.

Э соцсетгьо нуьвуьсде оморени жире-бе-жире зобунигьо э товун Вилеет Догьи, гуйге дие сафарчигьо эз терс ниев гуфдире э Догъисту, чуьнки у бирмунди хуьшдере эз зобуне тараф.

Изму мие доре биев гьемме хьэрекетигьо эри гуьрд сохдеи гьемме миллетгьоре, зигьисде э дусди ве разименди э жугьургьой догъиревоз, э татгьоревоз, гуьнжуьнде гьевелине хуше овхьолет зиндегунире.

Э гуфдиреигьой Президент Уруссиет гуьре эри гирошдигьо гъозие-гъэдер гереки доре буьлуьнде тигъэте э буьлуьнде уруссиетлуье гьонунгьо гуьре.

Догъистонигьо ошгорлуь бошут ве очугъ денишуьт э гьемме гъозиегьо, гирошденуьтгьо э гIуьлом ве фурмуш не сохут торихлуье земонегьоре.

Гьемме хубе коргьо, комигьоки оморет экиму эз бебегьо, келебебегьой иму, мие гъоим дошде ве доре биевт эри келе биренуьтгьо эрхэгьо э руьхь ве хун ишу гуьре, гьемчуьн жугьургьой догъиш гьисдуьт бироргьой иму. Угьо омбаре девргьо зигьисдет э жэгIмлуье кавказлуье хуне, базургенди, литературе, гIэдотгьой комигьоки ологъолуьнуьт э имуревоз. Энжэгъ жирелуьнуьт эз иму э боворинлуье дин-догIот ишу гуьре.

Догьисту – гьисди чуькле Ватан иму.

Келе Ватан иму – гьисди Уруссиет.