Гьер одоми гъэрезки е гиле э зиндегуни руй биреи э товун гьеркоми бисдо пуьрсуьш э ки векил, эз корсохи ве гъэрорноме коминики омбор межбури э зиндегуни иму. Э товун векил Михаил Амиржуев гIэмел миёв гуфдире се гоф («у суьрхине одоми») хосиетноме дори уре хьэрмэхь.
Михаил гье бирден э десдин дебири эки хуьшде дануьсмендлуье несиетевоз ве шолумие ловехэндиревоз. Михаил гьисди чуьклеи эрхэ исроили догъи-жугьури шивдолуьи, комигьоки хьэсуьл оморет э Совети Союз. У хьэсуьл омори 3-муьн июнь 1986-муьн сал э культури кифлет. Деде, Галине, э духдерине Мушаилове, кор сохди секретари э военкомат Дербенд, бебе, товушлуье ёр Владимир Амиржуев, бири рэхьбер чекмеи ателье. Э кифлет хьэсуьл омори се кук, комигьоки зу мунди бебесуьз, рафдигьо эз зиндегуни э жогьили э гIуьмуьрлугъи 38-муьн сал.
«Э кифлет иму,- ихдилот сохде э товун шивдолуьи хуьшде Михаил,- гьисди гъовум-гъэрдеш эз Азербайджан (Красная Слобода), Догъисту (Дербенд, Махачкале) ве Кабардино-Балкарие (Нальчик). Келе-бебе Захариё Мушаилов (эн деде бебе) хьэсуьл омори э омборе гIэили кифлет э Красной Слободе, уре бу хьэшд сал, кейки кифлет эн угьо гирошдеи э Нальчик, оммо бэгъдовой кимигьо вэхд угьо кучмишбиреи э Дербенд. Эн бебе деде-бебе: деде, Тейло,- дербенди, бебе, Михаил, -хайтоги. Зигьисди угьо э Махачкале. Бебей эн ме е вэхд кор сохди э Дербенд э чекмеи усдохоне э куче Коммунаров, комики э десдин дебиреи экуьнди э мэгIлуьмлуье сиротзереи ателье Ферадже. Бебе бири огол зере э кор э Дербенд чуь хубтее сенигIэткор э гъуьчсохи ве духдеи чекме. У овлодгьолуье чекмечи: э гьееки э бебей хуьшденевоз кор сохди э чекмеи усдохоне, гьемиге бири рэхьберсох чекмеи цех э Каспийск.
Э 1990-муьн сал кифлет Амиржуевигьо рафди э Исроил ве нуьшунди эри зигьисде э Хадере. Эз гIэили Михаил бири соводсевене кук, омбор книг хунди, гьемиге нушудореи хосиет рэхьбери. Эз суьфдеи класс хундеире сохди лап хубе риз гъэдерлуьи ве кумеки сохди э песе мундеи гIэилгьо классе. Э хуней эн угьо, чуьтам э ёр овурде деде Галине, гьеммише омори хьэрмэхьгьой эну, жирее э келеи классгьо. ГIэилгьо оморе бу бэгъдовой школе ве гьееки э хубтеи хундегоревоз Мишеревоз сохди дерсгьо. У, чуь келеи кук, гьуьл дори э хундеи гьемиге бироргьой хуьщдене, Георгие ве Ариэле (угьо гьердуьеки гьеймогьой кор сохдени инженери-вокурдегоргьо). Михаил бири эри эн угьо чуь бебе, гъэрезки хуьшдени бу 15-салине гIэил э дэгъдэгъэ эну гье бирден уьлуьми. Гьеле э салгьо студентии у гене кумеки сохди э хундегоргьо школе эри дануьсде вегуьрде багруте, ве гьеммише варасирени андуьрмиш сохди, чуьтам гье у вожиби – вегуьрде данани. Михаил – варасунде бегьем сохди школе «Тихон Амаль» э Хадере, эже э 2004-муьн сал вегуьрди багрут ве суьфдеи диплом э сенигIэт кори «рэхьберсохи бизнесе ве экономике». Э 2004-2007-муьн салгьо гъуллугъ сохди э гъушун э гъовхо жигегьо. Э гьонине вэхд М.Амиржуев гьисди хьозуьри э гъуллугъсохи доруни.
Э 2009-2013-муьн салгьо хундеи дануьсди гIилм гъонун ихдиёри ве рэхьберсохи бизнес э Академикие коледже Нетание. Вегуьрди диплом лап хубе хундегоре ве суьфдеи гъэдерлуьи категорие LL/В ве эз 2014-муьн сал гьисди бэхшвегир гIэрейхэлгъие корсох векилгьо.
Э 2018-муьн сал э гуьнжо овурди кифлет э духдеревоз Элинор, гъумолетевоз эз Баку (э духдерине Данилове). У гьемиге э сенигIэткори векил.
«Кор хуьшдене э векилии,- э ёр овурдени Михаил Амиржуев,- ме сергуьрдем э 2014-муьн сал э юридическеи ве наториальни десде Джоль Блахсон (товушлуье уре ёргири), комики бири эри ме вомухундегор э дуразовуне гировундеи шеш сал. Чор сал песово ме вокурдем хуьшдени бимихьтожи юридическеи десде. Жиге кор гьисди: Кикар а- Ацмаут, 12 Алеф, шегьер Нетание (нумир телефон: 0524797528). Э куьндлуье вэхд мере гьисди войге вокурде эн хуьшде векилии офис ве э Хадере ве тербиевегуьрдеи э курс нотариате. Бинелуье э гъэд корсохи эн ме дарафдени: хории гIилм гъонун ихдиёри ве дуьрлуьг хунеи, хории муьздвечиреи, алварие ве инсони ихдиёри, весиетноме ве мол мироси. Мере хьэз оморе эз хуьшдени кор, у вожиблуьи ве менфигIэтлуьи: зиреклуье вохурдеи э мерэгълуье одомигьоревоз, бесде игърол ве омборте екигегьо. Боворини, чуьки э сенигIэткори иму вожиблуьи – жугьобдорлуьи.
