Хьол-овхьол мозоли дери э хуьшден иму, э дорун. Гьемме гъэйретлуье зиндегуни уре войге бу духдир бире ве гьеймогьой у хундени э 5-муьн курс медицини университет. Гьеммише воисди хунде дануьсде дин-гIэдотгьоре ве зугьун хэлгъ хуьшдере – ве у гье и сохде. У бовор сохде э хуьшде ве бовор сохде э инсонгьо. Э кифлет у хуте бири дузгунлуье зиндегуние верзуьшигьо – угьоревоз у рэхьберисохи. Э келе хоширевоз ме меслэхьэт сохдем э и раче соводлуье ве гlэсуьлменде духдеревоз. Шинох бошит: Галина Гилядова.

- Сергуьруьм эз динлуье пуьрсуьш: эже ишму хьэсуьл оморейт, эже тербие вегуьрдейт? Комини нуьгдере э карт мидани нум гуьрде чуькле гъовумлуье ватан?

- Ме хьэсуьл оморем э 2004-муьн сал э офтолуье Дербенд. Варасдем э унжо 8 класс, песде гирошдейм э Москов. Мере бу зиёдгуьзелие тербиедорегоргьо ве лап дусдлуье класс. Гьеймогьой ме тербие вегуьрденуьм э медицини университет э 5-муьн курс, э сенигlэт «духдир жэгlмие практике». Мере эз гlэили войге бу духдир бире. Э Дербенд гирошди эз гьемме очугълуье салгьой жовоньети ве гуьнжолуьи ме чуь одоми. Э унжо мере бири суьфдеи хэгьергилигьо, рафдем э кифлетевоз э нумаз «Келе-Нумаз», гlуьзет сохдейм мигlидгьой жугьури.

- Эже зигьисде деде-бебе ишму? Эзжеи гъумолет угьо? Эзжеи гъумолет келетегьо ишму? Чуь миданит ихдилот сохде ишму э товун келедедегьо ве келебебегьо?

- Иму э деде-беберевоз нуьгь сал зигьисденим э Москов. Дедей ме, Раиса, эз Дербенди, бебе, Шумин, эз Губе. Мере гьисди серворлуье жовогьилет, чуьклеи бирорлей ме Саймон. Гъумолет деде-бебе деде эз Дербенди, чуьтам гьемме келетегьой эн угьо, те имбурузине руз зигьисденуьт э унжо. Угьо эз гlэили келесохдегор ме ве гьеммише бири эки ме, мейле гуьрди ве ведабурри иловлере гъэйгъукеширевоз. Э угьо ме лап разилуьи хуьшдере нушу доре эри гьемме, чуь угьо эри ме сохди.

- Гоф сохденуьт ми э кифлет ишму э жугьури? У дешенде омори э книг нисд бирение зугьунгьо ЮНЕСКО. Чуьтами корисохи гереки диеш гировунде, эзуш бэгъэй, чуь сохде фонд СТМЭГИ, эри чуьки зугьун жугьури нисд небу?

- Эри, э кифлет иму гоф сохденим э жугьури – келедеде ве келебебе, гьемиге бебе. Ме эз и пушогьо гьемиге хунде дануьсденуьм зугьун имуре, эзу товун ки хьисоб сохденуьм, чуьки гъовумсуьз зугьун хэлгъ иму вир сохде хуьшдени тойлуье ухшешире. Мере воисдебу, эри чуьки гlэилгьой ме э биёвгьо вэхд гьемиге варасиренуьт мере ве гоф сохде дануьт э жугьури. Мере гьечи оморени, эри жогьилгьо мибу хэйрлуь гировунде конкурсгьо э данани жугьури енебуге шевгьо э догъи-жугьури зугьун, эри чуьки гьерки дануь гоф сохде ве варасире дуь екире.

- Ишму гьисдит желдлуье нушудорегор жовонгьо STMEGI Junior. Ихдилот сохит э товун кор эну.

- Э жовоне клуб STMEGI Junior ме сергуьрдем рафде э 1-муьн курс. Ме хьисоб сохденуьм гье и жигере чуь хуней хуьшде, оммо бэхшвегиргьоре – гьэгъигъэтлуь гъовумлуьигьо. Иму гьеммише гировунденим лап очугълуье менфигlэтлуье мигlидгьо. Ме гьеммише хьэрекети веноре кумекии доре ве мейле гуьрде гуьнжоовурдегоргьой клубе. Кор гьисди ве э кумекии э хэлгlэт венореи, э гуьнжо овурдеи ве э гировундеи жерге кор, эри чуьки жовонгьо дануьсдеи ве оморе.

- Ихдилот сохит э товун э гуьнжо овурдеи ишмуре жугьури мерче Джууро.

- Фикир э товун мерче омори е бирден: ме бежид винирем, чуьтам одомигьо жире-бе-жирее миллетгьо э гуьнжо овурде партал э кор венгесдеи принтгьо э зугьун дедеи ве мере лап воисди екем дэгlэме винире. Мере гьечи оморени, и лап хуби, кейки одоми фирегь мэгlлумлуь сохде зугьун хуьшдере гlэйб нис кешире гешде э парталевоз, комини нушу доре миллет хуьшдере. Ме э кор венгесдем эз гьемме э вэхд ю герек гьисдигьо е келме гоф: «Худо кумек», «Раче духдер», «Жугьургьо омбор гердо» ве екигегьо. Гьеле инсонгьо екиге миллетгьо, коминигьо не варасиренуьт, сергуьрденуьт пуьрсире эз ме, чуь мэгlэнои гье и е келме гоф, угьоре менфигlэти.

- Комини жиге э зиндегуни ишму гуьрде дин-догlот? Комини жугьури мигlидгьоре ишму бешгъэ хосденит?

- Эри ме дин-догlоти – гье и весиети гофсохи э Офирегоревоз. Эз гьемме гьевел, имид биренуьм э у э лап гурунде дэгъдэгъэгьо. Гьечи бу гьеммише ве диеш гьеймогьой, оммо, белкине, эз вэхд гирошдеи э Москов ме омборте хунде дануьсденуьм Туро, гировунде шобботгьо э гьемме жугьури гъонунгьо. Серворлуьи, эри чуьки боворини бу э дуьл ве кумекии доре эри сохде рэхьмедуьли коргьо. Эн ме муьгьбетлуье жугьури мигlид – Ханука. У ухшеши э тилисимевоз, шориревоз. Диеш мере муьгьбетлуьи Рош а-Шана, эзу товун ки эз у сергуьрде тозе сал, вокурде оморе плангьо ве эз гьемме весиети войгегьо э кифлети суьфре.

- Гьисди ми ишмуре муьгьбетлуье жугьури метеле енебуге келме?

- Эн ме муьгьбетлуье метеле: «Лап торике шевеш себэхь гьисди», гье и мэгlэнолуь бире «Гьеле эз лап торике шев верафдени чуьшме».

- Комини эдебиет хунденит? Комини музыке ишмуре хьэз оморе?

- Мере муьгьбетлуьи жире–бе-жирее эдебиет, гьеле эз 12 салеи вечиренуьм библиотеке ве э азадлуье вэхд лап хьэз оморе книг хунде. Ме вечирем экуьнди 180 книггьо, э гъэд угьо эн де вилеетиге классике, гlилми эдебиет, романгьо ве детективгьо. Музыке гуш веноренуьм жире-бе-жирее: мэгlнигьо э зугьун иму, хип-хоп, рэп, шансон.

- Ишму-жогьиле эрхэ жугьури хэлгъ, ве иму, келете эрхэ, бовор сохде э ишму ве э ишму имидлуьим. Чуьтам ишму фикир сохде: комини минкини жогьиле жугьургьоре? Чуь угьоре вес не бире ве чуь угьоре гереки?

- Мере хьэз оморе, чуьки эрхэ иму азадлуь бири э хуьшдени фикир ве гоф. Иму гуфдиреним дим-дуз, эгенер чуьниге хьэз нис оморе, омборте пуьруьш сохденим, вегуьрденим хэйрлуье битlэгlрифи. Гьеймогьой гlэилгьо омборте михьтожсуьзи эз деде-бебе, хьозуьри вегуьрде жугьобдорлуьи эз корисохи хуьшде ве нис терсиренуьт. Ме фикир сохде, чуьки жогьилгьой имуре вес не бире довоми ве войге рафде э разилемиши дуь э екиревоз, омбортегьоре воисдени шенде гьеммере э суьфдеи гурундигьо. Оммо мере гьечи оморени, чуьки еки эз гьемме гъувотлуье хосиет одоми – бэхьс берде ве рафде расире везифегьо хуьшдере.

- Келе согъ боши эри менфигlэтлуье меслэхьэт. Имиди, э нуботлуье гиле иму гоф мисохим, кейки ишму варасунде бегьем мисохит университет ве кор мисохит – кеме вэхд мунди. Барасигьо ишмуре э гьемме сергуьрдеигьой ишму!

Нуьвуьсди Стелла Давыдова

Тержуьмесох Ильканаева И.

Сирот STMEGI