Имисал 80 сали эз руз руз варасдеи Буьзуьрге довгIой Ватани.
Еровурдире э товун эни гьер уруссиетлуье кифлет гьич фурмуш нисохуьт. Иму фурмуш нисе сохденим игидгьой имуре, зиндегуни хуьшдере доретгьо э хотур иму, э хотур шолуми э дуьньёгь.
Имбуруз, ме – Азарьеве Тамаре, — нишрей эн Михаил Фараджев, воисдени э ишму
ихдилот сохде э товун кифлетлуье мироси – гъиметсуьзе шогьодигьой эн эни бигIэдотлуье
довгIо. Ме э дуьллерзиревоз э дес гуьрдем мироси кифлет имуре – чуькле кугьне гъир-
мизине книглере «Военный билет» ве лешгерие чемодан, комигьоки бируьт эн келебебейме – эн Фараджев Михаил
Шафадьяевич.
Хэйф, не ме, не дедейме не винирейм уре. У эз гIэрей зиндегуни рафди лап зу. Оммо гъ-
озией эну эри гьеммишелуьги мунди э имуревоз. Келебебейме э довгIо огол зере оморебу э 1943-муьн сал. У гъисмет биребу э Сталинград (гьейсэгIэт Волгоград), эже векендебу окопгьо ве э лешгерие завуд хьо-
зуьр сохдембу ерэгъгьо. Е гиле экуьнди эну лов биребу ерэгъ ве у демундебу э зир хок. Гьеммейки фикир сохдебируьт, ки у
пуч бири, оммо кейки сер гуьрдуьт темиз сохде – у зинде бу!
Э довгIо у бири эз 1943- муьн сал те 1945-муьн сал, оммо э хуне вогошде омори энжэгъ э 1946-муьн сал. Эри жофой хуьшде уре доре оморебу медальгьо.
Келебебейме хьэсуьл омори 26-муьн октябрь 1912-муьн сал э Догъисту, э шегьер Дер-
бенд. Бебей эну телеф бири э 1914-муьн сал э Суьфдеи гIуьломлуье довгIо ве деде э
тэхьнои дошде веровунди се гIэиле. Келебебе э школе хунди варасди энжэгъ се класс, оммо
келе биренки дарафди э дигьлуье хозяйственни техникум ве бири ветеринарни духдир.
10-муьн сентябрь 1941-муьн сал у фуьрсоре оморебу э 16-муьн жофолуье вокурдение ба-
тальон. У вэхд уре се гIэил бу.
Бэгъдовой довгIо э кифлет эну хьэсуьл омори диеш хьофд гIэил, оммо пенж ээ угьо муьр-
дебируьт э чуьклеи. Ме разинуьм эз кифлет хуьшде эри эну, ки угьо дошдет и мироси-
ре. Гуьрденки э дес военни билете ве чемодан келебебере, ме гьис сохденуьм ологъире
э уревоз, э игидьети энуревоз.
Согъбоши эз гьеммейки, ки э гъимет зиндегуни хуьшдеревоз гъэлхэнд сохдебу Ватан имуре. Келебебегьой иму зиндеи,
тейте зиндеи еровурди э товун энугьо э дуьлгьой иму. Ме имид доренуьм дошде и гъозиере, ихдилот сохде уре э гIэилгьой
хуьшде ве э невегьо, чуьнки екиш фурмуш сохде неёв, гьичиш фурмуш сохде неёв.
Гьеммишелуьгие гIуьзет игидгьой эн Буьзуьрге довгIой Ватанире!
Нана
