Э Догъисту э гьер рузевоз хиникте бирени, кулокгьо омбар бирени ве э и зуригьо гьебелкине ворушгьо миев. Ижире гьовой рузгьо – лап хубе вэгIэдои эри лов биреи жир-бе-жире гIэзоргьо, э и хьисоб грипп ве ОРВИ. Э вилеет иму офде омори 10 гъозиегьой нечогъиреи э тозе коронавирусевоз «пиррола».
— Э овхьолет эри 3-муьн ноябрь и геновариант э Уруссиет э хьисоб веноре не оморебу. Имогьой э хьисоб веноре омори 7 гъозиегьо э Санкт-Петербург ве 3 – э Москов. Гьемме Московски гъозиегьо фегьм сохде оморет ве гьеммей энугьо овурде омори эз е жигейгегьо. И одомигьой Уруссиети, оморетгьо эз форигъэти эз Турцие ве Германие, – мэгIлуьм сохди э журналистгьо рэхьбер эн Уруссиетлуье потребительски назари А.Попова.
У диеш гуфди, ки денишире оморени песдеине лов биреи тозе жире.
— Э фегьмсохигьо гуьре, и тозе жире нечогъи гурунд гирошде нисе оморе. Гьееки э уревоз суьфдеи рузгьо гирошдени лап гурунд, герми жендек варафдени те 38 градус,- гуфди бинелуье санитарни духдир вилеет.
Гьемчуьн А.Попова э хогьишевоз руй бисдо эки одомигьой Уруссиет э жунсогьи хуьшде гереки тигъэтлуь бире. Гьемчуьн у гуфди «э унжо эже гереки» гереки маске вокурде, десгьоре ве гаджетгьоре э темизи гуьрде ве эже кура бирени омбаре одомигьо рафде герек нисди. Эгенер виниренит ки хьол ишму зобуни эз хуне вадарафде герек нисди, эзу товун ки э жунсогьи хуьшде ве э иловлей ишму гьисдигьо одомигьо зарали зере неев.
Чуь расирениге э грипп ве ОРВИ, гьонине вэгIэдо э Догъисту гьеле офде не омори. Э у гуьре лабораторни фегьмсохи бирмунди, ки эри песини орине омбар веди бири вирусгьой эн гриппсуьзе этнологие: метопневмовирус, РС-вирусгьо ве аденовирусгьо. Суьфдеи гиле эри эпидемически вэгIэдо э республике веди бири грипп А.
Э пушокие фикир эн ГьеммегIуьломие идорей жунсогьи дошдеи гуьре, денишире оморени, ки хьисоб нечогъгьо омбар мибу э декабрь ве январь. Эзу товун пуш-пушоки гереки хьозуьр бире эки вирусни атаке. Ве эзу товун гереки гъэлем зере. Зере оморенигьо гъэлем хэйрлуьни ве секонесуьзи. И гъэлеме гIэмел миев зере э поликлинике ве гьовои. Э товун секонеи нечогъ биреи э ер овурдени сервор эн инфекционни отделение эн Кайтагски ЦРБ С.Гаджиадамове.
— Э вэхд поизи нечогъи Грипп омбар лов бире. Э сереботи эни нечогъи бирени пневмоние. Пневмоние мидану бире вирусни ве бактериальни. Зеренки гъэлеме нечогъи гирошдени асант,- гуфди духдир-инфекционист.
Имогьой э товун профилактике эн унигее секонее нечогъи- суьвруьже, омбардеки э и нечогъиревоз нечогъ биренуьт гIэилгьо. Нечогъи гирошдени эз е орине те се орине. Э песини пенж рузгьой нечогъ биреи суьвруьже мидануь гирошдени эки екиге. Духдиргьо гуфдиренуьт, ки э вэхд нечогъ биреи веди бирени се жирегьой нечогъи: катаральни, вэгIэдой хов сурои сохдеи ве вэхд хос биреи. Гьемчуьн угьо гуфдиренуьт эри зу хос бире гереки хурде емишгьо ве гереки гъэлем зере.
Бинелуье сенигIэкор-фегьмсох эн отдел эпидемиологически назари эн Идорей Уруссиетлуье потребительски назари эн Республикей Догъисту Е.Комаревцеве гуфди, ки гъэлеме эз суьвруьже гереки зере э гIэилгьош ве э келете одомигьош.
— Суьфдеи гъэлем э гIэилгьо зере оморени э суьфдеи сал зиндегуни, дуьимуьн гъэлем зере оморени кейки гIэил бирени шеш сале. Э келете одомигьо суьфдеи гъэлем зере оморени те расире э 35 сале. Э келете одомигьой деруьтгьо э десдей жэхит гъэлем зере оморени те 55 салеш: и корсохгьой жунсогьи дошдеи ве эн соводие идорегьо, эн социальни сфере ве коммунальни гъуллугъсохи, корсохгьой транспор ве диеш,- мэгIлуьм сохди Е.Комаревцеве.
