Гоф сохденки э нушудорегоргьой телевиденией Догъистуревоз Сернуьш Хьуькуьм эн Республикей Догъисту А.Абдулмуслимов ихдилот сохди, комини инвестиционни проектгьоре республике гъувот дори ве э комини тарафгьо республике параменд сохде миев.

Пуьрсуьш: Абдулмуслим Мухидинович, эгенер ишму инвестор мибисдорит, э комини отрасль мидешендит пулгьой хуьшдере?
Жугьоб: Республике имбуруз параменд биренигьо региони, эгенер ме инвестор ве сэхьибкор мибисдоруьмге пулгьоре мидешендуьм э параменд биренигьо отрасльгьо, эже гIэмел миев омбаре гъэзенж вегуьрде. Э кор онгури. Эзу товун ки бегьергьо омбар бирени ве хоригьо эри кошде онгуре омбари. Иму эри песини 3-5 салгьо вечиреним омбаре онгур. Гьемчуьн гереки пулгьоре дешенде э сферей тозеден э кор венгесдеи онгуре.
Е тарафиге эри инвестициегьо – и молгъредорини. Иму гьйсэгIэт э хьисоб эн дегь регионгьой Уруссиет дерим э товун ведешендеи молгьой молгъэреире. Иму сер гуьрдейм вокурде завуд «Дагмясо». Э унжо тозеден э кор венгесде миев молгьой молгъэрегьо.
Гьелбетте, э регион иму параменд бирени сафари. Э е сал э регион оморени эз 1,5 млн одомигьо омбарте. Догъгьо, дерьегь ве де жигейгегьо мерэгълуь сохденуьт сафарчигьоре. Э инжо дери омбаре четинигьои, ве эри гъэрор сохде угьоре гереки инвесторгьо. Э инжо гIэмел миев гоф сохде э товун параменд сохдеи агросафарире. И ижире тарафгьои, эже гIэмел миев дешенде пулгьоре. Ве инвесторгьой иму сер гуьрдет дешенде пулгьой хуьшдере Меселен, фирма «АлиЯк» э Сулейман-Стальски район э 1000 гектар хори ведешендени молгьой гушди ве молгьой ширире. Гье э инжо э гуьнжо овурде омори 150 корлуье жигегьо. Э и тараф имуре омбаре проектгьои.
Чуь расирениге э сафари – имуре вес нисе сохде гъуногъхонегьо, инфраструктуре, кафегьо, ресторангьо ве хурекхонегьо. Ве э и тарафиш гIэмел миев дешенде пулгьоре.
Ме фикир сохденуьм ки э суьфдеи нубот гереки параменд сохде экосафарире ве агросафарире.
Имуре гьисди э чуьревоз мерэгълуь сохде сафарчигьоре, оммо инфраструктурере гереки параменд сохде. Вокурде оморени рэхьгьо, гировунде оморени газ, электроэнергие, оммо э кор э гуьнжо овурдеи сафарире лап омбаре пуьрсуьшгьои. Э Гунибски район иму рафдебирим э Салтински шэхшэхэ, э Гамсутль, э Зеверие Гуниб ве виниребирим, ки э унжо омбаре мошингьо эз де регионгьой Уруссиети. Оммо вес сохдениге э унжо жигегьо эри норе мошингьоре ве гьисдиге э унжо жигегьо эже гъуногъгьо мидануьт хурек хурде ве рэхьэтире вегуьрде? Гьеммей энугьоре гереки параменд сохде. Гуьнжолуье гъуллугъгьоре дори республикански Министерствой экономике, Министерствой сафари ве Министерствой базургенди.
Жейле гереки гоф гуфдире э товун овхьолет э хокоруревоз. Э омбаре районгьо пул эри ведебердеи хокоруре доре нисе оморе. Оммо гьемчуьн гьисди шегьергьо ве районгьо пул эри ведебердеи хокоруре доре оморени 70%-80%. Гьэгъигъэт э районгьо, эже дери сафарлуье жигегьо пул доре оморени лап кем. Э и товун гуьре, овгъотгьоре расунденигьо идорегьоре эри гъэрор сохде гьемме хьэсуьл оморенигьо четинигьоре пул вес нисе сохде. Э буйругъ эн рэхьбер республике эн Сергей Алимович Меликов гуьре, хьозуьр сохде омори энергитически программегьо ве программегьо эри де тарафгьойге, ве доре миев омбаре пулгьо. И программегьоре гъобул сохди федеральни меркез. Гьеммей эни коргьо сохде оморени евош-евош.
Пуьрсуьш: Варасиреним, четинигьо омбари, угьо гъэрор сохде оморенуьт ве Догъисту мерэгълуьни. Комини пуьрсуьшгьо вожиблуьни?
Жугьоб: Имуре гьисди Каспийски гъирогъдерьегьлуье жиге, еки эз вожиблуье проектгьой иму. Денишире оморени, ки гьееки э компаниеревоз «Кавказ.РФ» вокурде миев тозе шегьер форигъэти э Каякентски район ве гIэилие жунсогьи венгесденигьо меркез. Ишму дануьсденит, Президент Уруссиет В.В.Путин э товун параменд сохдеи сафарире э Дербенд, гировундебу жейлее гуьрдлеме. Э и гуьрдлеме и пуьрсуьшгьо пуьруьш сохде оморебу. Имуре гьисди дерьегь, Самурски више, гьисди Дербенд лап гъэдимие шегьер э вилеет, гьисди Хунзахски плато, Гунибски район ве Казбековски район э каньоневоз. И зуригьо гировунде миев жейлее гуьрдлеме э товун параменд сохдеи сафарире э Казбековски район, э дигьбон Дубки.
Сафарире иму сер гуьрдейм параменд сохде бэгъдовой пандемие, бэгъдовой негьишдеи ведарафде эз вилеет. Э параменд сохдеи гьемчуьн кумеки сохди ве гъэдерлуье терггьо, дешенде оморебугьо э гъэршуй вилеет иму бэгъдовой сер гуьрдеи жирелуье гъовхолуье операцие. Э инжош имуре омбаре минкингьои.
Пуьрсуьш: Эки республикей иму мерэгълуь биренуьтге де вилеетигее инвесторгьо? Э чуьревоз иму миданим угьоре мерэгълуь сохде?
Жугьоб: Иму и пушогьо рафдебирим э Питербургски гIэрейхэлгъие экономически форум. Э унжо Сергей Алимович гоф сохдебу э векилгьой эн Объединенни Арабски Эмиратевоз ве эн Ираневоз. Эки иму оморебируьт десдегьо эз Узбекистан, Казахстан ве эз де вилеетгьоиге. Угьоре мерэгълуь сохдени торихлуье ве тебиетлуье жигегьо, догъгьой иму ве дерьегь. Эри де вилеетигее инвесторгьо гьисди омбаре тарафгьо, эже угьо мидануьт дешенде пулгьоре. Меселен вокурдеи гъуногъхонегьоре. Э де вилеетигегьо, меселен э Иран ве Турцие, и бизнес параменд бирени. Иране воисдени тозеден э кор венгесде дигьлуье хозяйственни молгьоре. Э республикей иму тозеден э кор венгесде оморени энжэгъ 15-17% дигьлуье хозяйственни молгьо. Эгенер гуфдире омоге э товун корхоне «Дагмясо» – и хьуькуьметлуье корхоней имуни, комиреки иму сер гуьрдейм вокурде.
Оммо гьемчуьн гьисди одомигьо, комигьоки мерэгълуь биренуьт э дуне кошде веровундеиревоз. Э республикей иму дуне кошде веровунде оморени э 32 гьозор гектар. Имуре гьисди программей параменд сохдеи дуне кошле веровундеире э республике.
Диеш е тарафиге – и жэгIэ дошде веровундеи. Э песини салгьо и отрасль лап хуб параменд бирени.
Эз республикей иму гирошдени рэхь мошингьо «Софун-Дорум», ве и рэхьэш гереки хэйрлуь э кор венгесде.
ГьейсэгIэт гъуьч сохде оморени федеральни рэхь мошингьо Р-217, э и рэхь гировунде оморени чор ризгьо. Денишире омори ки эри вокурдеи рэхьэ эз гъирогъ Дербенд, Махачкале ве Хасавюрт доре миев эз 104 млн монетгьо омбарте. Гьемчуьн гъуьч сохде миев рэхь Махачкале-Астрахань.
Пуьрсуьш: Мидуге республике инвесторгьоре, гьер коми бисдо юридически, налогови ве де жирейге льготгьо?
Жугьоб: Гьелбетте. Гьер инвестор, эн хуьшде, энебуге эн де вилеетиге, мие дануь ки эри энугьо налоггьо кем сохде омори. Гьемчуьн имуре гьисди синогъи доре хорире эри инвестиционни проект алвер не сохденки. Пор ижире хоригьо доре оморебу э Кизлярски район эри параменд сохдеи дуне кошде веровундеире. Эзуш бэгъэй имуре гьисди инвестиционни мейдунгьо «Тюбе», «Аврора», «Уйташ» – э унжош гировунде оморени гереклуье инфраструктуре. Инвестор мидануь сер гуьрде вокурдеи корхоней хуьшдере. Имуре омбаре четинигьо э хоригьоревоз. Эз 4,2 млн гектар 3,2 млн – хоригьо эри дигьлуье хозяйственни коргьои.
Иму мие варасим, ки инвестициесуьз, инвесторсуьз гьичиш параменд сохде ниев. Оммо э имбурузине руз лап келе инвестор – и хуькуьмети. Иму мие рази бошим эз федеральни структурегьо – эз Министерство экономике ве мескенлуье параменди, эз Министерствой дигьлуье хозяйство ве эзунигегьо – эри гъувотдореи республикански проектгьоре.
Пуьрсуьш: Эгенер гуфдире омоге э товун вожиблуье проектгьо: эки чуь миоруь э кор венгесдеи энугьо ве гьисдиге барасигьо?
Жугьоб: Эри параменд сохдеи республикей имуре э кор венгесде оморени пенж вожиблуье проектгьо. И э кор венгесде оморенигьо инвестиционни проектгьои, комигьореки нум доре омори э хьисоб вегуьрденки гъэдер э гуьнжо овурде оморигьо корлуье жигегьоре, ве тарафгьой эну эри веди сохде минкингьой республикере.
Пуьрсуьш: Чуьни инвестиционни картей регион ве эри чуь и карте э гуьнжо овурде омори?
Жугьоб: Эри, инвестиционни картей республике хьозуьр сохде омори, у веноре омори э Инвестиционни портал эн регион. Э унжо гIэмел миев винире мэгIлуьметире э товун овхьолет эн инвестиционни гьово, э товун инвестиционни проектгьо ве э товун овгъотгьой тебиет.
Ишму пуьрсиребирит, эже гIэмел миев дешенде пулгьоре. Э сер эни пуьрсуьш мие жугьоб ду инвестиционни карте. Э и карте мие бирмунде биев, чуьжире инфраструктуреи э унжо ве герекиге зиедие хэржигьо. Меселен имуре бу ижире инвестор, комиреки воисдембу вокурде теплицере. Веди биребу, ки гировунде электричестворе эки эни теплице лап бугьо нуьшде, ве проект э кор венгесде не оморебу.
Имбуруз гьеммей имуре е республикеи ве иму уре параменд мисохим.