Гьер хэлгъ – и бердегор эн базургенди хуьшдеи, эн гIэдот хуьшдеи гьемчуьн эн жирей зиндегуни хуьшдеи. Ве, гьелбетте, еки эз вожиблуье бэхшгьой эн гьер хэлгъ – зугьун энуни. Дошде зугьуне – и лап вожиблуье везифеи.
ГIэрейхэлгъие руз эн гIэзизе зугьун, комики тогIин сохде омори э 1999-муьн сал э гъэрорномей эн 30-муьн сессиеревоз э Генеральни конференцие ЮНЕСКО ве и руз гировунде оморени гьер сал 21-муьн февраль. Э суьфдеи нубот везифей эну гъэлхэнд сохде нисд биренигьо зугьуне. И лап вожиблуье ве гереклуье кори, эзу товун ки гьер дуь орине э гIуьлом нисд бирени е зугьун ве э хуьшдеревоз бердени базургенде миросире.
Зугьун эн догълуье жуьгьургьо – жуьгьурини (гьевел гуфдире оморембу «зугьун тати). Э жуьгьурие-татски зугьун гIэмел миев неки гоф сохде, оммо гьемчуьн и эдебиетлуье зугьуни. Эдебиетлуье жуьгьури гуьнжуьнде омори эз жирей гофсохдеи эн жуьгьургьой Дербенд.
Суьфдеи мэгIлуьмлуье еровурди эн десхэти жуьгьургьо и «Оцар ха-миллим шел ха-сафа ха-татит-иехудити» («Сокровищница слов еврейско-татского языка») эн мэгIлуьмлуье рабби эн Дербенд эн Яаков Ицхаки (1848-1917). И десхэти гуьнжуьнде омори э 70-муьн-80-муьн салгьо ве э унжо вери 1900 гофгьо э жирей гофсохдеи эн жуьгьургьой Дербенд ве тержуьм сохде омори э иврит. Суьфдеи киниггьо, дофус зере оморигьо э жуьгьури, и «Сионизм» эн Иосиф Сапира (1869-1935), дофус зере оморигьо э нумевоз «Мэтлеб сионигьо» (Цель сионистов, Вильна, 1908-муьн сал), ве широ «Кол тфилла» (Вильна, 1909; э зугьун ивритиш). Гьердуь киниггьоре тержуьм сохди А.Пинхасов. Э пушойгофи эки широ А.Пинхасов нуьвуьсди: «Нимелите зугьу эн нимелите зугьун», ире гIэмел миев тержуьм сохде чуьн «Мы и половину этого языка не знаем».
Э 1915-муьн сал э Баку ведиреморени суьфдеи гозит э жуьгьури, комиреки э зугьун урусси нум доре оморебу «Эхо гор» («Сес догъгьо» – «Голос гор»). Чендгъэдер э ме мэгIлуьмиге, ведиреморебу энжэгъ се гозит, е гозитиш эзугьо дошде не омори. Оммо э 1919-муьн сал, гье э унжо, э Баку, ведиреморени гозит «Товуши сэбехьи», орган эн Кавказски районни сионистски комитет.
Бэгъдовой тогIин сохдеи хьуькуьм советире э Кавказ дофус зереигьо э зугьун жуьгьури ведиреморембу э Азербайджан. Э 1922-муьн сал э Баку ведиреморени суьфдеи советски гозит э зугьун жуьгьури «Корсох». Э 1921-муьн салгьо э унжо дофус зере оморени суьфдеи хьэрфномей жуьгьургьо «Таза школе» («Новая школа»), комиреки нуьвуьсдебируьт Иосеф Хаймович-Шура ве Н.Мазарик. Ве э 1927-муьн сал – киниг эри жуьгьурие-татски школегьо «Гюл догъи» («Горный цветок»), комиреки нуьвуьсди Бен-Гирари.
Э 1927-муьн сал э Догъисту сер гуьрде оморени дофусзереи э зугьун жуьгьури. Гье э у сал э Москов гирошдигьо Гьеммесоюзни гуьрдлеме э товун базургендие кор э гIэрей татгьо гъобул сохде оморебу гъэрорноме э биней эдебиетлуье зугьун дешенде жирей гофсохдеи эн жуьгьургьой Дербенде. Зугьун жуьгьурире се жирей гоф сохдеини: эн гъубеигьо, эн дербендигьо гьемчуьн эн хайтогьигьо. Не денишире э у ки гуьрдлеме гирошдебу э вэхд дешендеи латынски хьэрфномере эри чуькле зугьунгьой эн СССР, фикир гирошдеи эз хьэрфномей жуьгьургьо э латынски дебе сохде оморебу ве гъэрор сохде оморебу э товун «вокализацие» эн хьэрфномей жуьгьурире.
Э 1928-муьн сал хьуькуьм гъобул сохдебу гъэрорноме э товун гировундеи догълуье-жуьгьурие зугьуне э латынски хьэрфноме.
Э 1938-муьн сал э латынски хьэрфноме гировунде оморебугьо десхэти гировунде оморебу э кириллице.
Э 1930-муьн салгьо эдебиет эн догълуье жугьургьо зу параменд бирембу. Омбаре нуьвуьсдегоргьо, комигьоки э у салгьо нуьвуьсдембируьт э зугьун жуьгьури, э кор венгесдембируьт жирей гофсохдеи эн жуьгьургьой Дербенде. Э 1932-муьн сал э Москов дофус зере оморени суьфдеи (ве те имогьой е теке) киниг«Грамматик зугьун тати» («Грамматика татского языка»), комиреки нуьвуьсди Николай (Нафтали Цви) Анисимов. Н.Анисимов бу еки эз желдлуье бэхшвегиргьой эн догълуье-жуьгьурие «зугьуне вокурдеи» э эхир эн 20-муьн-30-муьн салгьо. Э 1938-муьн сал конституцией эн ДАССР «татски» зугьуне мэгIлуьм сохдени еки эз дегь хьуькуьметлуье зугьунгьой республике. Э 1928-муьн сал э Дербент сер гуьрде оморени ведиреморе гозит «Захметкеш». Песде гозит ведиреморени э жуьр-бе-жире нумгьо: «Гъирмизине гъэлем» (Красное знамя»), Гъирмизине астара («Красная звезда»). Оммо эз 1991-муьн салевоз гозите доре оморени нум «Ватан» ве гозит ведереморени э дуь зугьунгьо: жуьгьури ве э урусси. И гозит ведиреморени е гиле э орине ю. Э верэгъгьой гозит дофус зере оморени верэгъгьой гIэили, эдебтетлуье верэгъгьо, дерсгьой хунде дануьсдеи зугьун жуьгьурире.
Ченд бо дегиш сохде оморигьо хьэрфноме, э де вилеетгьоиге рафдеи – гьеммей энугьо е бэхш вогьнегьои, э сереботи комики кем бирени хьисоб одомигьо гоф сохденуьтгьо э зугьун жуьгьури. Мисволуье фонд СТМЭГИ э сер хуьшде вегуьрди гурунде ве гIэсуьлменде коре: гьемме гъувотгьоре веноре эри дошде зугьун жуьгьурире э дуньегь иму.
Энжэгъ э гъувотгьой дуь эн екиревоз гIэмел миев дошде зугьун имуре.
