Э республике эпидемиологически овхьолет э товун COVID-19 лап тижлуьни. Э 11-муьн январь э хьисоб веноре омори 111 коронавирусни нечогъгьо, оммо э 12-муьн январь 186 коронавирусни нечогъгьо. Ве сенигIэткоргьо пушоте тэгIбир сохденуьт, ки хьисоб нечогъбирегоргьо зевер мибу э сереботи лов сохде оморенигьо омикрон.
Чуь дануьсденим иму э товун эни омикрон? Ве чуь нисе дануьсденим? Э Рэхьберисохи эн Уруссиетлуье потрбительски назари эн Республикей Догъисту хьозуьр сохде омори документ э товун жирелуьи эн тозе штамм.
Э чуьревоз жирей омикрон сеч бирени эз жирегьой дельте?
Нечогъ биренки э омикроневоз одоми омбарте бирени гъувотсуьз ве дор дорени сер, кемте вир бирени буй векоширеи ве дегиш бирени дэгIэм. Жирегьой нечогъи ухшеш зерени э у, комигьоки биренуьт э вэхд ОРВИ: герми жендек варафдени те 38 градус (кими вэхд зевертеш), дорд дорени желгъэгьо ве гушд жендек, эз вини тигьи бирени гIов, бугьоз дорд дорени, сер гуьрде оморени суьвре ве хуьрде нисе воисде. Эн кимигьо нечогъгьо зевер бирени герми жендек, оммо э жендек гIэилгьо ведиреморени гермиши. Нечогъи эн омбаре нечогъбирегоргьо гирошдени сук. Оммо жирелуьи эн тозе гIэзор кумеки сохдени неки лов сохде уре э гIэрей одомигьо, оммо гьемчуьн минкин дорени зуте ве желдлуь нечогъи гирошде э шушлуггьо. Ведини, ки гереки диеш дошде гьемме суьфде дешенде оморигьо гъэдерлуье терггьоре. Эгенер параменд бисдоге нечогъбиреи эз хуне герек нисди вадарафде, зуте руй бире эки духдир ве тижлуь дошде гьемме буйругъгьоре – вокурде маскегьоре, шушде десгьре ве дуьр поисде дуь эз еки.
Гуфдиренуьт, штамм омикрон лап фетгелуьни. Эже дери жэхитгьо эже гIэмел миев вегуьрде нечогъире?
Э буьлуьнде зэгIифлуье штаммгьо гуьре гье белки зэгIифи мидануь гирошде э у жигегьо эже кура биренуьт омбаре гъэдер одомигьо. Э даннигьой эн японски гIилмчигьо гуьре, омикрон гирошдени э 4,2 гиле зуте, эз угьонигее штаммгьо. Эз гьемме омбарте нечогъи гирошдени эзу одоми, комики поисди э куьнди ве комики суьвруьсдени, эз вини ки гIов тигьи бирени ве бугьоз дорд дорени. Эгенер вокурде омоге маске ве поисде омоге дуьр дуь эз еки гье белки гIэзор гирошде ниев, оммо те эхир нисд сохде нисе оморе.
Бэгъдовой ченгъэдер вэхд нечогъбиреи э омикроневоз э одоми хьэсуьл оморени тегьергьой нечогъи?
Э имбурузине даннигьо гуьре, зэгIифи омикрон гирошдени э одоми э гIэрей 3-6 рузгьо. Э хьисоб вегуьрденки божеренлуьи эн тозе штамме зу лов биреи, мидануь бире гьечуь, ки э нуботлуье руз одоми мидануь нечогъ бире.
Бэгъдовой ченгъэдер вэгIэдой нечогъбиреи э и штаммевоз одоми мидануь, ки у нечогъ бири э COVID-19?
Фегьмсохи мэгIлуьм бирени э эхир инкубационни вэхд, енебуге бэгъдовой 1-6 рузгьо эз вэхд нечогъбиреи.
Гьемчуьн пресс-гъуллугъсохи эн назарлуье ведомство мэгIлуьм сохдени, ки Рэхьберисохи гьер орине фегьм сохдени ченгъэдер одомигьо нечогъ биретге (ОРВИ).
Гьечуь, эз 3-муьн те 9-муьн январь 2021-муьн сал э мескен Догъисту нечогъбирегоргьой ОРВИ зевер нисе бирембу. Э гьемме административни мескенгьой республике веди нисди, ки хьисоб нечогъбирегоргьо бирени зевер. Эри эхирлуье хьисоб сохденигьо вэхд э республике э хьисоб веноре омори 3520 нечогъбирегоргьой ОРВИ, и зофрутеи эз эпидемиологически риз э 33%.
Э овхьолет дошдеи лов сохдеи тозе коронавирусни гIэзоре ве эн вэхдине зевер биреи нечогъбиреи ОРВИ Уруссиетлуье потребительски назари э ер овурдени, ки гьебелкине дуь гъэзоргьо мидануь гуьрд бире. Гъэришилуь биригьо гъэзор мидануь гирошде лап гурунд ве мидануь хьэсуьл оморе лап зобуне эзуновлейге бире гъозиегьо. Чуьнки угьо небу, гереки дошде гьемме мэгIлуьмлуь гьисдигьо чорегьой темизире.
