Иму дануьсдейм гоф сохде э одомиревоз, комиреки гьисди хубе сенигIэт, э верзуьшлуье тербиедорегор эн Уруссиетльуе Федерацие э Рамбом Хагаевич Беньягуевевоз.

Рамбам Хагаевич хьэсул омори 26-муьн январь 1953-муьн сал. Хунди э школе №115 э шегьер Дербенд. Бэгъдовой хунде варасдеи школере у гъуллугъсохире гирошди э жергей ерэгъленмише гъувотгьо, э технически гъуллугъсохи эн ракетнигьо лешгергьо. Э 1979-муьн сал, бэгъдовой вогошде омореи эз лешгер, дарафди э Ростовски хьуькуьметлуье зеверие соводие идоре э физически факультет. Э 1984-муьн сал хунди варасди зеверие соводие идорере ве вегуьрди диплом э товун сенигIэт физик-теоретик.

Тербиедоренигьо корисохи хуьшдере Р.Беньягуев сер гуьрди э 1984-муьн сал. Уре фуьрсоребу кор сохде э завуд, оммо эзи кор у нэгI сохди, ве рафди кор сохде тербиедорегор физике э сенигIэтлуье технически миенее соводие идоре №16. У гьеммише хьисоб сохдембу, ки кор э корхоне ежирелуьни ве мерэгIлуь нисди. Оммо кор сохде э гIэилгьоревоз е жирейгеи. Э миенее соводие идоре межбур биреним гъэрор сохде четинигьоре ве везифегьоре, чуьтам э физике. «Э хотур гIэилгьо ве школе ме тербие доренуьм гIэзизе физикере,- гуфдирени Р.Беньягуев,- эзу товун ме вихдем кор сохдеире э школе, э товун чуьки ме пешму нисе биренуьм гьейсэгIэтиш».

Те 1991-муьн сал жовоне тербиедорегор тербие дорембу энжэгъ физикере. Э вэхд кор сохдеи э миенее соводие идоре у э гуьнжо овурди программируеми калькуляторе ве гьееки э е тербиедорегоревоз, э Р.Керимовевоз, хьозуьр сохди уре. Программированни калькулятор эну бесгъун берди э конкурс эн жовоне сенигIэткоргьо «Молгьой жэгIмиетлуье хэржисохи». Суьфдеи калькулятор э миенее соводие идоре, э кор венгесде оморебу э дерсгьой физике, комигьоки гирошдебу мерэгIлуь.
Рамбом Хагаевич Беньягуеве э 1997-муьн сал доре оморебу нум «верзуьшлуье тербиедорегор эн Уруссиетлуье Федерацие», документе э товун бэхширеи гъуьл кеширебу Б.Н.Ельцин.
Физикере у тербие дори эз 15 сал омбарте. Уре э хуне э товун физике омбаре киниггьои, гьейсэгIэт у э у киниггьоревоз кор нисе сохде, оммо шендеш нисе дануьсде, эзу товун ки угьо эри эну лап бугьолуьнуьт.

Кейки э миенее соводие идоре гъэрор сохде оморебу гуьнжуьндеи компьютерни классе, Рамбом Хагаевич э шориревоз сер гуьрд гуьнжуьнде и классе. У вохурдебу э министр соводи республикеревоз гьемчуьн э жигегир энуревоз ве те эхир бегьем сохдебу, чуьнки миенее соводие идорере доре биев компьютергьо. Тербиедорегор э хуширевоз у хуьшдению сер гуьрд норе и компьютергьоре. Гьемчуьн э миенее соводие идоре хьэсул оморебу тозе курсгьо – оператор ЭВМ (электронни-хьисоб сохденигьо мошингьо). Э у вэхд э компьютерни класс э миенее соводие идоре норе оморебу гьеймогьине технике, комики не дебу э гьеммей Догъисту. Эри компьютерни курсгьо рафдембу омбаре вэгIэдо, ве у межбур биребу нэгI сохде эз дерсгьой физике э миенее соводие идоре, чуьнки омбарте кор соху программрованием.

Эз 1991-муьн сал те 2004-муьн сал хундегоргьой курсгьой эну бесгъун бердембируьт э республикански олоимпиадегьо э товун информатике. «Кими вэхд хундегоргьой мере нуьшуьндембируьт жейле, эри дуьборе фегьм сохде дананигьой энугьоре, бу гьечуьш, ки угьоре доре оморебу тапшуьрмишигьо э гIэрейхэлгъие программе гуьре. Оммо гIэилгьо гьич имиди мере хуьрд нисе сохдембируьт»,- гуфдирени Рамбом Хагаевич.

Курсгьо э миенее соводие идоре кор сохдебируьт те 2004-муьн сал, тейте угьо гировунде не оморебу э Догъистонлуье хьуькуьметлуье технически зеверие соводие идоре (ДГТУ), эже у кор сохдебу экуьнди е сал, песде у эзунжо ведарафдебу.
Екем вэхд Р.Беньягуев тербие доребу физикере э Догъистонлуье универститет, тейте э унжо дебу факультет физике.
Э 2005-муьн сал у сер гуьрд кор сохде тербиедорегор э жэгIмиетие соводие школе №12, э унжо кор сохдембируьт гьевел биригьо гьемкоркигьо ве хьовиргьой эну. Дуь сал у кор сохди тербиедорегор информатике. И школе еки эз суьфдеигьои, э хьисоб вегуьрденки войгегьой тербиедорегоргьоре гьемчуьн эн хундегоргьоре ве минкингьой хуьшдере, вокурди тозе данани дореире – информационни тараф. Программирование лап четине дерси, ве имогьой э школе сер гуьрде омори фирелуь ве лугъонд хунде данусде информатикере. Дерсгьой информатике гирошдени пенж сэгIэт э е орине. Гьемме тербиедорегоргьо нисе дануьсденуьт инфоматикере. Оммо чуьнки Р.Беньягуев – физик-теоретики, комики лап хуб дануьсдени математикере, у дануьсдени ве мие бу хубе программист, ве э гIэрей омбаре салгьо у субут сохди тербиедорение корисохи хуьшдере. Эри барасилуь хунде дануьсде информатикере мие бу войге ве хубе тербиедорегоргьо. Школехундегоргьо ки хунденуьт э классгьой информатике эри энугьо асанти дарафде э зеверие соводие идорегьо.

Э вэхд кор сохдеи э школе №12 Р.Беньягуев ведешенди шеш классгьоре, омбаре хундегоргьой эну дарафдет э зеверие соводие идорегьо чуьтам э вилеет иму (МГУ, Московски технически универститет э нум Бауман), гьемчуьн э де вилеетгьоигеш. Кимигьо хунде варасдет зеверие соводие идорегьоре ве кор сохденуьт программист.
Рамбом Хагаевич ихдилот сохдени, ки хундегор эну Яна Немировская – бэхшвегир эн республикански олимпиадеи э товун информатике – гьейсэгIэт дарафди э Зеверие школей экономике э факультет компьютерни секонесуьзи.
Э 2009-муьн сал э республике гировунде оморебу конкурс «Э кор венгесдеи информационни технологиегьоре э соводи». Рамбом Хагаевич Беньягуеве доре оморебу суьфдеи жиге э тараф «Хьозуьр сохдеи сэхьиблуье нуьвуьсдеи программегьоре э тербиедореи информатикере». У гуьнжуьнди интерактивни киниг информатикере (еклуье программе эри кор сохде э дофусзереигьревоз, э комики дофус зере омори экуьнди 2000 везифегьо). И программере тербиедорегор мидану э кор венгесде э дерсгьо. Эри суьфдеи жиге уре доре оморебу бэхш ве нетбук, комиреки доребу Имам Яралиев. Тербиедорегор информатике гьейсэгIэтиш нуьвуьсдени киниггьой хуьшдере ве гьеммишелуьг э угьо нуьвуьсдени тозе программегьо.
Рамбом Хагаевич кумеки сохдени э е тербиедорегоргьош, кумеки сохдени э угьо э гуьнжуьндеи компьютерни программегьоре эри гировунде очугъе дерсгьоре.

Тербиедорегьо гъэдуьр энуре дануьсденуьт ве гуфдиренуьт эзу согьбоши. Р.Беньягуев гуфдирени, ки у лап хосденбу физикере, оммо имогьой у хосдени информатикере. Эри фегьм сохде тежрубере э товун физике гереки омбаре пулгьо, оммо эри информатике вес сохдени компьютер, эже гIэмел миев гировунде дегишигьоре. Компьютер минкин дорени фегьм сохде хэелгьо ве фикиргьоре, мерэгIлуь не сохденки келе пулгьоре. Программирование – хубе кори, чуь туь тозе фикир сохдейге гIэмел миев винире ве гьеммере гIэмел миев фегьм сохде. Метлебгьой гIэили эну веромори э хотур компьютер. Омбаре одомигьо э шегьер хуте бирет кор сохде э сер компьютер э хотур Рамбом Хагаевич. Э хотур тербиедорение мэгIрифет эну гьемчуьн э хотур тигъэтлуье гъэножогъи эки гьер хундегор эзу товун гIэилгьо вегуьрдет муьхкемлуье дананигьо э товун физике, математике ве информатике.

Хундегоргьой эну дануьсдет вокурде очугъ сохде божерени ве мэгIрифет хуьшдере. Мие омбар бу ижире жирелуье тербиедорегоргьо, чуьн Рамбом Хагаевич Беньягуев!