Паяндаева Агарь Борисовна эз деде хьэсуьл омори э кифлет жуьгуьргьо э шегьер Буйнакск э 1920-муьн сал. Бэгъдовой варасдеи школере №3 э нум Урицски у дарафди э Суьфдеи Догъистонлуье тербиедоренигьо училище. Хунде варасденки училищере у не рафди эри кор сохде тербиедорегор, оммо сер гуьрди кор сохде серчирегор. Гьеммейки нум энуре гуфдирембу Аня.
Эз ихдилот ветеран Буьзуьрге довгIой Ватани Агарь Паяндаева гуьре:
«20-муьн май 1943-муьн сал, духдоргьоре эз Буйнакск огол зерет э довгIо, иму оморейм э комининиге чеченски дигь. Э инжо иму гьобул сохдейм довгIолуье шовгIоре, бэгъдовой эну имуре фуьрсорет э Кубань, эже гирошдембу гъэзоблуье гъовхогьо. Суьфде иму лап терсирембирим, оммо иму кем-кем хуте бисдорим эки эни туп гIэжелигьоре шендеи. Эзинжо мере фуьрсоруьт эри кор сохде санитарке э 91-муьн батальон. Эз Буйнакск э меревоз гьемчуьн бируьт М.Птицина, В.Сметанина, Рудыкина ве Баландина. Иму бэхш вегуьрдебирим э хилоссохие гъовхогьо э Кубань, э Калининградски область, э Латвие, э Литва гьемчуьн э Эстоние.
Бу эзини гъозие. Иму поисдебирим э Латвие, бу офтолуье руз. Хэгьергилиме Марие ве ме дегиш сохдим партале, вокурдим пожегьоре ве чекмегьоре рафдим э гешдегьо. Э и вэхд э хьэет нуьшдебируьт сервор полк иму – подполковник Петр Иванович гьемчуьн жигегиргьой эну – Бородач ве майор Громовой. Ме э хэгьергилимеревоз не виниребирим угьоре – гирошдим эз ен энугьо, оммо кейки винирим угьоре иму терсирим. Гье бирден иму шиновусдим, чуь Петр Иванович гуфдирени эз жигегир хуьшде: мибосдоге имуре эзини духдергьо! Иму чаруьсдим, угьо шинохдуьт имуре, сер гуьрдуьт хэндуьсде ве мэхсере сохде ве имуре доруьт минкин эри дуь сэгIэтигеш гешде.
Бу е гъозиегеш. Иму нуьшдебирим экуьнди е станцие. Бу вэхд пишнеи, гьемме лешгерчигьо ве офицергьо хурдембируьт чи пишнеире. Гье э и вэхд эри ме овурдуьт когьозе эз хуне, э когьоз доноре оморебу пул. Ме лап шор бируьм. Гье бирден шиновуьсдим сес немецки самолетгьоре. Гье э и дэгъдэгъэ угьо сер гуьрдуьт шенде туп гIэжелигьоре. Мере не бисдо минкин эри хунде когъозе, ме вирихдуьм эри пэхни бире, оммо э унжо бируьт ералуьгьо ве мурдегоргьо. Кейки шендеи тупгьой гIэжели поюнде оморебу, иму вечирим гьемме ералуьгьоре, муьрдегоргьоре битехьэим сохдим, энжэгъ э эхир руз ме дануьсдуьм хунде когъозе комики омори эз хуне. Э довгIо ме не гуфдиребируьм, ки ме серчирегорум, оммо е гиле чирем рушгьой генерал-полковнике И.Х.Баграмяне. Кор бу ижире. Кеиге И.Х.Баграмян оморебу э бэхш иму ве диремо экиму э лазарет эри сер кешире нечогъгьоре. Э сер шуьлхьон поисдебу гузги, у дениши э гузги ве вини, ки рушгьой эну чиренини, ме гуфдирем эзу:
-Генерал-полковник, гьебелким чинуьм рушгьой Ишмуре?
-ГIэмел миев. Гьечуь ме чирем рушгьой Маршал Союз Совети И.Х.Баграмяне э биевгьо.
Э мегь сентябрь 1945-муьн сал ме вогошде оморем э хуне э Буйнакск. Э хуне ме шиновуьсдем зобуне хэбер: чор бироргьой ме ве дуь лелегьойме эз довгIо не вогошдет».
Агарь Борисовна бэхшире омори э орденевоз «Ватанлуье довгIо», э медальгьоревоз «Эри гъэлхэнди Кавказ», «Эри бесгъуни э сер Германие», «Эри гъовхолуье верзуьшигьо» ве унигегьо. Бэгъэдовой довгIо варасдеи омбаре салгьо кор сохди серчирегор, у бу хьуьрметлуье одоми э кор гьемчуьн э шегьериш.
Э 1995-муьн сал Агарь (Аня) Борисовна Паяндаева рафди э Исроил.
