Мардахаева Анастасия Михайловна, тати, эз хьэсуьл омори 1-муьн январь 1923-муьн сал э шегьер Буйнакск. Э мегь сентябрь 1940-муьн сал дарафди э акушерски-фельдшерски школе э шегьер Буйнакск. Сер гуьрде оморенки Буьзуьрге довгIой Ватани, у рафди эри кор сохде э госпиталь 46-51 ве хундеи хуьшдереш не шендебу. Э 1942-муьн сал, варасденки школере, э войгей хуьшдеревоз рафди э довгIо.
ДовгIолуье гъуллугъире Анатасия Михайловна гирошди э Софун-Кавказ э полевой госпиталь (АПГ-45-40). Межбур бирембу э зир гIэтош дуьшмегьо кумеки сохде э ералуье лешгерчигьо, ведеберде угьоре эз мейдон гъовхо.
Э гIэрей гьеммей зиндегуни э ер эну мунди е лешгерчи, комики мунди гъулсуьз ве пойсуьз. Э песини дэгъдэгъэ гIуьмуьр хуьшде у хосди бумажнике, эри песини гиле денишире э гIэрус хуьшде. Ме нуьвуьсдем когьоз эри гIэрус эну, оммо адрисе эри гуфдире уре не бисдо минкин.
Лап бежид э сер госпиталь шенде оморембу туп гIэжелигьо. Э 1944-муьн сал э госпиталь бу тиф. Меш нечогъ биребируьм, 12 рузгьо ме э хуьшде недебируьм, фикир сохдебируьт, ки ме муьрдем. Бэгъдовой тиф сер гуьрдебу анемие, мере фуьрсоребируьт э вэхд форигъэти эз товун нечогъи, эзуновлейге мере векендебируьт эз довгIолуье хьисоб. Песде ме рафдем эри кор сохде медицински хэгьер гье э у госпиталь, эже сер гуьрдебируьм кор сохде довгIо сер гуьрденге.
Те довгIо сер гуьрде Анастасия Михайловна бу гIэрус Мардахаев С.И, комики эз 1940-муьн сал те 1946-муьн сал гъуллугъ сохдембу э Лешгер, бу бэхшвегир довгIо. Э 1946-муьн сал ме ведарафдем э шуьвер, э 1947-муьн сал хьэсуьл омори кук иму Вячеслав Семенович. Кук иму гъуллугъ сохдембу э Чехославакие.
Мардахаев С.И. эз 1946-муьн сал кор сохдембу мошинбер э жуьр-бе-жуьре идорегьой Махачкале, бу бэхшвегир КПСС гьемчуьн вихде оморебу депутат шегьерлуье меслэхьэт.
Эз 1961-муьн салевоз Мардахаева А.М. кор сохдембу э дуьимуьн шегьерлуье больнице медицински хэгьер, эз 1965-муьн салевоз – медицински хэгьер э Ленински шегьерлуье военкомат Махачкале. Э вэхд эпидемие холере э 1970-муьн сал кор сохдембу э зир рэхьберьети профессор Таран у дорембу медицински кумекире гьемчуьн кор сохдембу э гъэршуйчумни станцие эн шегьер Махачкале.
