Жоборде тербиедорегор

Рачи ди туь тегьер эн гуьл.
Ватан эз туь шори соху.
Имид э туь егъин бесдуь.
Зоя Семендуева.
Сер ебо шиновусденге э товун расиреи гьемватанигьойму э буьлуьнде барасигьой творчествой жофои иму омбар шор биреним, ве э келе гIуьзетевоз омбаракбу сохденим угьоре. Диеш иму шор биреним шиновусденге э товун гIуьзет сохдеи одомигьой хэлгъ имуре.
И пушово, шоре хэбер расиребу эри хундегоргьой гозит иму. Э Буйругъ Президент РД гуьре эри омбаре салгьой кор сохдеи ве верзуьшигьой эз тараф соводи доре оморебу буьлуьнде нум «Верзуьшлуье учитель Догъисту» Ольга Аврумовна Юханановаре.

Ольга Аврумовна эз деде хьэсуьл омори э мегь апрель 1972-муьн сал э кифлет жофокешгьо. Гьеле э вэхд хундеи э школе Ольга Аврумовна бирмунди организаторски хосиет хуьшдере, ве дебире уре келе хьуьрмет э гIэрей десдей хундегоргьо, у бири эшгълуье бэхшвегир гьемме школьни мероприятиегьо. Варасде миенее школей №1 э буьлуьнде гъиметгьоревоз э 1989-муьн сал Ольга Аврумовна кор сохди э и школе чуьн пионервожати.
Э 1995-муьн сал, гъобул сохде диплом учителе, у гьелбет генеш вогошдени э суьгьде школей хуьшде. Увэхди энжэгъ е пуьрсуьш норе оморебу э пушой эну егъин биреи нубодорегор, комиреки хьисоб сохди чуьн еки эз вожиблуье сенигIэтгьо.
Ольга кор сохди э школе 30 салгьо зиедте гировунди нубогьой математикере. Гьемчуьн омбаре салгьош гировунди э школе рэхьберьети эн школьни методобъединение, бири хубе классни рэхьберчи, хуте сохди гIэилгьоре ижире хосиетгьой инсоньети, чуьн рэхьмедуьли, боворинлуьи э хуьшде, жогьобдлорлуьи эки вегирде дананигьо. Нубогьой эну гьеммише хьосиетлуь бирет эз творчески тегьер.
Э гировунде нубогьой математикеи хуьшде эз сер суьфде у хуте сохдени гIэилгьоре э кор венгесдеи рациональни тегьергьой корисохире э сер учебни материал. Ольга Аврумовна е ченд гиле дори очугъэ (открытые) нубогьой математикеи э семинаргьой рэхьбергьой ве завучгьой школегьо шегьер Дербенд ве гъобул сохдебу еки эз буьлуьнде гъиметгьо.
МэгIэной педагогически кредо эну дери э несигIэтгьо: муьхькемлуье муьгьбет эки гIэил-гьо ве гъэдерсуьзе боворин эн нишонденгьой энугьо, гешде ве офде гьеммише эффективни тегьергьой корисохи энуре, гуьрд биригьо э гIэилгьо-ревоз, еклуье корисохи э тербиевегирдегоргьо ве деде-бебегьой энугьоревоз.
Ольга Аврумовна бэхш вегирди э жэгIмиет-луье зиндегуни школе ве шегьер, гировунди жире-бе-жире мероприятиегьо эри интеллектуальни ве гьемтарафлуье параменди гIэилгьо.
Гъобул сохде келе тербиедорлуье стаже, у диеш сер гирди эри э кор венгесдеи современни инновационни технологиегьоре, гьеммише зевер сохди квалификацией хуьшдере ве расири э буьлуьнде барасигьо эз тараф хундеи ве тербие дореи келе биренуьтгьо эрхэгьоре. Нушу доре келе хьуьрмет ве гIуьзет энуре э школе, О.Юхананова норе оморебу рэхьбер эн богъчей гIэили №17 э тозе вокурде оморебугьо «Келе-нумаз» шегьер Дербенд. Юхананова Ольга э вэхд корисохи хуьшде э гъуллугъи рэхьбер МБДОУ бирмунди хуьшдере, чуьн соводлуье, номуслуье, эшгълуье рэхьбер, дануьсди пуьруьш сохде четинигьой хуьшдере. Ольга гьеммише кор сохдени эри диеш зевер сохде дананигьой соводи хуьшдере.
Неденишире э чуькле синогъи жовоне рэхьбер богъчей гIэили э мегь сентябрь 2011-муьн сал Юхананова Ольга э буьлуьнде гъиметгьоревоз гирошди курсгьой зевер биреи квалификацией э Догъистонлуье институт зевер биреи квалификацией педагогически кадргьо.
Э дуьруьсде рэхьберьети Ольга Аврумовнаревоз, э богъчей гIэили №17 гуьнжуьнде оморебируьт хушлуье овхьолет, кумек сохдебугьо эу э кор венгесдеи пуьрсуьшгьой тербиедореи ве параменди келе биренуьтгьо эрхэгьоре. Гьемме утогъгьой гIэили э богъчей гIэили ве медкабинет нушу доре оморенуьт эз тараф тозе современни оборудование, раче дуьрлуьг, гъобул сохде оморет омбаре гIэиллуье инвентарь, игрушкегьо, параменд сохденигьо эгъуьл гIэиле возигьо. Э детсад гуьнжуьнде омори хубе спортзал, нушу доре омори сбалансировани хурек, кура сохде омори келе методически литература.
Творчески почерк Юхананове жирелуьни э гешдеи хуьшденлуье теклифигьой четине пуьрсуьшгьо. Ольга Аврумовна творчески тегьер э дануьсдеи кор хуьшдеревоз эдее вокурде парамендлуье-соводлуье процесс э идоре, нушу доре приоритетнигьо пуьрсуьшгьоре, чуьн гъоим дошдеи психологически ве физически жунсогъи гIэилгьо-ре ве нушу дореи эри гьер гIэил минкинигьо шоре тегьер гировундеи вэхд дошкольни ве чуькле школьни гIэильетире.
Ольга Аврумовна Юхананова дануьсди кура сохде жовоне, ве жофокеше коллективе э богъчей гIэили ве хьэрекет сохди гуьрд сохде мерэгъгьой энугьоре эри параменди еклуье тегьер корсохдеи э данандее рэхьберьети энуревоз гьемме творчески процесс. Тербиедорегоргьой богъчей гIэили деруьт э творчески гешдеи тозе формегьо ве методгьой корисохи.
Юхананова О.А. омбар хьэвеслуье одомини. Творчески потенциал эну вес сохдени эри кор сохде э суьгъде идорей хуьшде, гьемчуьн эри кор жэгIмиетиш. У нушу дорени келе синогъи хуьшдере э коллегегьоревоз э гIэзизе школей хуьшде, гьисди несигIэтдорегор жовоне тербиедорегоргьо.
Божорене ве номуслуье жофокеши эну, муьгьбет эки вихде сенигIэт корисохи хуьшде инуьт дуьруьсде тегьергьой чигьрет эну, комигьоки нишонлуьни эри эни холисе рэхьбер.
Э эхир эни статья воисдени гуфдире, ки уре деригьо буьлуьнде хьуьрмет ве позицией зиндегуни дорени муьгьлет эри гуфдире, ки, э и четине вэхд зиндегуниму деруьт ужире рэхьбергьо, комигьоки эз дуьли жуни овурденуьт гъуллугъи хуьшдере э гъэлхэнди мозоллуье гIэильети.
Диеш уре дери келе хьуьрмет э гIэрей кифлет ве гIэилгьой хуьшдеш, комигьоки вероморенуьт э овхьолет дусди ве жофои ве зевер гирденуьт хьуьрмет бебе-дедешуре.
Имуреш эз нуминей хэлгъ иму, воисдени омбаракбу сохде уре э ижире буьлуьнде бэхшевоз ве хосде эри Ольга Аврумовна, шо-ри, ники, ве диеш расиреи э буьлуьнде барасигьой жофои.