0

Бинелуье метлеб хэлгъгьойму

Иму зигьисденим э омбаремиллетлуье вилеет – Уруссиет. У гьисди жэгIмие хуне эри хочперезгьо, мусурмугьо, егьудигьо, нушудорегоргьой де конфессиегьо омбаре девргьо, зигьисденуьтгьо э овхьолет разилугъи ве гъуногъсевени. Ижире гъэножогъигьо гьисди неки тегьер зиндегуни вилеет иму, гьемчуьн гьисд миллетлуье девлет иму. Ве иму мие гъоим дорим уре.

4-муьн ноябрь э Уруссиет нушу доре оморебу Руз еклуьи хэлгъгьо. Гьелбет и мигIид гирдени жигере э гIэрей хьуьрметлуье мигIидгьой гьеймогьоине Уруссиет.

И мигIиде гьисдуьт лугъонде торихлуье биннуьшигьо ологъолуь гьисдуьтгьо э мэгIэной ватанхогьиревоз, омбаремиллетлуье разимендиренвоз, нушу дореи гуьрд биреи жэгIмиете. Руз еклуьи хэлгъгьо гьисд нишоней тогIинлуь биреи мэгIэной еклуьи корисохи эри хушхьоллуье жэгIмие, бинелуьи еклуьи ве варасиреи, гуьрд биреи гъувотгьой иму эри телеф сохдеи четинигьоре э параменди экономике, э боворин биевгьой вилеет иму.

МигIид еклуьи хэлгъгьо эз сер суьфде гьисди гирдеи торих вилеет имуре ве боворин сохде э себэхьине руз Уруссиет. Чор садсалигьо уруссиетигьо гуьрд биребируьт э гIуьзет муьгьбети эки Ватан хуьшде, азади ве буьзуьрги эну. ЖэгIмие гъэрхундигьо теклиф сохдет уруссиетигьоре эри гъэлхэнд сохде михьтожсуьзи вилеет хуьшдере. Имбуруз омори вэхд эри э ер овурде нубогьой гирошде торихе ве э боворинлуьиревоз пушово рафде. Гьелбет Догъисту гьемме эз еки ве омбаре гъэдимие ве омбаре республикегьои неки э Совун-Кавказски федеральни округ, гьемчуьн э Уруссиетиш. Бинелуье девлет имуни, хэлгъгьойму, комигьоки ченд салгьо зигьисдеи э е чуькле хори э дусдлуье ве бирорие кифлетевоз, гъовхо берде э гъэршуй гьемме буруние ве доруние дуьшменигьо ве секонеигьо.

Гереки иллогьки риз кешире э товун конституционни принципгьой тенихдиери хэлгъгьо, тенихдиери одоми э гIэрей эну эз тараф вихдеи динбоворинсохишуре. Не денишире э у овхьолет, ки дин жейлеи гуфдире эз хьуькуьмет, нушу доре хьуькуьметлуье ологъигьоре, э жире-бе-жире конфессиегьоревоз, гьисди граждански гъэрхундиму. Гьер одомире гьисди ихдиери вихдеи ве боворинлуь биреи э диндогIотлуье гъонунгьой хуьшде, динлуье экстремизм мие телеф сохде биев эз зиндегуниму. Гьеммейму мие егъин даним, ки сокитлуь не биреи политически овхьолет ве экономически параменди ниеруь имуре эки барасигьо.

Унегуьре гьер инсон э жигей хуьшде мие э келе эшгъ дуьлевоз кор соху эри хушхьоллуье вилеет хуьшде. Энжэгъ гирдеи хьуьрмет дуь екире, хэлгъгьо мидануьт муьхькем сохде гIэреймиллетлуье шолумире ве хушхуьллуьи гьеммей хэлгъгьоре. Нисдуьт зобуне хэлгъгьо, оммо вохурде оморени э гIэрей гьемме хэлгъгьо зобуне ве номуссуьзе одомигьо, комигьоки мие жогьоб дуьт эри сохде зобуне коргьо ве нушу доре оморенуьтгьо фикиргьошу.

Иму миданим эрклуь бире, ки э гIэрей гьеммей торих Догъисту имуре не бири бэхьсгьо эз тараф миллетлуье пуьрсуьшгьо. ГIэреймиллетлуье гъэножогъигьо э Догъисту гьеммише бирет ве мибу чуьн мэгIэногьой жирелуье гъэйгъуи иму, чуьнки у гьисди бинньуши эн гьеммей республике.

Имбуруз гереки гуфдире э товун базургенде еклуьи иму. Гереки нушу дореи нишонегьой еклуьи хэлгъгьой вилеет имуре. Э товун Уруссиет лап омбаруьт нишонегьой еклуье кумеки, еклуье дусди хэлгъгьой вилеет иму. Ужире гъозиегьо гирошдебируьт э вэхд довгIо ве эдее гирошденуьт имбурузиш, диеш муьхькем сохдеи ологъигьой дусди ве бирорьетире, комигьоки гьисдуьт еки эз бинелуье приоритетгьой зиндегуниму.

Э вэхд нушу дореи Союз Совети иму гьеммише бирим еклуье бирорлуье кифлет хэлгъгьой СССР. Имбуруз Уруссиет – гье у омбаремиллетлуье вилеети.

Президент Уруссиет В.Путин э статьей хуьшде э товун пуьрсуьш миллети гуфдиребу, ки омбаремиллетлуье эну, еклуьи – гьисди хьуькуьметлуье э гуьнжо овурденигьо гъозиеи уьсуьз хьуькуьмет хуьшдени ю нисе дануьсде эврелуь бире. Ве э товун ижире кор гьич герек нисди фурмуш сохде.

Э Догъисту нушу доре оморенуьт сад хэлгъгьо зиедте. 33 миллетгьо, э 14 зугьунгьо дофус зере оморенуьт гозитгьо, журналгьо, художественни литературе, гировунде оморенуьт регулярни телерадиовещаниегьо, бирмунде оморенуьт томошегьой хьуькуьметлуье театргьо. Гьер одомире гьисди минкини эри дануьсде хуб зугьун ве базургенди хуьшдере Гьеммейкиму дуь э екиревоз гоф сохденим э зугьун урусси, ве гьеммей имуре гьисди гьэгълуье дуьзугьунлуьи, комики гьисди арт эн кор иму эри гъоим дошдеи дусдире, еклуьире э гIэрей хэлгъгьо, гереки гьеммишелугъ.

Республикере гьисди гIоширлуье синогъи эз тараф миллетлуье пуьрсуьшгьо. ГIэреймиллетлуье гъэножогъигьо э Догъисту гьеммише бирет чуьн мэгIэной жирелуье гъэйгъуи иму, чуьнки у гьисди биннуьши эн гьеммей республике.

Эз сер суьфде гереки боворинлуь бире дуь эеки ве тигъэтлуь эки четине пуьрсуьшгьой де миллетгьоиге.

Гьелбет, одомигьоре воисдени зигьисде э овхьолет шолуми ве разименди ве омбар вожиблуьни э корисохи эз у тараф. Унегуьре гьисди имуре келе имид, ки гъэдимие омбаремиллетлуье Догъисту мимуну нишоней шолуми, бирорьети э гIэрей хэлгъгьой республике ве Уруссиет ве экономически хушхьоллуьи эну.

Изму воисдени эз гьеммей дуьли омбаракбу сохде гьемме хундегоргьой имуре э ижире мигIидевоз, хосде эри гьемме шолумлуье хэлгъгьой вилеет иму муьхькемлуье жунсогъи, мозоллуьи, буьлуьнде барасигьо э нике коргьошуревоз эшгълуье ве бегьерлуье жофокеши эри хушлуье овхьолет республикейму ве гьеммей Уруссиет.

admin

Добавить комментарий