0

Э товун параменд сохдеи соводире гуфдире оморебу э Августовскм гуьрдлеме эн корсохгьой соводи э Догъисту

Сернуьш Хьуькуьм эн Республикей Догъисту А.Абдулмуслимов, 23-муьн август бэхш вегуьрдебу э Августовски гуьрдлеме эн корсохгьой соводи эн Республикей Догъисту. И гуьрдлеме гьер сал гировунде оморени э пушой эн тозе хунденигьо сал.

Имисал Августовски гуьрдлеме ве гуьрдлемей Меслэхьэт гировунде оморебу гьееки эки Сервор эн Республикей Догъисту.

Те сер гуьрдеи гуьрдлеме А.Абдулмуслимов фегьм сохди соводие бирмундеигьоре эн зиедие, жэгIмие ве эн тешколее соводире. И бирмундеигьоре хьозуьр сохди меркез «Альтаир», Юнармия ве ТОКСовцегьо.

Песде прмьер-министр сер гуьрди Августовски гуьрдлемере.

Руйбиреи эн сервор Министерствой соводи эн Уруссиетлуье Федерация эн С.Кравцов

Эки бэхшвегиргьой гуьрдлеме э жирей онлайн руй бири министр соводи Уруссиет С.Кравцов. У гуфди, ки Августовски гуьрдлеме хубе жигеи эже гьер одоми мидануь гуфдире фикиргьой хуьшдере, ве минкин дорени гировунде артгьой гировунде оморигьо коре.

«Гьемме везифегьо, комигьоки норе оморебугьо э порине хунденигьо сал веровунде оморет. Жейле воисдени гуфдире согьбоши эз тербиедорегоргьо, эз десдей тербиедорегоргьо, эз рэхьбергьой эн муниципальни органгьой соводи, эз десдегьой энугьо, эз региональни министргьо, гьемчуьн эз серворгьой эн жэгIмиесоводие идорегьо.

Имбуруз э пушой иму поисди омбаре везифегьо эри хьозуьр биреи эки хунденигьо сал ве зевер сохдеи качествой соводире. Гереки гуфдире, ки э гIэрегьой проект «Соводи» норе омори везифе дарафде э хьисоб эн дегь вилеетгьой гIуьлом э товун качественни школьни соводи»,- гуфди С.Кравцов.

Бэгъдовой шолум гуфдиреи эз курабирегоргьо, А.Абдулмуслимов э ер овурди, ки Сервор эн Республикей Догъисту С.Меликов э е эз гуьрдлемегьой Меслэхьэт 2022-муьн сале э регион мэгIлуьм сохди Сал соводи. Денишире оморени, ки гировунде миев жуьр-бе-жире мероприятиегьо э республикански гьемчуьн э федеральни ризгьо.

Эри расире оморигьо барасигьо э 2022-муьн сал 30 тербиевегуьрдегоргьоре бэхшире оморебу 100 гьозор монетгьо

А.Абдулмуслимов риз кеши, ки э республике гереки э гуьнжо овурде ижире овхьолете чуьнки гIэилгьо мерэгълуь бошут хунде хуб.

«Эз порине салевоз бесгъубергьоре ве бэхшвегуьрдегоргьой эн гьеммеуруссиетие школьни олимпиадегьоре ве тренергьой энугьоре, гьемчуьн школехундеварасдегоргьоре доре оморени 100 гьозор монетгьо. Имисал ижире бэхш доре оморебу 30 школехундегоргьоре ве се тербиедорегоргьоре».

Э Догъисту вокурде оморени 103 школегьо эри 40 гьозор хунденигьо жигегьо

«Мере воисдени гуфдире, ки э кумеки эн федеральни меркезевоз э республике вокурде оморени омбаре соводие идорегьо. Э гьонине вэхд э республике э гIэрегьой эн жуьр-бе-жире хьуькуьметлуье программегьо вокурде оморени 103 школегьо эже мидануьт хунде 40 гьозор гIэилгьо. Ве гьемчуьн вокурде оморени 56 богъчегьой гIэили эри 8 гьозор жигегьо, эзугьо э 2022-муьн сал э кор венгесде миев 74 объектгьо (30 школегьо ве 44 богъчегьой гIэили). Э план гуьре денишире оморени, ки 1-муьн сентябрь дергьой хуьшдере мивокунуь чор тозе школегьо эри 1606 хунденигьо жигегьо ве 15 богъчей гIэили эри 2360 жигегьо»,- ихдилот сохди сервор эн кабинет министргьо.

Эз 1-муьн сентябрь э школегьо сер мигируь кор сохде меслэхьэтчи э товун несигIэтдореи

Чуьтам гуфди А.Абдулмуслимов, э гьонине гIэрейхэлгъие овхьолет жейлее тигъэт гереки доре э пуьрсуьшгьой ватанхогье несигIэтдореи гьеймогьине жовонгьоре.

«Эри иму лап вожиблуьни чуьнки жовоне одомигьоре бу гьис ватанхогьи, эрклуь бире эри Ватан хуьшде ве гъуллугъ сохде эри Ватан хуьшде».

Э 2022-муьн сал э республике э гуьнжо овурде миев е жерге гьеймогьине соводие меркезгьо

Премьер министр эн Республикей Догъисту гуфди, ки э регион вокурде омори 171 гьеймогьине соводие Меркезгьо «Жигей зевер биреи» ве гIэилие технопарк «Кванториум».

Э гIэрей э кор венгесдеи программере «Земски тербиедорегор» 93 тербиедорегоргьо фуьрсоре миев э школегьой дигьгьо

Э гIэрей эн Августовски гуьрдлеме А.Абдулмуслимов мэгIлуьм сохди, ки э 2022-муьн сал э программей «Земски тербиедорегор» гуьре э школегьой дигьгьо фуьрсоре миев 93 тербиедорегоргьо. Гьер тербиедорегоре доре миев 1 млн монетгьо.

Э 2022-муьн сал эри сферей соводи фуьрсоре миев 66,2 млрд монетгьо

Песде гоф гуфдиребу министр соводи гьемчуьн эн гIилми эн Республикей Догъисту Я.Бучаев. У риз кеши, ки соводие системей Догъисту параменд бирени лап зу.

Э республике э тозе хунденигьо сал сер мигиру кор сохде 21 объектгьой соводи, вокурде оморетгьо ве э кор венгесде оморетгьо э гIэрегьой эн миллетлуье проектгьо «Соводи» ве «Демография».

Э товун артгьой эн программей гъуьчсохи школегьоре

Я.Бучаев гировунденки артгьой эн программей гъуьчсохире ве нореи оборудованиере э школегьо э 2022-муьн сал, гуфди, ки э имбурузине руз эз 210 школегьо те эхир гъуьч сохде омори 191 школегьо э 127 жэгIмиесовдие идорегьо, эзугьо э 19 муниципальни соводигьо гъуьч сохде омори гьемме школегьо (75 школегьо). Э 12 муниципалитетгьо 27 жэгIмиесоводие идорегьо гъуьч сохде омори э 97%-99%. Э 15 муниципалитетгьо 56 объектгьо бегьем сохде миев э и зуригьо.

Эз 1-муьн сентябрь э гьемме школегьой Уруссиет сер гуьрде миев мэгIнолуье проект – «Гоф сохде э товун вожиблуь гьисдигьо»

Песде гоф сохдебу жигегир сервор Департамент эн хьуькуьметлуье политике э сферей гъэлхэнд сохдеи ихдиери гIэилгьоре Ю.Сачко. У гуфди, ки 1-муьн сентябрь э гьемме школегьо сер гуьрде миев келе проект – «Гоф сохдеи э товун вожиблуь гьисдигьо». «Хунденигьо орине мие сер гуьрде биев эз «Гоф сохде э товун вожиблуь гьисдигьо», гIуьзет сохде оморигьо э жуьр-бе-жире гъосуьтгьо э комигьоревоз мерэгълуь биренуьт гьеймогьине школехундегоргьо. Бинелуье гъосуьтгьо мибу ваианхогьи ве граждански несигIэтдореи, региональни гъозиегьо, торихлуье данани дореи, параменд сохдеи торихе, экологически несигIэтдореи ве обурлуьи»,- ихдилот сохди Ю.Сачко.

Э пушой эн бэхшвегиргьой эн Августовски гуьрдлеме нушу доребу бесгъунбер эн республикански Гьеммеуруссиетие конкурс «Тербиедорегор сал эн Уруссиет – 2022-муьн сал»; тербиедорегор зугьун урусире ве эн эдебиете э лицей №14 э шегьер Каспийск О.Петрова.

Э эхир Августовски гуьрдлеме мэгIлуьмлуье тербиедорегоргьой республикере доре оморебу хьуькуьметлуье бэхшгьо.

admin

Добавить комментарий