Хьозуьр сохде э шолумие коревоз, гъэйгъу кешире э товун куьнде одомигьой хуьшде – и варасирение гъиметлуьигьои эри гьер одоми. Оммо э четине вэгIэдогьо, кейки вир бирени омбаре жейлее фикиргьо, одомигьо, жейле жовонгьо, комигьоки рафденуьт э бибоворине дин-догIотие рэхь.

Эри варасире и бинекорире, Арсен Кадыров, зигьисдегор эн дигь Хамаитли эн Цутински район дори лап бугьолуье гъимет. МэгIнолуье бэхш жовони хуьшдере у гировунди э гъэземет, лап дур эз зен хуьшде гьемчуьн эз гIэилгьой хуьшде.

Эки ижире дегишигьо эки зиндегуни э гофгьой Арсен гуьре, уре овурди нехэберекие овхьолет.

«Ме э више э ен дигь Хамаитли эдембируьм вечири хьузуьм. Гье бирден ме э хуьшде кешируьм, чуьтам э ме расиге сенгъ. Денишируьм э пушо ве винируьм э куьндиме оморенигьо одомире. У бу бирорме».

Бирорме екем вэгIэдо пушоте «рафди э више». Эз Арсен у хосди нун. Эзумоевоз э хогьиш бироревоз Арсен бежид эри десдей «э вишедеригоргьо» овурдембу хурек.

У вэхд жовоне гIэил бу наздегь сале. ГIуьмуьрлуьгъи, кейки фикир нисе содени э товун эзуновлейге биренигьо гъозие. Оммо у вэхд Арсен эвленмиш биребу.

Э гофгьой эну гуьре, у варасирембу, ки сохдени гъонунсуьзе коргьо.

«Ме бируьм жогьил. Умогьой ме фикир сохдембируьм, ки сохденуьм хубе коргьо, ки ме игидуьм»,- гуфдирени у.

Гирошденки екем вэгIэдо э товун гъэножогъигьой эну мэгIлуьм биребу э ихдиергъэлхэндие органгьо. Арсене гуьрдебируьт, песде бу дивуни. У дешенде оморебу э гъэземет э пенж сал ве чор мегь. У гъэземет нуьшдебу э Татарстан.

Э и гурунде вэхд э куьнди эну энжэгъ бируьт деде-бебе, бироргьо ве зен эну. Бэгъдовой дуь мегь нуьшдеи э гъэземет Арсен шиновуьст, ки уре зенде омори кук. Гьебелкине, и дори уре гъувот обурлуь те эхир нуьшде вэхд хуьшдере. Э гъэземетиш гIэмел миев вэхд хуьшдере гировунде э хэйревоз. Э унжо жовоне одоми вегуьрди суьфдеи э гIуьмуьр хуьшде сенигIэте – слесарь гъуьч сохденигьо мошингьоре.

У вэхд, кейки у пор э декабрь вогошди омори э хуней хуьшде, дануьсди гъэл гуьрде деде ве бебере, зене, шеш сале кук хуьшдере ве бироргьоре ве сер гуьрде омори тозе зиндегуни.

«Мере воисдени дошде веровунде кук мере, зенде диеш гIэилгьоре. Воисдени офде кор, кумеки сохде э деде-бебейме гьемчуьн э бироргьойме. Э хуне кор офде лап гурунди. Рафде э е районигегьо нисе данусденуьм, гьеле кори сохдени гъэдерлуье тергьо бэгъдовой хилос биреи. Бэгъдовой е салигвэхд эну варасдени, фикир сохденуьм рафде э Махачкале, кор сохде автослесарь енебуге вокурдегор. Оммо гьеле кор сохденуьм э хуне»,- гуфдирени Арсен.

ГьейсэгIэт Арсен 26 салеи. Уре гьисди ижире зобуне синогъи, эзу товун у несиет дорени жовоне одомигьоре эри не сохде гъонунепузмишие коргьо: «Денишит э гоф деде ве бебешму, гъувот дить угьоре. Не денишит э гоф жуьр-бе-жуьре одомигьо, комигьоки э раче гофгьоревоз ихдилот сохденуьт э ишму э товун довгIо эри дин. И фурмундеини, эри сохде эзишму тэхсирсуьзе гъурбуни. Хуте бошит э сер уьзгее егъэлмишигьо, ме сохит егъэлмишигьой хуьшдере».

Ижирегьо чуьн А.Кадиров, комигьоки рафдет э зобуне рэхь э Цунтински район бу лап омбар. Омбаре вэгIэдо район бу е суьфдеи жиге э товун хьисоб террористически желдлуьи. Чуьтам э ер овурдениге келетей дигь М.Сиражутдинов, лап четине овхьолет э инжо бу эз 2010-муьн те 2015-муьн салгьо: «Омбаре жовоне додомигьо рафдет э Сирия, угьонигегьо гировундембируьт террористически актгьо».

Э и вэхд муьрдет омбаре одомигьо. Кимигьо кифлетгьо межбуьр бируьт рафде эз гIэзизе жигегьой хуьшде. М.Сиражутдинов ихдилот сохдени: «Омбаре одомигьо гьебелкине шиновуьсдет, ки одоми эз дигь иму хуьшдере лов сохди э Кизляр. Диеш дуь бироргьой эну куьшде оморебируьт э жирелуье операциегьо. Мундигьо одомигьой кифлет эну рафдет эз дигь. Гьечуь лов бири келе кифлет». Э фикир эну гуьре э сер жовонгьо кори сохдембу вэхьзи: «Омбар угьо хуте бирембируьт эз гIэрей Интернет. Еки вэхьзи сохдембу, мэгIлуьм сохдембу э екийгегьо, угьо лов сохдембу песдеш. Э район лап гурунд бу офде кор, жовонгьо муьхшуьлсуьз мундебируьт. Оммо э песини вэгIэдо овхьолет дегиш бири. Сес партленмишигьо дие шиновусде нисе оморембу, гировунде оморени жирелуье операциегьо. Одомигьо гьемин бирет, дие нисе терсиренуьт. Жовонгьо варасиренуьт, ки угьоре э кор венгесденуьт чуьн тэхсирсуьзе гъурбуни».

Чуьтам хьисоб сохдени О.Магомедов, жигегир сервор администрация эн Цунтински район, овхьолете дануьсдейм дегиш сохде э хотур андуьрмиш сохденигьо кор, комиреки гировундени антитерростически комиссие ве комитет э товун жовоне политике эн администрацией район.

«Суьфде ижире кор гировунде нисе оморембу лап кем, эзу товун и овурди эки бикефе эзуновлейге бире гъозиегьо. Э имбурузине руз э район бежид вохурде оморени жовоне одоми, хьэсуьл оморигьо э 90-муьн салгьо ве песде, комики не нуьшди э гъэземет енебуге куьшде не омори. Имбуруз омбаргьо эзугьо, ки нуьшди ведиремори эз гъэземет, кумеки сохдени эри гировунде андуьрмуьшлуье коре э товун терроризм»,- гуфдирени О.Магомедов.

Э сирот вери: Арсен Кадиров ве жигегир сервор эн адмистрацией дигь Омар Магомедов.