0

Батальон эну гъэлхэнд сохдебу Сталинграде

Суьфде ихдилот мисохим э товун гIуьзетлуье 197-муьн стрелкови дивизие, комики гуьнжуьнде оморебу се гиле. Э гуьрей Википедие, 197-муьн стрелкови дивизие (эн 2-муьн гуьнжуьндеи) – лешгерлуье десдегьой эн Гъирмизине лешгер, гуьнжуьнде оморетгьо э мескен Краснодарски улке э 1942-муьн сал.

Гуьнжуьнде омори э шегьер Армавир, Краснодарски улке, э март 1942-муьн сал чуьн 197-муьн стрелкови дивизие эн 2-муьн гуьнжуьндеи. Э хьисоб эну дарафдет рэхьберисохи, 828-муьн, 862-муьн, 889-муьн стрелковиегьо, 261-муьн артиллерийски полкгьо ве угьонигее бэхшгьо. Те июль 1942-муьн сал дивизие дарафдебу э хьисоб лешгергьой эн 7-муьн резервни лешгер эн Софун-Кавказски лешгерлуье иловле, песде эн 5-муьн резервни лешгер Ставки ВГК. Э Сталинградски тараф 197-муьн стрелкови дивизие э зир рэхьбери полковник М.И.Запорожченко гировунде оморебу 12-муьн июль 1942-муьн сал.

Суьфдеи бо сер гуьрди гъовхоре эри Сталинград э июль 1942-муьн сал э хьисоб 63-муьн лешгер (эз 1-муьн ноябрь 1-муьн гвардейски лешгер), э унжо у гъовхо бердебу те декабрь. Э гIэрей зулумлуье гъэлхэндие гъовхогьо э район Вешенская ве Еланская бэхшгьой дивизие э гьееки э угьонигее десдегьой лешгеревоз рафдет э пушо. Угьо зафт сохдет мескене э расди гъирогь нуькере, нум доре оморигьо Елански. Э и гъовгьохьо дивизие нисд сохди те 2 гьозор лешгерчигьоре ве офицергьой дуьшменгьоре, омбаре довгIолуье техникере ве ерэгъгьоре. Э гIэрей э пушо рафдеи лешгергьой советире э ен Сталинград ве хилос сохдеи Донбассе дивизие гьееки э десдегьой 1-муьн гвардейски лешгеревоз (эз 5-муьн декабрь 1942-муьн сал 3-муьн гв.А) хилос сохди 170 могьлугълуье пунктгьоре, э и хьисоб шегьер Волошиловграде (14-муьн февраль 1943-муьн сал), зафт сохди те 8 гьозор есиргьоре.

Э хьисоб эни дивизие гъовхо бердембу Гаврилов Владимир Исаакович. У хьэсуьл омори 1-муьн декабрь 1912-муьн сал э дигь Ашага Араг Касумкентски район Догъистонлуье АССР. Э жергегьой Гъирмизине Лешгер эз 1934-муьн салевози, офицери. Э 1940-муьн сал дарафди э жергей коммунистически партие. Э 1941-муьн сал Гаврилов В.И. норе оморебу рэхьбер хунденигьо батальон, э июль 1942-муьн сал у фуьрсоре оморебу э лешгер. Э капитан Гаврилов В.И. ихдибори доре оморебу эри рэхьбери сохде 1-муьн батальоне эн 889 стрелкови полке эн 197-муьн стрелкови дивизиере эн 63-муьн лешгер Софун-Кавказски лешгерлуье иловлере. Э мегь сентябрь 1942-муьн сал ведиреморебу буйругъ рэхьберисохгьо:

4.09.42-муьн сал

Доре бэхш орден Линине капитан Гаврилова В.И. – рэхьбер батальоне эн 889 стрелкови полке эн 197-муьн стрелкови дивизие эз нуминей Хьуькуьм эн Зеверие Союз Совети ССР эри веровундеи гъовхолуье тапшуьрмишигьой рэхьбергьоре  гьмчуьн эри мердьети ве игIидьети.

Э и гъовхо гирошденки нуькерей Доне Гаврилов В.И. биребу ералуь. Эз тевэгъэй э товун бэхширеи:

«1-муьн батальон эн 889-муьн стрелкови полк э гъовхоберигьо э немецки фашизмевоз бирмунди хуьшдере чуьн божеренлуье гъовхо берденигьо дивизие. Лешгерчигьой батальгьон э и гъовхогьо бирмундет мердьетире, игидире ве боворинлуьире эки Ватан хуьшде. Те ераль бире батальоне рэхьбери сохдембу капитан Гаврилов В.И. Не денишире э зулумлуье гIэтош дуьшменгьо батальон, комиреки рэхьбери сохдембу товарищ Николаев, гирошди Доне ве тур-темиз сохдебу дуьшменгьоре – барасилуь рафдебу э пушо. Эз зереи батальон нисд сохде оморебу е ченд сад фашистгьо, омбаргьо эз угьо вегуьрде оморебируьт э есири.

Эри нушу доре оморигьо игиди ве гьинормнди э гъовхогьо омбаре гьовхобергьоре, рэхьбергьоре ве политкорсохгьой батальоне бэхшире оморебу орденгьо ве медалгьо. Э буйругъ рэхьберевоз гъэлхэнд сохденки, батальон е ченд бо зере шендебу гужлуье гъовхой дуьшмене, дошдембу гьер сантиметр вегуьрде оморигьо хорире».

Капитан Гаврилов В.И. песде бири гвардии майор, песде подполковник.

Э гъллугъсохие хьисоб эну бешгъэй орден Ленин, гьемчуьн дери омбаре гъовхолуье бэхширеигьо, э и хьисо: Орден Гъирмизине Астара, орден Ватанлуье довгIо эн 1-муьн степен, медалгьо «Эри вегуьрдеи Сталинграде», «Эри гъовхолуье верзуьшигьо», «Эри бесгъуни э сер Германие э Буьзуьрге довгIой Ватани 1941-муьн 1945-муьн салгьо».

Бэгъдовой Буьзуьрге довгIой Ватани Гаврилов В.И. зигьисдембу ве кор сохдембу э Махачкале.

admin

Добавить комментарий